தமிழகத்திலுள்ள சட்டக் கல்லூரிகளில் சேர

தமிழகத்திலுள்ள சட்டக் கல்லூரிகளில் சேர என்ன செய்ய வேண்டும்?

********************************************************************************

தமிழ்நாட்டில் உள்ள சட்டக் கல்லூரிகள் அனைத்தும் டாக்டர் அம்பேத்கர் சட்டப் பல்கலைக்கழகத்துடன் இணைப்பு செய்யப்பட்டுள்ளன.

இந்தப் பல்கலைக்கழகத்தில் 7 அரசு கல்லூரிகளும், ஒரு சுயநிதிக் கல்லூரியும் இணைப்பு பெற்றுள்ளன. இங்கு இளநிலை சட்டப் படிப்பில் ஐந்து ஆண்டுகள் படிப்பும், மூன்று ஆண்டு படிப்பும் என இரு வகையான பட்டப்படிப்புகள் உள்ளன.

ஐந்தாண்டு பட்டப்படிப்பிற்கு நுழைவுக் கல்வித் தகுதியாக மேல்நிலைக்கல்வி அல்லது அதற்கு இணையான கல்வித் தகுதியும், மூன்றாண்டு பட்டப்படிப்பிற்கு ஏதாவது ஒரு பட்டப்படிப்பும் தேர்ச்சி பெற்றிருக்க வேண்டும்.

அரசு கல்லூரிகள்
*******************************
தமிழ்நாட்டில் சென்னை, மதுரை, திருச்சி, கோயம்புத்தூர், திருநெல்வேலி, செங்கல்பட்டு மற்றும் வேலூர் ஆகிய ஊர்களில் அரசினர் சட்டக் கல்லூரிகள் அமைக்கப்பட்டுள்ளன. இதில் சென்னையிலுள்ள கல்லூரி மட்டும் டாக்டர் அம்பேத்கர் அரசு சட்டக் கல்லூரி என்றும் பிற கல்லூரிகள் அரசினர் சட்டக் கல்லூரி என்றும் பெயரிடப்பட்டு செயல்படுகின்றன.

சுயநிதிக் கல்லூரி
******************************
சேலம் நகரில் சுயநிதி சட்டக் கல்லூரி ஒன்றும் நிறுவப்பட்டு செயல்பட்டு வருகிறது.

சட்டப் படிப்புகளில் யார் சேரலாம்?
******************************************************

ஐந்தாண்டு ஒருங்கிணைந்த பி.ஏ.,பி.எல்., சட்டப் படிப்புகளில் சேர விரும்புபவர்கள் பிளஸ் டூ தேர்வில் குறைந்தபட்சம் 45 சதவீத மதிப்பெண்கள் பெற்று தேர்ச்சி பெற்றிருக்கவேண்டும். பொதுப் பிரிவினர், 20 வயதுக்குட்பட்டவர்களாக இருக்கவேண்டும். தாழ்த்தப்பட்டோர் மற்றும் பழங்குடியினர் 22 வயதுக்குட்பட்டவர்களாக இருக்கவேண்டும். இப்படிப்பில் மொத்தம் 1,052 இடங்கள் உள்ளன.

பிளஸ் டூ வகுப்பில் மாணவர்கள் பெற்ற மதிப்பெண்களின் அடிப்படையில் தர வரிசைப் பட்டியல் தயாரிக்கப்பட்டு, ஒற்றைச் சாளர முறையில், வேலூர் நீங்கலாக (வேலூர் அரசு சட்டக் கல்லூரியில் இப்படிப்பு இல்லை) தமிழகம் முழுவதிலும் உள்ள 6 அரசு சட்டக் கல்லூரிகளிலும் மாணவர் சேர்க்கை நடைபெறும். இப்படிப்புகளில் சேர விரும்பும் மாணவர்கள் பூர்த்தி செய்யப்பட்ட விண்ணப்பங்களை வரும் ஜூன் மாதம் 13-ஆம் தேதிக்குள் சமர்ப்பிக்க வேண்டும். தர வரிசைப் பட்டியல் (ரேங்க் லிஸ்ட்) ஜூன் மாதம் 23-ஆம் தேதி வெளியிடப்படும்.

தமிழகம் முழுவதிலும் உள்ள 7 அரசு சட்டக் கல்லூரிகளிலும் சேர்த்து மூன்று ஆண்டு பி.எல். பட்டப் படிப்பில் மொத்தம் 1,262 இடங்கள் உள்ளன.

மூன்றாண்டுகளுக்கான பி.எல். பட்டப் படிப்பில் சேர, ஏதேனும் ஒரு பட்டப் படிப்பு படித்தவர்கள் விண்ணப்பிக்கலாம். பொதுப் பிரிவினர் பட்டப் படிப்பில் 45 சதவீத மதிப்பெண்களும், இதர பிரிவினர் 40 சதவீத மதிப்பெண்களும் பெற்றிருக்கவேண்டும்.

பொதுப் பிரிவினராக இருந்தால், 30 வயதுக்குட்பட்டவர்களாகவும், மற்ற வகுப்பினராக இருந்தால் 35 வயதுக்குட்பட்டவர்களாகவும் இருக்கவேண்டும்.

மொழிப் பாடங்கள் நீங்கலாக மற்ற பாடங்களில் மாணவர்கள் பெற்றுள்ள மதிப்பெண்களின் அடிப்படையில் தர வரிசைப் பட்டியல் தயாரிக்கப்பட்டு, ஒற்றைச் சாளர முறையில் மாணவர் சேர்க்கை நடைபெறும்.

இப்படிப்பில் சேர மே 26-ஆம் தேதி முதல் விண்ணப்பங்கள் வழங்கப்படும். பூர்த்தி செய்யப்பட்ட விண்ணப்பங்களை வரும் ஆகஸ்ட் மாதம் 8-ஆம் தேதிக்குள் சமர்ப்பிக்க வேண்டும். தரவரிசைப் பட்டியல் ஆகஸ்ட் மாதம் 31-ஆம் தேதிக்குள் வெளியிடப்படும்.

தமிழ்நாடு டாக்டர் அம்பேத்கர் சட்டப் பல்கலைக்கழகம் நடத்தும் சீர்மிகு சிறப்பு சட்டக் கல்லூரியில் (School of Excellence in Law ) என்னென்ன சட்டப் படிப்புகள் உள்ளன?

