கார் இன்சூரன்ஸ் பற்றி நீங்கள் தெரிந்து கொள்ள வேண்டியவை!

கார் இன்சூரன்ஸ் பற்றி நீங்கள் தெரிந்து கொள்ள வேண்டியவை!

இந்தியாவில் கார் காப்பீடு கட்டாயமானதாகும். எனவே உங்களிடம் கார் இருந்தால், உங்களிடம் காருக்கான இன்சூரன்ஸூம் இருக்க வேண்டும். உங்கள் கார் ஒரு துரதிர்ஷ்ட வசமான விபத்தைச் சந்திக்கும் ஒரு நிகழ்வில், உங்கள் கார் காப்பீட்டுத் திட்டமானது உங்கள் காருக்கு ஏற்பட்ட சேதங்கள் மேலும் மூன்றாம் தரப்பினருக்கு ஏற்பட்ட சேதங்களுக்கான பழுது பார்ப்பதற்கான செலவுகளுக்குக் காப்பீடு அளிக்கக்கூடிய அளவிற்குப் போதுமானதாக இருக்க வேண்டும்.

3 வகைப் பாலிசிகள்

கார் காப்பீட்டில் மூன்று வகையான பாலிசிகள் உள்ளன, மேலும் ஒருவர் தனது தேவைகள் மற்றும் நோக்கங்களை எதிர்கொள்ளக்கூடிய திட்டத்தைத் தேர்வு செய்து கொள்ளலாம். அவை பின்வருகின்றன...

1. விரிவான காப்பீட்டுத் திட்டம்

இது பிரபலமான காப்பீட்டுத் திட்டமாகும் இந்தத் திட்டமானது காப்பீட்டுதாரருக்கு விரிவான காப்பீட்டுப் பாதுகாப்பை அளிக்கிறது. இந்தத் திட்டத்தில் வழங்கப்படும் காப்பில், ஒரு விபத்தினால் ஏற்பட்ட சேதங்களைச் சீரமைப்பதற்கு ஆன செலவுகளைத் திருப்பிக் கொடுத்துவிடும் திட்டம், விபத்தினால் ஏற்பட்ட காயங்களுக்கு ஆகும் மருத்துவச் சிகிச்சைகளுக்கான செலவுகளுக்கு நஷ்டஈடு செலுத்தும் காப்பு, வாகனம் திருடப்பட்டால் அதற்கான நஷ்ட ஈட்டைச் செலுத்தும் காப்பு, மற்றும் பாலிசிதாரரால் நிகழ்ந்த விபத்தினால் எழுந்த மற்றொரு நபரின் சொத்துக்களுக்கு ஏற்பட்ட சேதங்கள் மற்றும் உயிருக்கு ஆபத்து மற்றும் அங்கங்களுக்குக் காயம் ஆகியவற்றிற்கு மூன்றாம் தரப்புப் பொறுப்பு காப்புறுதி ஆகியவை அடங்கும்.

2. மூன்றாம் தரப்புப் பொறுப்பு காப்பீட்டுத் திட்டம்:

மூன்றாம் தரப்புப் பொறுப்புக் காப்பு இந்தியாவில் கட்டாயமாகும். இது மற்றொரு மூன்றாம் தரப்பு நபருக்கோ அல்லது அவரின் சொத்துக்கோ உங்கள் காரினால் ஏற்பட்ட சேதங்கள் அல்லது காயங்களுக்குக் காப்பீடளிக்கிறது.

3. வாகன மோதலுக்கான காப்பீடு:

இந்தக் காப்பீடு பாலிசிதாரருக்கு அவரது சொந்த காருக்கு விபத்தினால் ஏற்படும் சேதங்களுக்கு எதிராகப் பாதுகாப்பு அளிக்கிறது. இருப்பினும், இந்தக் காப்பீட்டுத் திட்டத்தில் வாகனத்தைக் காழ்ப்புணர்ச்சியால் செய்யப்படும் வன்முறை சேதங்கள் அல்லது திருட்டு ஆகியவற்றிலிருந்து காப்பீடு அளிக்கப்படுவதில்லை.

உங்கள் தேவைக்கேற்ப தேர்ந்தெடுங்கள் எனவே, ஒருவரின் எந்தத் தேவைகள் மற்றும் நோக்கங்களுக்காக வாகனம் பயன்படுத்தப்படுகிறது என்பதை முதலில் புரிந்து கொள்ள வேண்டியது அவசியமாகும் பிறகு உங்களுக்கு எந்த வகைக் கார் காப்பீட்டுத் திட்டம் மிகவும் பொருத்தமானது என்பதை முடிவு செய்யுங்கள்.

Written by: Mr. Prasanna VK

நன்றி : குட்ரிட்டன்ஸ் » தமிழ் » 02.05.2017

சொத்து விற்கும்போது வரி செலுத்துவது கட்டாயம்!

சொத்து விற்கும்போது வரி செலுத்துவது கட்டாயம்!

சொத்தை விற்கும் போது வரி செலுத்துவது கட்டாயம்...

எப்படி வரி செலுத்துவது?

என்னென்ன சலுகைகள் உள்ளன?

அசையா சொத்து வாங்குபவர்கள் விற்பவர்களுக்குச் செலுத்தவேண்டிய தொகையில் வரிப் பிடித்தத்தைக் கழிக்க வேண்டியது கட்டாயமாகும். சொத்து வாங்குபவர்கள் கருதப்பட்ட மொத்த பணத்தில் 1% ஆதாரப் பணத்திற்கான வரிப்பிடித்தத்தைக் கழித்து மற்றும் அதே தொகையைப் பரிந்துரைக்கப்பட்ட வடிவத்தில் வருமானவரி அதிகாரிகளின் கணக்கில் வைப்புத் தொகையாகச் செலுத்த வேண்டியது அவசியமாகும். அதற்கான வழிமுறைகளை இங்கே கீழே காணலாம்.

