நீதிமன்றத்தில் ப்ரைவேட் கம்ப்ளைண்ட்

நீதிமன்றத்தில் ப்ரைவேட் கம்ப்ளைண்ட் கொடுப்பது எப்படி?

ஒரு குற்றவியல் நீதித்துறை நடுவர் மன்றத்தின் வழக்கு ஒன்றை நாம் தாக்கல் செய்யும் முன் அந்த வழக்கில் நியாமம் இருக்கிறதா என்பதை முதலில் கவனிக்க வேண்டும்.

வழக்கு தொடர்பான குற்றம் எங்கு நடந்துள்ளதோ, அந்த பகுதியிலுள்ள குற்றவியல் மன்றத்தில் தான்  நாம் வழக்கை தாக்கல்  செய்ய முடியும்.

ஆகவே. குற்றம் எந்த எல்லைக்குள் நடந்துள்ளதோ அங்குள்ள நீதிமன்றத்தில் வழக்கு தாக்கல் செய்யுங்கள்.

எந்த நீதிமன்றத்தில் வழக்கை தாக்கல் செய்வது?

குற்றவியல் நீதிமன்றங்கள் ஒரே ஊரில் பல இருக்கின்றது.. அவைகள் முதல் வகுப்பு நீதித்துறை நடுவர் மன்றம் என்றும். இரண்டாவது வகுப்பு நீதித்துறை நடுவர் மன்றம் என்றும் கூட இருக்கலாம். நமது வழக்கில் உள்ள குற்ற அளவின் தன்மையைப் பொருத்தும், குற்றம் சாட்டப்பட்டவரைப் பொருத்தும்  எங்கே வழக்கை தாக்கல் செய்வது என்று நாம் முடிவு செய்ய வேண்டும்.

தவறாக வேறு நீதிமன்றத்தில் வழக்கை தாக்கல் செய்தால் என்ன நடக்கும்?

தவறாக நீதிமன்றத்தில் ஒரு வழக்கை தாக்கல் செய்தால் தவறு ஏதும் இல்லை.  நமது வழக்கின். மனு அந்த நீதிமன்றத்தால் மறுக்கப்பட்டு, நம்மிடம் திருப்பியளிக்கப்படும். அதே நேரத்தில் ஏன் திருப்பி அளிக்கப்பட்டது என்பதற்கான காரணமும் எழுதப்பட்டிருக்கும். அதை படித்துத் தெரிந்து கொண்டு அதற்குரிய நீதிமன்றத்தில் நமது வழக்கை நாம் தாக்கல் செய்யலாம்.

வழக்கு மனுவை தயார் செய்வது எப்படி?

மனு தயார் செய்யும் போது தலைப்பில் பேப்பரின் நடுவில் கொஞ்சம் பெரிய எழுத்தில், நீதித்துறை நடுவர் மன்றம் என மனு எழுதி அதன் கீழே அந்த நீதிமன்றம் இருக்கின்ற ஊரின் பெயரை எழுத வேண்டும். அதற்குக் கீழே மையத்தில் ஆண்டுப்பட்டிகை வழக்கு எண் அல்லது (Calendar Case) சி.சி.எண்.. என்று எழுதி கொஞ்சம் இடம் விட்டு அதாவது சி.சி. எண்…….2019 என்று வருடத்தைக் குறிப்பிட வேண்டும். நமது வழக்கு ஏற்றுக் கொள்ளப்பட்டு நீதிமன்றத்தில் பதிவு செய்யப்பட்டதும் வழக்கிற்கு ஒரு எண் வழங்கப்படும். அந்த எண்ணை எழுதுவதற்கு வசதியாகவே மேற்கூறிய இடைவெளியை நாம் முதலிலேயே விட்டுவிடவேண்டும்..

அடுத்து நமது பெயர் – தந்தையார் பெயர்- நமது வயது மற்றும் முகவரியை இடது பக்கத்தில் எழுதி. மனுதாரர் / புகார்தாரர் / வாதி என்று அதற்கு நேராக வலது புறத்தில் எழுத வேண்டும். அதற்குக் கீழே தன் வழக்கில் தானே ஆஜராகிறார் அல்லது ஆங்கிலத்தில் Party in Person என்று எழுதவேண்டும். 

அவ்வாறு எழுதப்பட்டிருந்தால் மனுதாரர் வழக்கறிஞர் இல்லாமல், தன் வழக்கில் தானே வாதாடப் போகிறார் என்பதை நடுவர் முதலிலேயே புரிந்து கொள்வார்.

அடுத்து இடது பக்கத்தில் எதிர்மனுதாரர்களின் பெயர், அவர்களின் தந்தையார் பெயர் மற்றும் வயது (வயது தெரியவில்லை என்றால் சுமாரான வயது) மற்றும் முகவரி எழுதவேண்டும். எதிர்மனுதாரர்கள் ஒன்றுக்கு மேற்பட்டு இருந்தால் நம்பரிட்டு வரிசையாக எழுத வேண்டும். அவர்களின் பெயருக்கு நேராக வலது பக்கத்தில் எதிர்மனுதாரர்கள் / பிரதிவாதிகள் என்று குறிப்பிடவேண்டும்.