இங்கு 5 ஆண்டு ஒருங்கிணைந்த பி.ஏ., பி.எல். (ஆனர்ஸ்) பி.காம்.,பி.எல். (ஆனர்ஸ்) பட்டப் படிப்புகளும், 3 ஆண்டு பி.எல். (ஆனர்ஸ்) பட்டப் படிப்பும் கற்றுத் தரப்படுகின்றன. இந்த மூன்று படிப்புகளிலும் வெளிநாட்டில் வாழும் இந்தியர்களுக்காக 15 சதவீத இடங்கள் ஒதுக்கீடு செய்யப்பட்டுள்ளன.

5 ஆண்டு ஒருங்கிணைந்த பி.ஏ., பி.எல். (ஆனர்ஸ்) பட்டப் படிப்பில் சேர விரும்புவோர், பிளஸ் டூ வகுப்பில் 70 சதவீத மதிப்பெண்கள் பெற்று தேர்ச்சி பெற்றிருக்கவேண்டும். இப்படிப்பில் மொத்தம் 120 இடங்கள் உள்ளன. மொத்த இடங்களில் 4 சதவீத இடங்கள், பிளஸ் டூ வகுப்பில் வொகேஷனல் பிரிவை எடுத்துப் படித்த மாணவர்களுக்காக ஒதுக்கப்பட்டுள்ளன.

5 ஆண்டு பி.காம்., பி.எல். (ஆனர்ஸ்) பட்டப் படிப்பிற்கு 60 இடங்கள் ஒதுக்கப்பட்டுள்ளன. பிளஸ் டூ வகுப்பில் காமர்ஸ் குரூப்பை எடுத்துப் படித்து 70 சதவீத மதிப்பெண்களுடன் தேர்ச்சி பெற்றவர்கள் இப்படிப்பில் சேரலாம். இந்தப் படிப்புகளில் சேர விரும்பும் மாணவர்கள் பூர்த்தி செய்யப்பட்ட விண்ணப்பங்களை ஜூன் 6-ஆம் தேதிக்குள் அனுப்பவேண்டும். தர வரிசைப் பட்டியல் ஜூன் 13-ஆம் தேதி வெளியிடப்படும்.

3 ஆண்டு பி.எல் (ஆனர்ஸ்) பட்டப் படிப்பில் சேர, ஏதேனும் ஒரு பட்டப் படிப்பில் 60 சதவீத மதிப்பெண்களுடன் தேர்ச்சி பெற்றவர்கள் விண்ணப்பிக்கலாம். இப்படிப்புக்காக 60 இடங்கள் ஒதுக்கப்பட்டுள்ளன. இப்படிப்பிற்கான விண்ணப்பங்கள் மே 26-ஆம் தேதி முதல் விநியோகிக்கப்படும். பூர்த்தி செய்யப்பட்ட விண்ணப்பங்களை ஜூலை 11-ஆம் தேதிக்குள் சமர்ப்பிக்க வேண்டும். தர வரிசைப் பட்டியல் ஜூலை 21-ஆம் தேதி வெளியிடப்படும்.

சட்டப் படிப்புகளுக்காக நிர்ணயிக்கப்பட்டுள்ள கட்டணங்கள்
************************************************************************************************
தமிழகத்திலுள்ள அரசு சட்டக் கல்லூரிகளில் 5 ஆண்டுகளுக்கான பி.ஏ. பி.எல்., பட்டப் படிப்பில் சேர தேர்ந்தெடுக்கப்படும் மாணவர்கள், 1,625-ரூபாயை ரொக்கமாக செலுத்தவேண்டும். கவுன்சலிங்கிற்குப் பிறகு, ஓராண்டுக்கான அட்மிஷன் கட்டணமாக ரூ.1,205 செலுத்த வேண்டும்.

3 ஆண்டுகளுக்கான பி.எல். பட்டப் படிப்பில் சேர தேர்ந்தெடுக்கப்படும் மாணவர்கள், கவுன்சலிங்கின்போது 1,520- ரூபாயை ரொக்கமாகச் செலுத்த வேண்டும். அட்மிஷனின்போது ரூ.1,205-ஐ ரொக்கமாகச் செலுத்த வேண்டும்.

ஓராண்டிற்கான கட்டணம் இவை மட்டுமே. மிகக் குறைந்த கட்டணத்தில் சட்டப் படிப்பை வழங்கும் சட்டக் கல்லூரிகள் தமிழகத்தில் மட்டுமே உள்ளன.

5 ஆண்டுகளுக்கான பி.ஏ., பி.எல் (ஆனர்ஸ்), பி.காம்., பி.எல். (ஆனர்ஸ்), 3 ஆண்டு பி.எல். (ஆனர்ஸ்) படிப்புகளுக்குக் கட்டணமாக ஆண்டுக்கு தலா ரூ.65,620 நிர்ணயிக்கப்பட்டுள்ளது. இதில் அட்மிஷன் கட்டணம், டியூஷன் கட்டணம், இன்டர்நெட் கட்டணம் உள்ளிட்ட பல்வேறு கட்டணங்கள் அடங்கும்.

அரசு சட்டக் கல்லூரிகளில் உள்ள மற்ற சட்டப் படிப்புகள்
******************************************************************************************
அம்பேத்கர் சட்டப் பல்கலைக்கழகத்தில் முதுநிலை சட்டப் படிப்பில், அதாவது எம்.எல். பட்டப் படிப்பில் 8 பிரிவுகள் உள்ளன. ஒவ்வொரு பிரிவிலும் 20 மாணவர்கள் சேர்த்துக் கொள்ளப்படுகிறார்கள். வணிகச் சட்டம் (பிஸினஸ் லா), அரசியலமைப்புச் சட்டம் மற்றும் மனித உரிமைகள் சட்டம் (கான்ஸ்டிடியூஷனல் லா அண்ட் ஹியூமன் ரைட்ஸ்), அறிவுசார் சொத்துரிமைச் சட்டம் (இன்டலக்ச்சுவல் புராப்பர்டி லா), சர்வதேசச் சட்டம் மற்றும் அமைப்பு (இன்டர்நேஷனல் லா அண்ட் ஆர்கனைசேஷன்), சுற்றுச்சூழல் சட்டம் மற்றும் லீகல் ஆர்டர், கிரிமினல் சட்டம் மற்றும் கிரிமினல் ஜஸ்டிஸ் அட்மினிஸ்டிரேஷன், லேபர் லா அண்ட் அட்மினிஸ்டிரேட்டிவ் லா, ஹியூமன் ரைட்ஸ் அண்ட் டியூட்டீஸ் எஜுகேஷன் போன்ற பல பிரிவுகளில் முதுநிலை சட்டப் படிப்புகள் உள்ளன. இப்படிப்புகளுக்கான விண்ணப்ப விநியோகம் மே 26-ஆம் தேதி தொடங்கும். பூர்த்தி செய்யப்பட்ட விண்ணப்பங்களை ஆகஸ்ட் 8-ஆம் தேதிக்குள் சமர்ப்பிக்க வேண்டும். தர வரிசைப் பட்டியல் ஆகஸ்ட் 31-ஆம் தேதி வெளியிடப்படும்.

இவை தவிர, சட்டத்தில் பிஎச்டி படிக்கலாம். தொலை நிலைக் கல்வி முறையில் 11 வகையான முதுநிலை பட்ட டிப்ளமோ (பிஜி டிப்ளமோ) படிப்புகளையும், டாக்குமெண்டேஷனில் சான்றிதழ் படிப்பு ஒன்றையும் வழங்குகிறோம். பிஸினஸ் லா, என்விரான் மெண்டல் லா, இன்ஃபர்மேஷன் டெக்னாலஜி லா, இன்டலக்ச்சுவல் பிராப்பர்ட்டி லா, லேபர் லா, ஹியூமன் ரைட்ஸ் அண்ட் டியூட்டீஸ் எஜூகேஷன், லா லைஃப் ரேரியன்ஷிப், கன்ஸ்யூமர் லா அண்ட் புரடக்ஷன்,சைபர் ஃபோரன்சிக் அன்ட் இன்டர்நெட் செக்யூரிட்டி, கிரிமினல் லா, கிரிமினாலஜி அண்ட் ஃபோரன்சிக் சயின்ஸ், மெடிக்கோ - லீகல் ஆஸ்பெக்ட்ஸ் போன்ற 11 பிரிவுகளில் முதுநிலை பட்ட டிப்ளமோ படிப்புகள் உள்ளன. இப்படிப்புகளுக்கான விண்ணப்பங்கள் மே 26-ஆம் தேதி தொடங்கும். பூர்த்தி செய்யப்பட்ட விண்ணப்பங்களை ஆகஸ்ட் 8-ஆம் தேதி அனுப்ப வேண்டும்.

சட்டப் படிப்பு முடித்தவர்களுக்கு வேலைவாய்ப்புகள்
***************************************************************************************
சட்டப் படிப்பு படித்தவர்களுக்கு வானமே எல்லை. உலகில் இதுவரை மூன்று வகையான புரட்சிகள் ஏற்பட்டிருக்கின்றன. ஒன்று, விவசாயப் புரட்சி, இரண்டாவது தொழிற்புரட்சி, மூன்றாவது பணிப் புரட்சி. பணிப் புரட்சியில் சர்வீஸ் செக்டார் எனப்படும் சேவைகள் பிரிவுக்கு மிகப் பெரிய வாய்ப்பு காத்திருக்கிறது. 

உலகிலேயே இளைஞர்களின் எண்ணிக்கை அதிகம் உள்ள நாடுகளில் இரண்டாவது இடத்தில் இருக்கிறது இந்தியா. பணிப் புரட்சிக்கு இளைஞர்களின் பங்களிப்பு குறிப்பிடத்தக்க வகையில் உள்ளது. இந்த சர்வீஸ் செக்டாரில், சட்ட சேவை மிக மிக முக்கிய இடத்தை வகிக்கிறது. அதாவது, லீகல் புராசஸ் அவுட்சோர்ஸ் மற்றும் நாலெட்ஜ் புராசஸ் அவுட்சோர்ஸ் போன்ற பணிகளிலும் சட்டம் படித்தவர்களுக்கு வேலை கிடைக்கும். சென்னை உயர் நீதிமன்றம் மற்றும் உச்ச நீதிமன்றம் நீங்கலாக அனைத்து மாவட்ட நீதிமன்றங்களிலும் தமிழிலேயே வழக்குகள் நடைபெறுகின்றன.

சட்டப் படிப்பை முடித்துவிட்டு, பார் கவுன்சில் ஆஃப் இந்தியாவில் பதிவு செய்து கொள்பவர்கள், வழக்குரைஞர்களாக நீதிமன்றங்களில் வாதாடலாம். வழக்குரைஞராகப் பணியாற்ற விரும்பாதவர்கள், சட்ட நுணுக்கங்களை நன்கு அறிந்துகொண்டு வழக்கறிஞர்களாகி, மற்றவர்களுக்கு சட்ட சேவை புரியலாம். 

பல்வேறு கம்பெனிகளுக்கு சட்ட ஆலோசகர்களாகப் பணியாற்றலாம். சட்டம் படித்துவிட்டு, யுஜிசி நெட் தேர்வு எழுதி, சட்டக் கல்லூரிகளில் ஆசிரியர்களாகப் பணியாற்றலாம். 

பி.எல். படித்தவர்கள், கீழமை நீதிமன்றங்களுக்கான நீதிபதிகளாகப் பணியாற்ற, சிவில் சர்வீஸ் பயிற்சி பெறலாம். லீகல் ஜர்னலிசம், லீகல் டூரிஸம் என்று சட்டம் நுழையாத துறையே இல்லை. சட்டத்தைத் தெளிவாக அறிந்துகொண்டு, முனைப்போடும், முறையான பயிற்சியோடும், ஆக்கப்பூர்வமாகச் செயல்படுபவர்களுக்கு வெற்றி நிச்சயம்.

மேலும் விபரங்களுக்கு http://www.tndalu.ac.in என்ற இணையதளத்தை பார்வையிடவும்.

பசுமை வீடு கட்டும் திட்டம்

பசுமை வீடு கட்டும் திட்டத்தில் பயன்பெற என்ன செய்ய வேண்டும்?

*********************************************************************************

பசுமை வீடு திட்டம்

1. இத்திட்டத்தின் சிறப்பம்சங்கள்
2. பயனாளிகளின் தகுதிகள்
3. பயனாளிகள் தேர்வு செய்யும் முறை
4. அலைபேசி அடிப்படையிலான கண்காணித்தல் மற்றும் தொகை விடுவித்தல்
5. அலைபேசி அடிப்படையிலான ஆன்லைன் கண்காணிப்பு
6. அலைபேசி அடிப்படையிலான மதிப்பீட்டுச் சான்றிதழ் மற்றும் நிதி மேலாண்மை
7. அலைபேசி அடிப்படையிலான ஆன்லைன் கண்காணித்தல் முறையின் அனுகூலங்கள்

ஏழைகளின் வீடுகளுக்கான தேவையை நிறைவு செய்யும் முதலமைச்சரின் சூரிய மின்சக்தியுடன் கூடிய பசுமை வீடு திட்டம் தமிழக அரசின் முன்னோடி திட்டம் ஆகும். நமது நாட்டிலேயே 300 சதுர அடி பரப்பளவில் சூரிய மின்சக்தி விளக்குகளுடன் கூடிய வீடுகள் வழங்குவது இதுவே முதன் முறையாகும்.