நீதிமன்ற கட்டணம். 

குற்றவியல் நீதிமன்றத்தில் ஒரு வழக்கு தாக்கல் செய்ய கட்டணமாக 20 ரூபாய்க்குக் கோர்ட் ஃபீ ஸ்டாம்ப் வாங்கி ஓரத்தில் ஓட்டிவிடவேண்டும். இதுவே வழக்கு தொடுக்க நீதிமன்றத்தில் நீங்கள் செலுத்தும் கட்டணமாகும்.

இந்த கோர்ட் ஃபீ ஸ்டாம்ப்-ஐ இடதுபுறம் தான் ஒட்ட வேண்டும். என்பதில்லை தலைப்பிலோ வலது புறத்திலோ எங்கு வேண்டுமானாலும் ஒட்டலாம்.

குற்ற விசாரணைமுறைச் சட்டம், பிரிவு -  200

குற்றவியல் நடுவர் நீதிமன்றத்தில் இதுபோல் தனியாக ஒருவர் புகார் கொடுப்பது பற்றி குற்ற விசாரணைமுறைச் சட்டம், பிரிவு 200-ல் குறிப்படப்பட்டுள்ளது. எனவே கீழே மையத்தில் கு.வி.மு.ச. பிரிவு  200-ன் கீழ் மனு என்று குறிப்பிட்டு அடிக்கோடு இடவேண்டும்.

ஒரு குற்றம் பற்றி சரியாகப் புலனாகாத நிலையில் கு.வி.மு.ச. பிரிவு 190(1)(அ)-ன் கீழும் இந்த மனுவை ஒரு முறையீடாக நாம் குற்றவியல் நீதிமன்றத்தில் தாக்கல் செய்யலாம்.

பொதுநல வழக்காக இருந்தால் எப்படி எழுத வேண்டும்?

பொது சுகாதாரக் கேடுகள். பொது வழிக்கு இடையூறு ஏற்படுத்துதல் அமைதியைக் குலைத்தல் போன்ற பொது நல வழக்காக இருந்தால் கு.வி.மு.ச. 133-ன் கீழ் முறையீடு என்று குறிப்பிடடு தாக்கல் செய்ய வேண்டும்.

புகாரின் தன்மை பற்றி எழுத வேண்டும்

அடுத்து புகாரின் தன்மையைச் சுருக்கமாகப் பத்தி பத்தியாக எழுதி, ஒவ்வொரு பத்திக்கும் வரிசையாக எண்கள் கொடுக்க வேண்டும். உங்கள் மனுவை படிக்கும் போது படிப்பவருக்கு வழக்கின் தன்மை தெளிவாக தெரிய வேண்டும். உங்கள் மனுவை வைத்தே உங்கள் திறமையை நடுவர் எடை போட்டுவிடலாம்.

இறுதியில் ஆகவே கனம் கோர்ட்டார் அவர்கள் எதிர்மனுதாரர்/எதிர்மனுதாரர்கள் மீது உரிய நடவடிக்கை எடுக்குமாறு பணிவுடன் பிரார்த்திக்கப்படுகிறது என்று மனுவை முடிக்க வேண்டும். வழக்கில் குறிப்பிடப்பட்டுள்ள குற்றங்கள் இந்தியத் தண்டனைச் சட்டத்தில், எந்தப் பிரிவின் கீழ்  அடங்கும் என்ற விபரம் தெரிவிக்கலாம். தெரிவித்தால் மனுதார் சட்டம் தெரிந்தவர் என்பதை நடுவர் புரிந்து கொண்டு நியாயமாக விசாரரணயை நடத்த எண்ணலாம். கண்டிப்பாக தெரிவிக்க வேண்டும் என்ற அவசியமில்லை.

கடைசியில் வலது பக்கம் கையெழுத்து செய்து – மனுதாரர்/புகார்தாரர்/வாதி என்று எழுத வேண்டும்.

மனுவை  பச்சை கலர் கேங்கர் பேப்பரில்தான் எழுத வேண்டும். மனு எழுதும் போது ஒவ்வொரு வரிகளுக்கும் இடையே நன்கு இடைவெளிவிட்டு எழுத வேண்டும். நமக்காக ஒரு பிரதி கண்டிப்பாக ஜெராக்ஸ் எடுத்து வைத்துக் கொள்ள வேண்டும். எதிர்மனுதாரர்கள் எத்தனை பேர் இருக்கிறார்களோ அத்தனை நகல்களை அவர்களுக்கு அளிப்பதற்காக ஒரிஜினல் மனுவுடன்  சேர்த்து நீதிமன்றத்தில் கொடுக்க வேண்டும்.

பொதுவாக வழக்கின் மனுவானது டைப் செய்து தாக்கல் செய்வதே நடைமுறையில் இருந்து வருகிறது. அதுவே வசதியாகவும் உள்ளது. அப்படியே செய்வது நல்லது. 