இத்திட்டத்தின் சிறப்பம்சங்கள்

1. ஊரகப் பகுதிகளில் வறுமைக்கோட்டிற்கு கீழ் வாழும்மக்கள் அனைவரும்
  சூரிய மின்சக்தியுடன் கூடிய பசுமை வீடுகள் பெற தகுதியானவர்கள்.

2. ஒவ்வொரு வீடும் 300 சதுர அடி பரப்பளவில், ரூ.2.10 இலட்சம் அலகுத்   தொகையுடன் மாநில அரசின் முழு நிதி உதவியுடன் கட்டப்படுகிறது.

3. ஒவ்வொரு வீடும், வசிக்கும் அறை, படுக்கை அறை, சமையல் அறை, கழிப்பறை மற்றும் தாழ்வாரம் ஆகியவசதிகள் மற்றும் மழைநீர் சேகரிப்பு அமைப்புடன் கட்டப்படுகிறது.

4. ஒவ்வொரு வீட்டிலும் சூரிய ஒளி சக்தியில் எரியும் அடர்குறு விளக்குகள் (5) அமைக்கப்படும். இவை படுக்கை அறை, வசிக்கும் அறை, சமையல்அறை, கழிப்பறை மற்றும் தாழ்வாரம் ஆகிய பகுதிகளில் ஒரு விளக்கு வீதம் அமைக்கப்படும். 

5. பயனாளிகளின் விருப்பத்தின்படி தமிழ்நாடு மின்சார வாரியத்திலிருந்து மின் இணைப்பு பெறும் விருப்பத்திற்கும் வழிவகை செய்யப்பட்டுள்ளது.

6. வீடுகள் கட்டும் பணி ஊரக வளர்ச்சி மற்றும் ஊராட்சித் துறையிடம் ஒப்படைக்கப்பட்டுள்ளது. 110 சூரிய சக்தி விளக்குகள் அமைக்கும் பணியை தமிழ்நாடு எரிசக்தி மேம்பாட்டு முகமை செயல்படுத்தும்.

7. பசுமை வீடுகள், பயனாளிகளின் குடியிருப்பு அமைந்துள்ள இடம் (அவன்/அவளின் வசிப்பிடத்தை மாற்றியமைத்து) அல்லது கிராம ஊராட்சியின் பிற பகுதியில் அமைந்துள்ள பயனாளிக்குச் சொந்தமான இடங்களில் கட்டித்தரப்படும். 

8. மேலும், இத்திட்டத்தின் கீழ் வீடுகள் கட்டப்படுவதற்கென நில எடுப்புகள் ஏதும் செய்யப்படமாட்டாது. வீட்டுமனைப் பட்டா அல்லது சரியான நில உரிமை உள்ளவர்கள் மட்டுமே இத்திட்டத்தின் கீழ் வீடு பெறத் தகுதியானவர்கள் ஆவார்கள்.

பயனாளிகளின் தகுதிகள்

1. சம்மந்தப்பட்ட கிராம ஊராட்சியில் வசிப்பவராக இருக்க வேண்டும்.

2. சம்மந்தப்பட்ட கிராம ஊராட்சியில் உள்ள வறுமைக் கோட்டிற்குக் கீழ் உள்ளவர்களின் நிரந்தர காத்திருப்போர் பட்டியலில் இடம் பெற்றிருக்க வேண்டும்.

3. 300 சதுர அடிக்கு குறையாத வீட்டு மனை இடத்திற்கு சொந்தக்காரராக இருக்க வேண்டும்.

4. குடும்பத் தலைவரின் பெயரிலோ அல்லது குடும்ப உறுப்பினரில் எவரேனும் ஒருவர் பெயரிலோ வில்லங்கமற்ற வீட்டுமனைப் பட்டா இருக்க வேண்டும்.

5. தொடர்புடைய கிராம ஊராட்சியில் அல்லது வேறு எங்கும் கான்கிரீட் கூரை போடப்பட்ட சொந்த வீடு எதுவும் இருக்கக் கூடாது.

6. அரசின் இதர வீடு கட்டும் திட்டங்களில் பயன்பெற்றவராக இருக்கக் கூடாது.

பயனாளிகள் தேர்வு செய்யும் முறை

1. ஒவ்வொரு கிராம ஊராட்சிக்கும் வறுமைக் கோட்டிற்குக் கீழ் உள்ளோரின் நிரந்தர காத்திருப்புப் பட்டியல் தயாரிக்கப்பட்டு, அதில் மிகவும் வறிய நிலையில் உள்ளோர் தேர்வு செய்யப்பட வேண்டும்.

2. மொத்தம் 60,000 வீடுகளில் 17,400 வீடுகள் அதாவது 29 விழுக்காடு ஆதி திராவிடர்களுக்கும், 600 வீடுகள் அதாவது 1 விழுக்காடு பழங்குடியினர்களுக்கும் மீதமுள்ள 42,000 வீடுகள் அதாவது 70 விழுக்காடு இதர இனங்களுக்கும் (ஆதிதிராவிடர், பழங்குடியினர் அல்லாதோர்) வறுமை கோட்டிற்கு கீழ் உள்ள கிராமப்புற மக்களுக்கு வழங்கப்படவேண்டும்.

3. மாவட்ட வாரியான ஒதுக்கீட்டில் 3 விழுக்காடு மாற்றுதிறனாளிகளுக்காக ஒதுக்கீடு செய்யப்படவேண்டும்.

4. பயனாளிகள் பட்டியல் தயாரிக்கப்படும் போது,மாற்றுத் திறனாளிகள், விதவைகள், ஆதரவற்றமற்றும் கணவனால் கைவிடப்பட்ட பெண்கள், பெண்களைத் தலைவராகக் கொண்ட குடும்பங்கள்,முன்னாள் இராணுவத்தினர் மற்றும் முன்னாள் துணை இராணுவப் படையினர் துறையினரால் அடையாளம் காணப்பட்ட கிராமப் பகுதிகளில் வாழும் ஊட்டச்சத்து குறைவினால் பாதிக்கப்பட்ட குழந்தைகளை கொண்ட
குடும்பங்கள், திருநங்கைகள், ஆகிய நோய்களால் பாதிக்கப்பட்டு, துணை இயக்குநர் (மருத்துவப் பணிகள்) சான்றிதழ் பெற்றவர்கள், வெள்ளம், தீ விபத்து போன்ற இயற்கை இடர்பாடுகளால் பாதிக்கப்பட்டோர் ஆகியோருக்கு முன்னுரிமை அளிக்கப்படவேண்டும். மேலும், மனநலம் குன்றியோர் உள்ள குடும்பங்களுக்கும் முன்னுரிமை அளிக்கப்படவேண்டும்.

5. தகுதியுள்ள ஏழை ஒருவரின் பெயர் வறுமைக் கோட்டிற்குக் கீழ் உள்ளோர் பட்டியலில் விடுபட்டிருப்பின், விடுபட்ட நபர் வட்டார வளர்ச்சி அலுவலருக்கு விண்ணப்பிக்கலாம். ஊரக வளர்ச்சி மற்றும் ஊராட்சித் துறையில் உதவி இயக்குநர் நிலையில் உள்ள அலுவலர், விவரங்களை சரிபார்த்து மாவட்ட ஆட்சியரின் இசைவுடன் அவரது பெயரை பட்டியலில் இடம்பெற செய்து அதனை கிராமசபையில் வைத்து ஒப்புதல் பெறவேண்டும். அவ்வாறு பெயர் சேர்க்கப்படும் நிகழ்வில், அவரது பெயரானது நிரந்தர காத்திருப்போர் பட்டியலில் ஒரு பகுதியாக்கப்பட்டு பயனாளி தேர்வுக்கு கருத்தில் கொள்ளப்படும்.

6. கிராம ஊராட்சிகள் வறுமைக் கோட்டிற்குக் கீழ் இருக்கும் தகுதியுள்ள பயனாளிகளின் பட்டியலை தயார் செய்து கிராம சபையின் ஒப்புதலுக்காக வைக்கவேண்டும். பயனாளிகள் தேர்வு, வீடுகள் ஒதுக்கீடு, கட்டுமானப் பொருட்கள் விநியோகம் மற்றும் இத்திட்டம் தொடர்பான நடைமுறைபடுத்தப்படும்.

அலைபேசி அடிப்படையிலான கண்காணித்தல் மற்றும் 

தொகை விடுவித்தல்

1. தற்பொழுது ஒன்றிய பொறியாளர்களால் மதிப்பீட்டு சான்றிதழ் தயார் செய்வதற்கும் பயனாளி காசோலை பெறுதற்கும் இடையே குறிப்பிட்ட காலதாமதம் ஏற்படுகிறது. அது மட்டுமில்லாமல் நிதி விடுவிப்பு, பணிமுன்னேற்றத்துடன் தொடர்பு படுத்தப்படாமல் இருப்பதால் ஒரு சில ஊராட்சிகளில் நிதி தேக்கமடைந்த நிலையிலும் மற்றும் வேறு சில ஊராட்சிகளில் நிதி பற்றாக்குறையாகவும்  உள்ளது. இந்நிலைகளிலிருந்து விடுபட, ஆன்லைன் நேரடிகண்காணித்தல் மற்றும் நிதி மேலாண்மை முறை என்ற ஒரு புதிய முறை 2014-15 முதல் அறிமுகப்படுத்தப்பட உள்ளது. திறனான கணிப்பாய்வு மற்றும் மேலாண்மை முறை மற்றும் பயனாளிகளுக்கு விரைவாக பட்டியல் தொகையை அளிக்கும் பொருட்டும் பின்வரும் முறையில் பட்டியல் தயாரிப்பு மற்றும் நிதி மேலாண்மை 2014-15ம் ஆண்டு முதல் அமல்படுத்தப்பட உள்ளது

2. ஒவ்வொரு நிதியாண்டும் ஊரக வளர்ச்சி மற்றும் ஊராட்சி இயக்குனர் ஒவ்வொரு மாவட்டத்திற்கான வீடுகளின் எண்ணிக்கையை நிர்ணயம் செய்வார்.

3. மாவட்ட ஊரக வளர்ச்சி முகமை, கிராம ஊராட்சிகளின் தேவையின் அடிப்படையில் அவற்றிற்கு வீடுகளை ஒதுக்கீடு செய்யும்.

4. வட்டார வளர்ச்சி அலுவலர் (கி.ஊ), துணை வட்டாரவளர்ச்சி அலுவலர் மற்றும் ஊராட்சி மன்றத் தலைவர் ஆகியோர் அடங்கிய குழு வழிகாட்டு நெறிமுறைகளின்படி உண்மையாக வறுமைகோட்டிற்கு கீழ் உள்ள பயனாளிகளை தேர்ந்தெடுத்து அப்பயனாளிகளின் பட்டியலை கிராம சபையின் முன் வைத்து ஒப்புதலைப் பெற வேண்டும்.

5. வட்டார வளர்ச்சி அலுவலர் (வ.ஊ) பயனாளியின் தகுதி, வீடு கட்ட தேவையான இடத்தின் நில உரிமை மற்றும் அளவு ஆகியவற்றை ஊரக வளர்ச்சி மற்றும் ஊராட்சித் துறை அலுவலர்களைக் கொண்டு ஆய்வு செய்து தகுதியிருப்பின் அப்பயனாளிக்கு பணி ஆணையினை வழங்கவேண்டும்.

6. பணி ஆணை வழங்கும் நேரத்தில், பயனாளியின் வங்கி கணக்கு சம்பந்தப்பட்ட விவரங்கள் அதாவது வங்கியின் பெயர், வங்கி கிளையின் பெயர், வங்கி கணக்கு எண், வங்கியின் ஐகுளுஊ குறியீட்டு எண் ஆகிய அனைத்தும் சேகரிக்கப்பட்டு பணி ஆணையில் குறிப்பிடப்படும். பயனாளியின் வங்கி கணக்கு குறித்த விவரங்கள் மகாத்மா காந்தி தேசிய ஊரக வேலை உறுதித் திட்டத்தின் கீழ் கணக்குகளில் செய்யப்பட்டுள்ளதுபோல் துணை வட்டார வளர்ச்சி அலுவலர் நிலையிலான அலுவலரால் சரிபார்க்கப்பட வேண்டும். பயனாளியின் மகாத்மா காந்தி தேசிய ஊரக வேலை உறுதித் திட்டம், முதியோர் உதவித் திட்டம் அல்லது இதர வங்கிக் கணக்குகளை இந்த நோக்கத்திற்காக பயன்படுத்திக் கொள்ளப்பட வேண்டும். பயனாளிக்கு, வங்கியில் கணக்கு இல்லை எனில் ஒரு வங்கியில் புதிய கணக்குதுவங்கப்பட வேண்டும். ஆன்லைனில் உருவாக்கப்பட்ட பணி ஆணையினை பயனாளிக்கு வழங்கப்பட வேண்டும். மேலும் மேல் நடவடிக்கைக்காக இந்த பணி ஆணையின் நகல் பணி மேற்பார்வையாளர் மற்றும் உதவிப் பொறியாளருக்கு அனுப்பப்படவேண்டும்.