நீதிமன்றத்தில் தாக்கல் செய்யும் மனுவானது வழக்கு முடியும் வரையில் பாதுகாப்பட வேண்டியுள்ளதால் திக் பேப்பரில் இருந்தால் பாதுகாப்பாக இருக்கும் என்பதால், பச்சை கலர் கேங்கர் பேப்பரில்  வழக்கின் மனுக்கள் அனைவராலும் தயார் செய்யப்படுகிறது.
டாக்கெட் சீட் (Docket Sheet)

வேறு ஒரு முழுத்தாளை எடுத்து அதனை. பாதியாக மடித்து வலப்பக்கத்தில் மேலே நீதிமன்றத்தின் பெயரும். ஊரின் பெயரும் கீழே எழுத வேண்டும். அதற்கடுத்து (C.C.No…./2019) என்று எழுதவேண்டும். இது காலண்டர் கேஸ் எண். (CALENDAR CASE NUMBER) என்பதன் சுருக்கமாகும். தமிழில் ஆண்டுப்பட்டிகை வழக்கு எண்……../2019 என்றும் குறிப்பிடலாம்.

சற்று கீழே மனுதாரின் பெயர் எழுதி-மனுதார் என்று எழுத வேண்டும். அதற்குக் கீழ் கொஞ்சம் இடம்விட்டு எதிர்மனுதாரின் பெயரை எழுத வேண்டும். எதிர்மனுதாரர்கள் பலர் இருந்தால் முதல் எதிர் மனுதாரர் ஒருவரின் பெயரை மட்டும் எழுதி மற்றும் பிறர் என்று குறிப்பிட்டால் போதும்.

மையப்பகுதியில் குற்றவிசாரணை முறைச்சட்டம் அல்லது கு.வி.மு.ச. 200கீழ் மனு என்று குறிப்பிட்டு மேலும் கீழும் கோடிட்டுத் தனியாகக் காட்ட வேண்டும். அல்லது நீங்கள் எந்தப் சட்டப்பிரிவின் கீழ் உள்ளே வழக்கை குறிப்பிட்டுள்ளீர்களோ அதை இங்கே குறிப்பிடவேண்டும்.

கடைசியில் உங்கள் பெயரை எழுதி மனுதாரர்- தன் வழக்கில் தானே ஆஜராகிறார் என்று அவசியம் எழுத வேண்டும்.  இந்த பேப்பருக்குள் உங்கள் மனுவை வைத்து மூலையில் தைக்க வேண்டும். இதே போன்ற பேப்பரை தனித்தனியாக தயாரித்து அதன் நடுப்பகுதியில் உள்ளே இணைக்கப்பட்டுள்ள ஆவணத்தின் பெயரை குறிப்பிட்டு, ஒவ்வொரு ஆவணத்தின் நகலையும் உள்ளே வைத்து தைக்க வேண்டும். 

இந்த மனுவுடன் உரிய சான்றாவணங்கள் இருந்தால் கூடிய மட்டும் ஒரிஜினலோ அல்லது ஜெராக்ஸ் காபியோ இணைக்க வேண்டும். ஒரிஜினல் சான்றாவணம் இணைத்தால்  கோர்ட் ஃபீ ஸ்டாம்ப் ஒட்ட வேண்டியது இல்லை. ஜெராக்ஸ் காப்பி இணைத்தால் கண்டிப்பாக ஒவ்வொரு ஆவணத்திற்கும், 5 ரூபாய் மதிப்புள்ள கோர்ட் ஃபீ ஸ்டாம்ப்  கண்டிப்பாக ஒட்ட வேண்டும்.
அபிடவிட் இணைக்க வேண்டும் என்று நீதிமன்றம் எதிர்பார்க்கிறது. எனவே தங்களது அபிடவிட் ஒன்றை இணைக்க வேண்டும்.

******************************** அன்புடன் செல்வம் பழனிச்சாமி - 11.07.2019

கலப்புமணம்-அரசு தருகின்ற நிதியுதவி

கலப்புமணம்-அரசு தருகின்ற நிதியுதவி

***********************************************

கலப்புத் திருமணங்களை ஊக்கப்படுத்தி பிறப்பு அடிப்படையிலான ஜாதி, இன வேறுபாட்டை அகற்றி தீண்டாமை எனும் கொடுமையை ஒழிப்பதே இத்திட்டத்தின் நோக்கமாகும்.

இந்த திட்டத்தின் பெயர் ”டாக்டர். முத்துலட்சுமி ரெட்டி நினைவு கலப்புத் திருமண நிதியுதவித் திட்டம்” ஆகும்.

(இந்தியாவில் முதன்முதலில் மருத்துவப் பட்டம் பெற்ற பெண்மணியும், தமிழக சட்ட மேலவையில் முதல் பெண் உறுப்பினர் என்ற பெருமையும் பெற்றவர் டாக்டர் முத்துலட்சுமி ரெட்டி அவர்கள் என்பது குறிப்பிடத்தக்கது.)

இத்திட்டம் முன்பு அஞ்சுகம் அம்மையார் கலப்புத் திருமண நிதியுதவித் திட்டம் என்கிற பெயரில் செயல்பட்டது.