அலைபேசி அடிப்படையிலான ஆன்லைன் கண்காணிப்பு

1. பயனாளிகளின் வங்கி கணக்கு குறித்த விவரங்கள், பணி உருவாக்கத்தின் போதே ஒன்றிய அளவில் ஆன்லைன் திட்ட கண்காணித்தலில் நிரப்பப்படும்.

2. ஒன்றிய மேற்பார்வையாளர் / ஒன்றிய பொறியாளர் மற்றும் துணை வட்டார வளர்ச்சி அலுவலர் பணி இடத்தை குறியீடு செய்யும்போதே, வீட்டின் கட்டுமானத்தின் வெவ்வேறு கூறுகள் பற்றியும், வீடு கட்டுதலில் கட்டுமானப் பொருட்கள் மற்றும் பட்டியல் வழங்குதல் உள்ளிட்ட துறையின் பங்கு மற்றும் பயனாளியின் பங்களிப்பு குறித்தும் அவர்களுக்கு விழிப்புணர்வு ஏற்படுத்த வேண்டும்.

3.. இந்த ஆன்லைன் கண்காணித்தல் முறையானது, ஒன்றிய மேற்பார்வையாளர் மற்றும் உதவி பொறியாளரிடம் உள்ள ஸ்மார்ட் தொலைபேசியில் பதிவு செய்யப்பட்ட அலைபேசி மென்பொருள் (நேரடி கண்காணிப்பு முறை) இணைக்கப்பட்டிருக்கும். இம்முறையை பயன்படுத்தி, வீட்டின் முன்னேற்றத்தினை தளத்திலிருந்து நேரடியாகவே, புகைப்படம் மற்றும் புவியமைப்பு கூறுகளுடன் (அட்ச-தீர்க்க ரேகை) பதிவு செய்ய முடியும். இது தொகை வழங்குதலுக்கு அடிப்படையாக அமையும். (சென்னை தேசிய தகவல் மையம் சாலைப்பணிகளின் முன்னேற்றத்தை பதிவு செய்ய ஏற்கனவே ஸ்மார்ட் தொலைபேசி பயன்பாடு முறையை வடிவமைத்துள்ளது)

4. பணி இடத்தினை குறியீடு செய்த பிறகு, ஒன்றிய மேற்பார்வையாளர் / ஒன்றிய பொறியாளர் தன்னிடமுள்ள ழுஞளு பொருத்தப்பட்ட ஸ்மார்ட் அலைபேசியைக் கொண்டு வீடு கட்டப்படவுள்ள  இடத்தை புகைப்படம் எடுப்பார். இப்புகைப்படமானது 10 மீட்டர் தொலைவிற்குள் அதாவது வீட்டினை முழுமையாக பார்க்கும் அளவிற்கு எடுக்கப்பட வேண்டும். இந்த புகைப்படம் """"ஆன்லைன் திட்ட கண்காணித்தல் முறையில்"" புவியமைப்பு கூறுகளுடன் பதிவு செய்யப்பட்டு, குறிப்பிட்ட அப்பயனாளிகளுக்கு நிலை வாரியான தொகை விடுவித்தலுக்கு அடிப்படை ஆதாரமாகப் பயன்படுத்தப்படும்.

5. வீடு கட்டுமானத்தில் தரைமட்ட நிலை முடிந்த பிறகு, மேற்பார்வையாளர்/ஒன்றிய பொறியாளர் தள குறியீட்டின் போது எவ்விடத்தில் நின்று புகைப்படத்தினை எடுத்தாரோ முடிந்தவரை அவ்விடத்திலேயே நின்று மற்றொரு புகைப்படத்தை எடுக்க வேண்டும்.

6. மேற்பார்வையாளர்/ஒன்றிய பொறியாளர் பணி தளத்திலிருந்தே பணியின் நிலையினையும், புகைப்படத்துடன் கூடிய வீட்டின் நிலையினையும் ஆன்லைன் திட்ட கண்காணித்தல் முறையில் பதிவு செய்ய வேண்டும். புவியமைப்பு கூறுகள் மூலம் எடுக்கப்பட்ட புகைப்படம், வீடு குறிப்பிட்ட எந்த பயனாளியுடையது என்பதை சரிபார்க்க உதவுகிறது.

அலைபேசி அடிப்படையிலான மதிப்பீட்டுச் சான்றிதழ் மற்றும் 

நிதி மேலாண்மை

1. ஒப்புதல் அளிக்கப்பட்ட மதிப்பீட்டு சான்றிதழ் மற்றும் தொகை விடுவித்தலுக்கான குறிப்பாணையுடன் கூடிய பட்டியல் தொகுதி ஊரக வளர்ச்சி வலைதளத்தில் உருவாக்கப்படும். இவற்றை அலைபேசி பயன்பாடு மற்றும் ஏற்கனவே உருவாக்கப்பட்டுள்ள ஆன்லைன் திட்ட கண்காணித்தலுடன் இணைக்கப்படுவதின் மூலம்,  எப்பொழுதெல்லாம் வீட்டின் பணி முன்னேற்றம் அலைபேசியில் பதிவு செய்யப்பட்டு புவியியல் கூறுகளுடன் கூடிய புகைப்படத்துடன் சான்றுரைக்கப்படுகிறதோ, அப்பொழுதெல்லாம் நிலைவாரியான மதிப்பீடு சான்றிதழ் மற்றும் தொகை தானியங்கி முறையில் உருவாகும் பொருட்டு அமைக்கப்பட்டுள்ளது.

2. தற்போது உதவிப் பொறியாளர் குறிப்பிட்டுள்ள பயனாளிக்கான குறிப்பிட்ட நிலைக்கான ஆன்லைன் மதிப்பீட்டு சான்றிதழை, புகைப்படத்துடன் உருவாக்க முடியும். இந்த மதிப்பீட்டு சான்றிதழ், ஆய்வு செய்யும் அதிகாரியான உதவி செயற் பொறியாளரின் ஒப்புதலைப் பெற்ற பிறகு ஆன்லைன் திட்ட கண்காணித்தல் முறை மூலம் வட்டார வளர்ச்சி அலுவலர் (வ.ஊ) க்கு அனுப்பப்படும்.

3. இந்த மதிப்பீட்டு சான்றிதழின் ஒரு நகல் உதவிப்பொறியாளரால் ஆன்லைன் கண்காணிப்பு தளத்திலிருந்து பதிவிறக்கம் செய்யப்பட்டு, உதவி செயற்பொறியாளரின் கையொப்பத்துடன், அலுவலகத்தில் ஆவணப்படுத்தலுக்கு சமர்ப்பிக்கப்படும்.

4. வீட்டின் அடித்தள நிலையில், தொகை விடுவிக்க வேண்டுமெனில் அந்நிலையில் வீட்டின் புகைப்படம் பதிவு செய்யப்பட வேண்டும். தொடர்புடைய அலுவலர் ஊரக வளர்ச்சித் துறை வலைதளத்தினுள் சென்று, ஏற்கனவே பதிவேற்றம் செய்யப்பட்டுள்ள மதிப்பீட்டுச் சான்றிதழை நகல் எடுத்து, கையொப்பமிட்டு மேல் நடவடிக்கை எடுக்கும் பொருட்டு அலுவலகத்தில் சமர்ப்பிக்க வேண்டும்.

5. உதவிப் பொறியாளர் / உதவிச் செயற் பொறியாளரிடமிருந்து மதிப்பீட்டுச் சான்றிதழை பெற்ற பிறகு தொடர்புடைய உதவியாளர் / கணக்காளர்/ துணை வட்டார வளர்ச்சி அலுவலர் ஊரக வளர்ச்சித் துறை வலைதளத்தினுள் சென்று குறிப்பிட்ட அந்த வீட்டிற்கான தொகை விடுவித்தலுக்கான குறிப்பாணையை உருவாக்கி கோப்பினை தயாரித்து, பட்டியலை வட்டார வளர்ச்சி அலுவலர் (வ.ஊ) க்கு வைக்க வேண்டும்.

6. வட்டார வளர்ச்சி அலுவலர் (வ.ஊ) சிமெண்ட், கம்பி உள்ளிட்ட பயனாளிக்கு வழங்கப்பட்ட கட்டுமானப் பொருட்களுக்கான தொகை ஏதேனும் இருப்பின் அதனை கழித்த பிறகு பட்டியலை அனுமதிக்க வேண்டும். தேவையான பதிவுகளை மதிப்பீட்டு ஒதுக்கீடு புத்தகம் மற்றும் தொடர்புடைய திட்ட ரொக்க புத்தகத்தில் பதிவு செய்தபிறகு, அந்த பட்டியல் மற்றும் தொகை விடுவித்தலுக்கான குறிப்பாணையை பயனாளிக்கு தொகை வழங்கும் பொருட்டு தொடர்புடைய கிராம ஊராட்சியின் தலைவருக்கு அனுப்ப வேண்டும். 121 பட்டியல் மற்றும் தொகை வழங்குதலுக்கான குறிப்பாணையை பெற்ற பிறகு கிராம ஊராட்சியின் தலைவர், நடைமுறையில் உள்ள வழிமுறைகளை பின்பற்றி, தொடர்புடைய பயனாளிக்கு தொகையை வழங்க வேண்டும்.

அலைபேசி அடிப்படையிலான 

ஆன்லைன் கண்காணித்தல் முறையின் அனுகூலங்கள்

1. அலைபேசி அடிப்படையிலான ஆன்லைன் கண்காணித்தல் முறையின் மூலம், பணி ஆணை வழங்குதல், மதிப்பீட்டு சான்றிதழ் தயாரித்தல் மற்றும் பயனாளிகளுக்கு தொகை வழங்குதல் ஆகியவற்றிற்கான கால அளவு குறைகிறது.

2. மேலும், ஒவ்வொரு நிலையின் போதும் புகைப்படங்கள் பதிவு செய்யப்படுவதால், ஒன்றிய, மாவட்ட மற்றும் மாநில அளவிலான அதிகாரிகள், திட்டத்தை நுண்ணிய முறையில் கண்காணித்தலுக்கு உதவுவதுடன் வீடுகளின் பணி முன்னேற்றத்தை துரிதப்படுத்தவும் உதவுகிறது.

ஆதாரம் : தமிழ்நாடு அரசு ஊராக வளர்ச்சித்துறை

சீராய்வு மனு என்றால் என்ன?

சீராய்வு மனு என்றால் என்ன?

சீராய்வு மனு உத்தரவு நகல் கிடைத்த 30 நாட்களுக்குள் தாக்கல் செய்ய வேண்டும்.

************************************************* அன்புடன் செல்வம் பழனிச்சாமி - 13.05.2018       

கேவியட் மனு தாக்கல்

கேவியட் மனு தாக்கல் செய்வதில் உள்ள நடைமுறை

**************************************************************

மாவட்ட  உரிமையியல் நீதிமன்றத்தில் இருந்து உயர்நீதிமன்றம் வரையில்  (Caveat Petition) கேவியட் மனு படிவம் ஒரே மாதியானதாகவே இருக்கும்.

நபர் ஒருவருக்கு எதிராக, மற்றொரு நபர்  மாவட்ட உரிமையியல் நீதிமன்றத்திலோ

 ( District Munisif Court),  மாவட்ட உரிமையியல் நீதித்துறை நடுவர் மன்றத்திலோ

 ( District Munisif Cum Magistrate Court), சார்பு நீதிமன்றத்திலோ (Sub Court) , மாவட்ட நீதிமன்றத்திலோ (District Court), உயர்நீதிமன்றத்திலோ (High Court),  தடையாணை (Stay Order) அல்லது உறுத்துக்கட்டளை (Injection Order) யை அவசரத்தன்மையுடன் (Emergent Petition) அறிவிப்புக் கொடுக்காமல் பெற்றிடுவத்ற்கு வாய்ப்புண்டு என்று கருதிடும் சூழ்நிலையில் நபர் ஒருவர் கேவியட் மனுவை தாக்கல் செய்யலாம்.

மேல்முறையீட்டுக் காலங்களிலும்  கேவியட் மனுவை தாக்கல் செய்யலாம். அதற்கான படிவமும் இதே மாதிரியானதாகும்.

கேவியட் மனுவை அவசரத்தன்மையுடனோ அல்லது சாதாரண நிலையிலோ தாக்கல் செய்யலாம். 

அவசரத்தன்மையுடன் தாக்கல் செய்யப்படும் கேவியட் மனுவை, அவசரத்தன்மை மனு மற்றும் அபிடவிட்டுடன் இணைத்துத் தாக்கல் செய்ய வேண்டும். சாதாரணமாக தாக்கல் செய்யப்படும் கேவியட் மனுவுக்கு அவசரத்தன்மை மனு மற்றும் அபிடவிட்டை இணைத்துத் தாக்கல் செய்ய வேண்டியதில்லை.