வழங்கப்படும் உதவி:
*******************************
திட்டம் 1:
‘’’’’’’’’’’’’’’’’’’
25,000 ரூபாய் (15,000 ரூபாய் காசோலையாகவும், 10,000 ரூபாய் தேசிய சேமிப்புப் பத்திரமாகவும்) மற்றும் 4 கிராம் தங்க நாணயம் திருமாங்கல்யம் செய்ய வழங்கப்படும்.

திட்டம் 2:
‘’’’’’’’’’’’’’’’’’’
50,000 ரூபாய் (30,000 ரூபாய் காசோலையாகவும், 20,000 ரூபாய் தேசிய சேமிப்புப் பத்திரமாகவும்) மற்றும் 4 கிராம் தங்க நாணயம் திருமாங்கல்யம் செய்ய வழங்கப்படும்.

தகுதிகள் மற்றும் நிபந்தனைகள்:
*************************************************
இதில் இரண்டு பிரிவுகள் உள்ளது.

1)பிரிவு 1- புதுமணத் தம்பதியரில் ஒருவர் ஆதிதிராவிடர் அல்லது பழங்குடியினராக இருந்து, பிற இனத்தவரை மணந்துகொண்டால் நிதியுதவி வழங்கப்படும்.

2)பிரிவு 2- புதுமணத் தம்பதியரில் ஒருவர் முற்பட்ட வகுப்பினராகவும் மற்றொருவர் பிற்படுத்தப்பட்ட / மிகவும் பிற்படுத்தப்பட்ட வகுப்பினராகவும் இருந்தால் நிதியுதவி வழங்கப்படும்.

3)திட்டம் 1-க்கு கல்வித் தகுதி தேவை இல்லை.

4)திட்டம் 2-க்கு பட்டதாரிகள் கல்லூரியிலோ அல்லது தொலைநிலைக் கல்வி மூலமோ அல்லது அரசால் அங்கீகரிக்கப்பட்ட திறந்தவெளிப் பல்கலைக்கழகங்களிலோ படித்து தேர்ச்சி பெற்றவர்களாக இருக்க வேண்டும்.

பட்டயப் படிப்பு, எனில் தமிழக அரசின் தொழில்நுட்பக் கல்வி இயக்குநரகத்தால் அங்கீகரிக்கப்பட்ட கல்வி நிறுவனங்களில் படித்து தேர்ச்சி பெற்றிருத்தல் வேண்டும்.

5)வருமான வரம்பு இல்லை

விண்ணப்பிக்க வேண்டிய கால அளவு:
********************************************************
திருமணம் முடிந்து இரண்டு வருடங்களுக்குள் விண்ணப்பிக்க வேண்டும்.

தேவையான சான்றுகள்:
*************************************
* திருமணப் பத்திரிகை அல்லது திருமணப் பதிவுச் சான்று
* மணமகன் அல்லது மணமகளின் ஜாதிச் சான்று
* மணப்பெண்ணின் வயதுச் சான்று
* பட்டப்படிப்பு / பட்டயப்படிப்பு தேர்ச்சி சான்று (திட்டம் 2-இல் பயன்பெற).

குறிப்பு :
************
அனைத்துத் திட்டங்களுக்கும் மாவட்ட சமூகநல அலுவலர்கள் மற்றும் சமூக நல விரிவாக்க அலுவலர்களை அணுகவும்.

பட்டா வாங்குவது எதற்காக?

பட்டா வாங்குவது எதற்காக?

***************************************

சொத்து வாங்கியவுடன் சார்பதிவாளர் அலுவலகத்தில் பத்திரப்பதிவு செய்தவுடன் வேலை முடிந்துவிட்டது என்று நினைக்கக் கூடாது. பத்திரம் தான் நம் கைக்கு கிடைத்துவிட்டதே இனி சொத்து நமக்குத்தான் சொந்தம் என்று நினைத்துவிடக்கூடாது. பட்டா வாங்குவது மிக அவசியம். அதிலும் ஒருவரிடம் இருந்து சொத்து முழுவதையும் வாங்காமல் ஒரு பகுதியை மட்டும் வாங்கி இருந்தால் உடனே பட்டா பெயர் மாற்றத்துக்கு விண்ணப்பித்துவிட வேண்டும். 

பட்டா பெயர் மாற்றம்;
*********************************

ஏனெனில் அவர் சொத்தின் ஒரு பகுதியை மட்டும் விற்பனை செய்து இருப்பதால், பட்டா அவர் பெயரில்தான் இருக்கும். நாம் வாங்கிய பகுதிக்கு தனியே பட்டா பெற வேண்டும். அதற்கு உட்பிரிவு பட்டா என்று பெயர். இந்த பட்டாவை உடனே பெறுவது நல்லது. ஏனெனில் பட்டாவுக்கு விண்ணப்பிக்காமல் இருந்துவிட்டால் நீங்கள் வாங்கிய பகுதிக்கும் சேர்த்து உரிமையாளர் பெயரிலேயே தொடர்ந்து பட்டா இருக்கும் என்பதால், சில பிரச்சினைகளை சந்திக்க நேரலாம். 