கேவியட் மனுவை அவசரத்தன்மை மனுவுடன் கொடுத்தால் மனு சரியாக இருக்கும் பட்சத்தில் நீதிமன்றத்தில் அன்றைய தினமே எண் கொடுத்து விடுவார்கள்.

  

கேவியட் மனுவை சாதாரணமாக தாக்கல் செய்தால், அடுத்தடுத்த நாட்களில்தான் எண் கொடுப்பார்கள்.

கேவியட் மனுசாதாரணமாக தாக்கல் செய்யப்பட்டிருக்கும்போது, அந்த மனுவில் எண் கொடுப்பதற்கு முன்னர், நபர்கள் எவரும் தமது வழக்கை அவசரத்தன்மையுடன் தாக்கல் செய்து தடையாணை அல்லது உறுத்துக் கட்டளையைப் பெற்றிட முடியும்.

கேவியட் மனுவை நீதிமன்றத்தில் தாக்கல் செய்வதற்கு முன்னர், அசல் மனுவில் மனுதாரரிடம் கையொப்பத்தைப் பெறுதல் வேண்டும். நகலின் மனுதாரரின் மையொப்பத்தைப் பெறுதல் கூடாது. நகலில் உண்மை நகல் அல்லது T.C (True Copy) என்று குறிப்பிட்டு மனுதாரரின் வழக்கறிஞர் மட்டும் கையொப்பம் இட்டால் போதுமானதாகும். ஆனல், அசல் கேவியட் மனுவில் மனுதாரரும், வழக்கறிஞரும் கையொப்பம் இடுதல் வேண்டும். கேவியட் மனுவில் ரூ.10/-க்கான நீதிமன்ற கட்டண முத்திரை வில்லை ஒட்டப்படுதல் வேண்டும்.

கேவியட் மனுவின் நகல் ஒன்றை எதிர் மனுதாரருக்கு மனுதாரரின் வழக்கறிஞர் பதிவு அஞ்சலில் ஒப்புகை அட்டை இணைப்புடன் அனுப்பி வைத்தல் வேண்டும். பதிவு அஞ்சல் உறை மற்றும் ஒப்புகை அட்டையின் பெறுநர் முகவரியில் எதிர்மனுதாரரின் முகவரியையும், அனுப்புனர் முகவரியில் மனுதாரரின் வழக்கறிஞரின் முகவரியையும் குறிப்பிடுதல் வேண்டும்.

கேவியட் மனுவின் நகலை எதிர்மனுதாரருக்கு அனுப்பி வைத்த பின்பே கேவியட் அசல் மனுவை நீதிமன்றத்தில் தக்கல் செய்ய வேண்டும்.

கேவியட் மனு, அவசரத்தன்மையுடன் தாக்கல் செய்யப்படும்போது,  அதில்

1.  கேவியட் அசல் மனு (Caveat Original Petition)

2. எதிர்மனுதாரருக்குப் பதிவுத்தபாலில் கேவியட் மனுவின் நகலை அனுப்பியதற்குச் 

     சான்றாதாரமாக உள்ள அஞ்சல் பற்றுச் சீட்டு (Postal Receipt)

3. வழக்குரைக்கும் அதிகார ஆவணம் (Vakalat)

4. அவசரத்தன்மை மனு (Emergent Petition) 

5. அபிடவிட் (Affidavit)

ஆகியவற்றைத் திறந்த நீதிமன்றத்தில் (Open Court) நீதிபதியிடம் கொடுத்தல் வேண்டும்.

 கேவியட் மனுவை சாதாரண முறையில் தாக்கல் செய்திடும்போது,  அதில்

1. கேவியட் அசல் மனு  (Caveat Original Petition)

2.வழக்குரைக்கும் அதிகார ஆவணம் (Vakalat)

3. எதிர் மனுதாரருக்கு கேவியட் மனுவின் நகலை அனுப்பியதற்குச்  சான்றாதாரமாக உள்ள அஞ்சல் பற்றுச் சீட்டு  (Postal Receipt)

ஆகியவற்றை தலைமை எழுத்தர் (Head Clerk) அல்லது செரஸ்தாரிடம் (Sheristadar ) கொடுத்தால் போதுமானதாகும்.

மனுக்கள், அபிடவிட், வழக்குரைக்கும் ஆவணம் ஆகியவற்றின் மேலுரையில் வழக்கறிஞர் பெயர், ஊர், நீதிமன்றம், மனு விபரம் ஆகியவற்றைக் குறிப்பிடுதல் வேண்டும்.

அஞ்சல் பற்றுச் சீட்டை தனியே ஒரு வெள்ளைத்தாளில் இணைத்து, அந்த வெள்ளைத்தாளில் மேல்குறிப்பை (Docket) எழுதுதல் வேண்டும்.

கேவியட் அசல் மனுவில் ரூ.10/-க்கும், வழக்குரைக்கும் அதிகார ஆவணத்தில் வழக்கறிஞர் நல நிதி முத்திரை வில்லையுடன் ரூ.5க்கும், அவசரத்தன்மை மனுவில் ரூ.2/-க்கும் நீதிமன்றக் கட்டண முத்திரை வில்லையை ஒட்டுதல் வேண்டும். அபிடவிட்டில்  நீதிமன்றக் கட்டண முத்திரை வில்லையை  ஒட்ட வேண்டிய அவசியமில்லை. 

கேவியட் மனுவில் வாத-பிரதிவாதங்கள் கேட்கப்பட மாட்டாது. அதனால், அதில் எதிர்மனுதாரர் கட்சியாடுகின்ற வகையில் எதிர்வுரையோ, பதிலறிவிப்போ செய்ய வேண்டியதில்லை.

ஒருமுறை தாக்கல் செய்யப்படுகின்ற கேவியட் மனு மூன்று மாதங்கள் வரையில் மட்டுமே செல்லுபடியாகும். அதன்பிறகு புதிதாகத்தால் கேவியட் மனு தாக்கல் செய்ய வேண்டும்.

கேவியட் மனு இரண்டாவது முறையாக அல்லது அடுத்தடுத்து எத்தனை முறை தாக்கல் செய்யப்பட்டாலும், ஒவ்வொரு முறையும் பின்பற்றப்படும் அதே நடைமுறையையே பின்பற்றுதல் வேண்டும்.

நன்றி : சட்டத்தமிழ் அறிஞர் புலமை வேங்கடாசலம், M.A, B.L.,