முக்கியமாக நீண்ட நாட்களாக பட்டா பெறாமல் இருந்தால், அவர் தன்னுடைய பட்டா மூலம் நீங்கள் வாங்கிய இடத்துக்கும் உரிமை கொண்டாட நேரிடலாம். அவர் வேறொருவருக்கு சொத்தை விற்பனை செய்வதாக இருந்தாலும், அதன் மூலம் உங்களுக்கு பிரச்சினை வரலாம். அதாவது நீங்கள் உட்பிரிவு பட்டா பெறாமல் இருப்பதால், தன்னுடைய பட்டாவை சொத்து வாங்கும் மற்றவரிடம் காண்பித்து முழு சொத்தும் தனக்குரியது! என்று சொல்லலாம். 

உட்பிரிவு பட்டா:
************************
அதன் மூலம் உங்களிடம் சொத்து விற்பனை செய்யப்பட்ட விஷயத்தை மறைக்கலாம். அல்லது நீங்கள் வாங்கியிருக்கும் சொத்தின் பகுதியையும் சேர்த்து மற்றவருக்கு விற்றுவிட முயற்சிக்கலாம். அப்படி விற்பனை நடந்துவிட்டால் சொத்தை வாங்கி இருக்கும் உங்களுக்கு சிக்கல் நேரும். நீங்கள் உட்பிரிவு பட்டா பெறாமல் இருப்பது அவருக்கு சாதகமாக மாறி விடக்கூடும். அதேநேரத்தில் நீங்கள் உட்பிரிவு பட்டாவுக்கு விண்ணப்பித்திருந்தால், அந்த சொத்து இரண்டு பாகமாக பிரிக்கப்பட்டு விடும். 

உதாரணமாக சர்வே எண் 50/1–ல் அடங்கியுள்ள 2 ஏக்கர் நிலத்தில் நீங்கள் ஒரு ஏக்கர் நிலத்தை மட்டும் வாங்கினால், பட்டாவுக்கு விண்ணப்பிக்கும்போது, சர்வே எண் 50/1 இரண்டு பிரிவாக உட்பிரிவு செய்து இரண்டு பட்டாவாக மாற்றப்படும். அதாவது சர்வே எண் 50/1 என்பது 50/1ஏ அடங்கிய ஒரு ஏக்கர் என்றும், 50/1பி அடங்கிய மற்றொரு ஏக்கர் என்றும் பிரிக்கப்பட்டு உரிமையாளருக்கும், நிலத்தை வாங்கிய உங்களுக்கும் தனி தனியாக பட்டா கொடுக்கப்படும். 

கவனமாக இருக்க வேண்டும்:
*******************************************
இதுதவிர உட்பிரிவு எண், பரப்பு, தீர்வை, வரைபடம் போன்றவை மாறுபடும். புதிய உட்பிரிவு எண் அடங்கிய சர்வே எண் வரைபடத்தில் குறிப்பிடப்பட்டும் இருக்கும். அதன் மூலம் அந்த சொத்தில் உங்கள் எல்லைப்பகுதிகள் வரையறை செய்யப்பட்டு இருக்கும். அதனால் உங்கள் சொத்துக் குரிய உரிமை உங்கள் வசம் வந்துவிடும். அதனால் சொத்தின் ஒரு பகுதியை விற்பனை செய்த உரிமையாளர் முழு சொத்துக்கும் உரிமை கொண்டாடுவது தவிர்க்கப்படும்.

அதே நேரத்தில் பாகப்பிரிவினை வாயிலாக வந்த சொத்தை வாங்குவதாக இருந்தால் பட்டா விஷயத்தில் கவனமாக இருக்க வேண்டும். அவர் பெயரில்தான் பட்டா இருக்கிறதா? என்று பார்க்க வேண்டும். அப்படி பட்டா இருந்தால் தான் நீங்கள் எளிதாக உங்கள் பெயருக்கு எளிதாக பெயர் மாற்றம் செய்ய முடியும். 

காலம் தாழ்த்தக்கூடாது:
************************************
அப்படி இல்லாவிட்டால் அதுவும் சிக்கலை ஏற்படுத்தி விடும். பாகப்பிரிவினை செய்த சொத்துக்கு அவர் பட்டா வாங்காமல் இருந்தால் குடும்பத்தின் உறுப்பினர்கள் அனைவரும் உரிமை கொண்டாடும் விதத்தில் பழைய பட்டா இருக்கும். அதில் இருந்து அவர் தனியாக தன்னுடைய சொத்துக்கு பட்டா பெற்ற பிறகே அந்த சொத்தை வாங்குவதற்கு பரிசீலிக்க வேண்டும். அப்போது தான் சொத்தை கிரயப்பத்திரம் செய்த பிறகு அவர் பெயரில் இருக்கும் பட்டாவில் பெயர் மாற்றம் செய்ய சுலபமாக இருக்கும். 

அப்படி அல்லாமல் பாகப்பிரிவினை அடிப்படையில் பட்டா வாங்காமல் இருந்தால் அத்தகைய சொத்தை வாங்குவதை தவிர்ப்பது நல்லது. மேலும் பட்டாவை பிறகு வாங்கிக்கொள்ளலாம் என்று காலம் தாழ்த்தக் கூடாது. சொத்தை விற்பனை செய்தவர் ஒருவேளை இறந்துவிட்டால் அவர் பெயரில் இருக்கும் பட்டாவை உங்கள் பெயருக்கு மாற்றுவது சிக்கலாகி விடும். அவர்களுடைய வாரிசுகளின் உதவியை நாட வேண்டியிருக்கும். அப்படி பெயர் மாற்றம் செய்வதும் சிக்கலான விஷயமாகவே அமையும். எனவே கிரயப்பத்திரம் வாங்கியதும் உடனடியாக உட்பிரிவு பட்டாவுக்கு விண்ணப்பித்து விடுவது நல்லது.

ஆன்லைனில் வில்லங்கச்சான்று

ஆன்லைனில் வில்லங்கச்சான்று பெறுவது எப்படி?

*******************************************************************************

EC-Encumbrance Certificate எனப்படும் வில்லங்கச்சான்றிதழ் என்றால் என்ன? அது எப்படி இருக்கும்?

இணையத் தளத்தில் வில்லங்க சான்று..!

தமிழகம் முழுவதும் பத்திரப் பதிவு அலுவலகங்கள், கம்ப்யூட்டர் மயமாக்கப்பட்டு, சொத்து விபரங்கள் அனைத்தும் கம்ப்யூட்டரில் பதிவு செய்யப்பட்டுள்ளன.

இவை அனைத்தும்,1987 ஜன. 1க்கு பிறகு பதிவு செய்யப்பட்டுள்ளன. அதற்கு முந்தைய ஆண்டுகளுக்கு இன்னும் பதிவு செய்யவில்லை.

சொத்துகள் வாங்கும் போதும், விற்கும் போதும், சம்பந்தப்பட்ட சொத்தில் ஏதும் பிரச்னைகள் உள்ளதா என்பதை அறிய, பத்திரப்பதிவு அலுவலகத்தில், குறிப்பிட்ட சில ஆண்டுகளுக்கு வில்லங்க சான்றிதழ் வாங்கவேண்டும். 

பொதுவாக பலரும், 30ஆண்டுகள் மற்றும் அதற்கு மேல் தான் வில்லங்க சான்றிதழ் கேட்கின்றனர். 

பத்திரப்பதிவு அலுவலகங்களில் கம்ப்யூட்டர் பதிவு 26 ஆண்டுகளுக்கு மட்டுமே உள்ளது. 

அதற்கு மேல் வேண்டும் என்றால், தேடி கைப்பட எழுதித் தான் சான்றிதழ் தர வேண்டும். அதற்கு கால அவகாசம் தேவைப்படும். 

இதனால், வில்லங்க சான்றிதழ் பெறுவதில், பொதுமக்களுக்கு சிக்கல் ஏற்படுகிறது. வீடு, நிலம் போன்ற அசையா சொத்துக்கள் வாங்கும் போது, அதற்கு சட்ட ரீதியில், முறையான வழிமுறை என்ன என்பதைப் பலரும் அறிந்திருப்பதில்லை. அரைகுறையாகக் கேள்விப்படும் விபரங்களை வைத்தும், பழக்கமானவர்கள் சொல்கிறார்களே என்பதைக் கருத்தில் கொண்டும் சொத்துக்களை வாங்கி விடுகின்றனர். சொத்து சரியான முறையில் பதிவு செய்யப்படாதபோது உரிமையாளர்கள் பல இன்னல்களுக்கு ஆளாக நேரிடுகிறது. சில சமயம் தமது சொத்துக்களைக் கூட இழக்கும்படி ஆகி விடுகிறது.

Encumbrance Certificate
********************************
நாம் வாங்குகிற சொத்துக்களை உரிய வகையில் பதிவு செய்தல் மிகவும் அவசியம். பொதுமக்களில் பலருக்கு அந்த விழிப்புணர்வு இருப்பதில்லை. பல சொத்துப் பிரச்சினைகளுக்கு இதுவும் ஒரு காரணமாக அமைந்துவிடுகிறது.

EC (Encumbrance Certificate) வில்லங்கச்சான்றிதழ்:
**********************************************************************
ஒரு குறிப்பிட்ட சொத்தின் பதிவு விவரங்கள் அனைத்தும் இதன் மூலம் நாம் தெரிந்து கொள்ளலாம். அதில் கீழ் கண்ட விவரங்கள் இருக்கும்.
1. சர்வே எண்
2. விற்பவரும் வாங்குபவரும் செய்து கொண்ட ஒப்பந்தம், செய்து கொண்ட தேதி, பதிவு செய்யப்பட்ட தேதி
3. பதிவுத் தன்மை அதாவது Sale Deed, Mortgage Deed, Agreement போன்ற விவரம்
4. சொத்தின் மதிப்பு
5. சொத்தை எழுதிக் கொடுப்பவர் மற்றும் எழுதி வாங்குபவர் பெயர்
6. தொகுதி மற்றும் பக்க எண்
7. பதிவு செய்யப்பட்ட ஆண்டு மற்றும் பதிவு எண் 

மேற்கண்ட விவரங்களின் மூலம் ஒரு சொத்து எந்தெந்த வருடம் யாரால் வாங்கப்பட்டிருக்கிறது என்ற முழு விவரங்களும் தெரியும். 

EC-யை வைத்தே தாய்பத்திரத்தில் இருந்து நாம் யாரிடம் நிலம் வாங்குகிறோமோ அது வரை உள்ள எல்லா பத்திரங்களையும் நாம் சரி பார்த்துக் கொள்ளலாம்.

மேலும் நாம் வாங்க இருக்கும் சொத்து ஏதேனும் ஒரு வங்கியில் Registered Mortgage(பதிவுசெய்யப்பட்ட அடமானம்) செய்யப்பட்டிருக்கிறதா என்ற விவரமும் இதில் தெரிந்துவிடும். 

சொத்து சம்பந்தமாக EC-ல் சில தகவல்கள் வர வாய்ப்பில்லை.
******************************************************************************************
1. 01.11.2009-க்கு முன்பு சொத்தின் உரிமையாளர் அந்த சொத்தை விற்பதற்குயாரையாவது Power of attorney-யாக நியமித்து இருந்தால் அது EC-ல் வராது.

Power of attorney-ஐ பதிவு செய்ய புதிய முறையை அரசாங்கம் 01.11.2009-ல் இருந்து அமல்படுத்தியது. அதன்படி Power of attorney பதிவு விவரம் EC-ல்வரும்.

2. சொத்தின் உரிமையாளர் சொத்தை விற்பதற்காக யாரிடமாவது பதிவு செய்யப்படாத ஒப்பந்தம் (Unregistered Agreement) போட்டு இருந்தால் அதுவும் EC-ல்வராது.

3. சொத்தின் உரிமையாளர் சொத்தை விற்பதற்காக யாரிடமாவது பதிவுசெய்யப்படாத அடமானம் (unregistered mortgage) வைத்திருந்தால் அதுவும் EC-ல் வராது.

மேற்கண்ட மூன்று விஷயங்களிலும் நாம் கவனமாக இருக்க வேண்டும். பல மோசடிகள் நடப்பதற்கு இவை மூன்றும் காரணமாகி விடுகின்றது.

கைப்பட எழுதித்தரப்படும் சான்றிதழ் EC பெறுவது எப்படி? 
**************************************************************
சொத்து எந்த சார்பதிவாளர் அலுவலகத்தில் பதிவு செய்யப்பட்டிருக்கிறதோ அங்கு வில்லங்கச் சான்றிதழுக்கு விண்ணப்பித்து பெறலாம். 

01.01.1987-ல் இருந்து தான் Computer மூலம் EC பெற முடியும்.
***********************************************************************************
அதற்கு முன்பு Manual ECதான்.01.01.1987-ல் இருந்து EC தேவைப்படும் பட்சத்தில் இணைய தளத்தின் மூலமும் விண்ணப்பம் செய்து பெறலாம் 

இணைய தளத்தின் முகவரி www.tnreginet.net
*****************************************************************
இந்த வசதி தமிழ் நாட்டில் குறிப்பிட்ட சில இடங்களுக்கு மட்டும் தான் இருக்கிறது. எந்தெந்த இடங்களில் இந்த சேவை இருக்கிறது என்ற விவரம் இணைய தளத்தில் குறிப்பிடப்பட்டிருக்கும் அல்லது சென்னை இராஜாஜி சாலையில் உள்ள அலுவலகத்தில் விண்ணப்பம் செய்து தமிழ்நாட்டில் உள்ள எந்த சொத்திற்கும் EC பெறலாம்.

விண்ணப்பத்தில் 

1.விண்ணப்பம் செய்பவரின் பெயர், 
2.முகவரி, 
3.சொத்து விவரம்
4.மற்றும் கிரையப்பத்திர விவரம்

முதலியவைகள் கேட்கப்பட்டிருக்கும்.

விண்ணப்பத்தைப் பூர்த்தி செய்து தேவையான கட்டணத்தைச் செலுத்தி விண்ணப்பம்செய்ய வேண்டும். 

இணைய தளத்தின் மூலம் விண்ணப்பம் செய்பவருக்கு தபால் மூலமோ அல்லது நேரிலோ EC கொடுக்கப்படும்.
அவ்வாறு கொடுக்கப்படும் போது அதற்குரிய கட்டணங்கள் வசூலிக்கப்படும்
.
அதற்கு என்ன செலவாகும்?
*******************************************
பத்து ஆண்டுகளுக்கு என்றால் முதல் ஆண்டிற்கு ரூ.15 ம், பிறகு ஒவ்வொரு ஆண்டிற்கும் ரூ.5 ம் கட்டணமாக வசூலிக்கப்படுகிறது. அத்துடன் விண்ணப்ப கட்டணமாக ரூ.11 வசூலிக்கப்படும்.

கம்ப்யூட்டர் முறையில் எடுத்துதரப்படும் நகல் பதிவு செய்யப்படாத அதாவது EC-ல் entry வராத, சொத்து சம்பந்தமான நடவடிக்கைகளால் ஏற்படும் விளைவுகள் என்ன?

ஒருவர் தன்னுடைய நிலத்தை விற்பதற்கு மற்றொருவரை Power of Attorney-ஆக 2005-ல் நியமனம் செய்திருந்தார். Power of Attorney-ஆக நியமிக்கப்பட்டவர் சொத்தை விற்பதற்கு காலம் தாழ்த்தவே சொத்தின் உரிமையாளர் அவருக்கு தெரியாமல் Power of Attorney-யை ரத்து செய்துவிட்டார். 

இதை மறைத்தோ அல்லது தெரியாமலோ Power of Attorney-ஆக நியமிக்கப்பட்டவர் சொத்தை விற்பனை செய்வதற்காக மற்றொருவரிடம் முன் பணம் வாங்கி கிரைய ஒப்பந்தம் (Sale Agreement)செய்து விட்டார். 
சட்ட ரீதியாக இது செல்லுபடியாகாது. 

சொத்தின் உரிமையாளர் வேறு ஒருவருக்கு சொத்தை விற்றுவிட்டார். இது செல்லுபடியாகும்.

ஆன்லைனில் வில்லங்க சான்று பெறுவது எப்படி ?
***************************************************************************
ஒரு ரூபாய் மட்டுமே செலவு செய்தால் போதும் ஈ.சி எனப்படும் வில்லங்கச் சான்றிதழை ஆன்லைனில் பெற்றுக் கொள்ளலாம்.

தமிழ்நாடு அரசு பத்திரப்பதிவுத்துறை அதற்கான ஏற்பாடுகளை செய்துள்ளது. 

பொதுவாகவே ஈ சி (EC – Encumbrance Certificate) எனப்படும் (வில்லங்க சான்றிதழ்) கிடைக்க நிறைய பேருக்கு ஒன்று ஒரு தரகரை நாட வேண்டும் அல்லது ரிஜஸ்டர் ஆபிசுக்கு இரண்டு அல்லது மூன்று முறை நடக்க வேண்டிய கட்டாயம்.

இனிமேல் 1 ரூபாயில் ஆன்லைனில் எடுத்துவிடலாம். அது போக இதை வீட்டுக்கு கொரியர் அல்லது ஸ்பீட் போஸ்ட்டில் கூட அனுப்பி வைக்க இந்த அரசாங்கம் ரெடி.

ஈஸி எடுக்க 1 ரூபாய். முதல் வருடத்திற்க்கு 15 ரூபாயும் ஒவ்வொரு வருஷம் கூடுதல் ரெக்கார்ட் பெற 5 ரூபாய், பத்து வருடத்திற்க்கு தோராயமாக 1+15+9 = 61 ரூபாய் தான் செலவு.

இதை உங்கள் வீட்டுக்கே கொரியர் செய்ய ரூபாய் 25 தான் செலவு. ஆன்லைனில் நேரடியாக தேடி பிரின்ட் அவுட் செய்து கொள்ள வெறும் 100 ரூபாய் தான் மொத்த செலவு.

இது போக ரெஜிஸ்டர் டாக்குமன்ட் காப்பி, சிட்டா அடங்கல் கூட இங்கு காப்பி கிடைக்கும். சென்னை, கடலூர், கோயம்புத்தூர்,திருச்சி, சேலம், மதுரை, தஞ்சாவூர், வேலூர் நம்ம திருநெல்வேலி அலுவலகங்களுக்கும் இது பொருந்தும். 

அது போக ஆங்கிலத்திலும், தமிழிலும் ஃபார்ம் ஃபில் செய்யலாம்.

அது போக சிட் கம்பெனிகள், சொசைட்டிகளின் டாக்குமென்ட்களை பற்றி தெரிந்து இன்வெஸ்ட் செய்யுங்கள் 

அது கிடைக்க கூட ஆன்லைன் லின்க் உள்ளது

உங்களின் அரசாங்க லேன்ட் வேல்யு கைட்லைன்ஸ் பெறவும் முடியும். 

இதனால் நீங்கள் வாங்கும் சொத்துக்கு எவ்வளவு ஸ்டாம்ப் பேப்பர் என முன்னமே திட்டமிட முடியும்.

அதற்கான இணைய தள முகவரிகள் கீழே கொடுக்கப்பட்டுள்ளன.
ஈ.சி சர்டிபிகேட் ஆங்கிலத்தில் பெற –

http://www.tnreginet.net/igregn/webAppln/EC.asp?tams=0

ஈ.சி சர்டிபிகேட் தமிழில் பெற –

http://www.tnreginet.net/igregn/webAppln/EC.asp?tams=1

டாக்குமெண்ட் ரிஜிஸ்ட்ரேசன் –

http://www.tnreginet.net/igregn/webAppln/cert_document.asp

திருமணத்தை பதிவு செய்ய –

http://www.tnreginet.net/english/smar.asp

சீட்டு கம்பெனி ரிஜிஸ்டர் –

http://www.tnreginet.net/english/schit.asp

சொசைட்டி ரிஜிஸ்டர் – 

http://www.tnreginet.net/english/society.asp

லேண்ட் வேல்யூ சர்டிபிகேட் பெற –http://www.tnreginet.net/Guidelinevalue2012/gvaluemainpage2011.asp