படிவம்

சொத்து வாங்குபவர்கள் ஆதாரப் பணத்திலிருந்து பெறும் வரிப்பிடித்தத்தை வங்கியில் வைப்புத் தொகையாகச் செலுத்த 26QB படிவத்தை இணையத்திலோ அல்லது இணையத்திற்கு வெளியிலோ பெற்று நிரப்ப வேண்டியது அவசியமாகும்.

இணையத்தில் அந்தப் படிவத்தைப் பெறுவதற்கு ஒருவர் பின்வரும் இணைய இணைப்பைச் சொடுக்கலாம். https://onlineservices.tin.egov-nsdl.com/etaxnew/tdsnontds.jsp படிவத்தை நிரப்பத் தவணை நாட்கள் சொத்து வாங்குபவரால் ஆதாரப் பணத்திலிருந்து செய்யப்பட்ட வரிப்பிடித்தம் கழிக்கப்பட்ட மாதத்தின் 7 நாட்களுக்குள் படிவம் 26 QB நிரப்பப்பட வேண்டும்.

விவரங்கள்

சொத்தை வாங்குபவர் மற்றும் விற்பவர் தொடர்பான தகவல்கள் (பெயர், முகவரி, நிரந்தர வங்கி கணக்கு எண், வாழ்க்கை தகுதி போன்றவை) சொத்து பற்றிய விவரங்கள், சலுகை மற்றும் செலுத்தப்பட வேண்டிய ஆதாரப் பணத்தில் வரிப்பிடித்தம் ஆகியவை கண்டிப்பாகப் படிவத்தில் நிரப்பப்பட வேண்டும்.

பணம் செலுத்துதல்

ஒருவர் இணைய வங்கி கணக்கு அல்லது வங்கியின் கிளைகளில் ஒன்றின் வழியாகப் பணம் செலுத்தும் முறையைத் தேர்ந்தெடுக்கலாம். ஒருவேளை வரி செலுத்துபவர் ஈ-டாக்ஸ் பணம் செலுத்தும் முறையைத் தேர்ந்தெடுத்தால் அடுத்தடுத்த தேதிகளில் வங்கிக் கிளையில் ஒரு ஒப்புக சீட்டு எண் உருவாக்கப்படும். அந்த எண் வரி செலுத்துபவரால் வங்கியில் பணம் செலுத்தும்போது வழங்குவதற்காகத் தொடர்ந்து வைத்திருக்க வேண்டும்.

செயல்முறை

படிவம் தாக்கல் செய்யப்பட்டு மற்றும் வருமானவரி அதிகாரிகளுக்குப் பணம் செலுத்தப்பட்ட பிறகு, ஒப்புதலுக்கான படிவம் 26QB அல்லது படிவம் 16B ஆகியன வரி செலுத்துபவரின் இணையத் தளங்களில் உட்சென்று தரவிறக்கம் செய்து கொள்ளலாம். ஆதார பணத்திலிருந்து வரிப்பிடித்தம் செய்த தொகையை வைப்பு நிதியில் செலுத்தியதற்கான சான்றாகச் சொத்து வாங்கியவரால் சொத்து விற்றவருக்குப் படிவம் 16B கண்டிப்பாக வழங்கப்பட வேண்டும்.

விவசாய நிலங்களுக்கு விலக்கு

விவசாய நிலங்களை வாங்கும் இந்த விதிமுறைகளின் தேவைகள் விலக்கப்படுகிறது.

தவனை முறை வரி செலுத்துதல்

கருதப்பட்ட தொகை தவணை முறையில் செலுத்தப்பட்டால் ஆதாரப் பணத்திலிருந்து வரிப்பிடித்தமும் ஒவ்வொரு தவணையிலும் கழிக்கப்படும்.

பான் இல்லை என்றால் கூடுதல் வரி

ஒரு வேளை சொத்து விற்றவரால் நிரந்தர வங்கி கணக்கு எண் வழங்கப்படவில்லை என்றால் ஆதாரப் பணத்திலிருந்து வரி பிடித்தமானது 20% கழிக்கப்படும்.

Written by: Mr. Tamilarasu

நன்றி : குட்ரிட்டன்ஸ் » தமிழ் » பர்சனல் பைனான்ஸ் » 06.05.2017

தமிழக அமைச்சர் காமராஜ் மீது மோசடி புகார், எப்.ஐ.ஆர் பதிவு

தமிழக அமைச்சர் காமராஜ் மீது மோசடி புகார், எப்.ஐ.ஆர் பதிவு

மோசடிப் புகாரின் பேரில் அமைச்சர் காமராஜ் மீது மன்னார்குடி காவல் நிலையத்தில் வழக்குப் பதிவு

தமிழக உணவுத்துறை அமைச்சர் காமராஜ் மீது மன்னார்குடி காவல் நிலையத்தில் சட்டப் பிரிவுகள் 420 (மோசடி), 506/1(மிரட்டல் விடுத்தது) ஆகியனவற்றின் கீழ் வழக்குப்பதிவு செய்யப்பட்டுள்ளது. ஆனால், இந்த வழக்கு எந்தத் தேதியில் பதிவு செய்யப்பட்டது என்பது குறித்து உறுதியான தகவல் இல்லை.

மன்னார்குடியில் போலீஸ் உயர் பதவிகள் பல நிரப்பப்படாமல் உள்ளதால் இத்தகவலை உறுதிப்படுத்த மற்ற போலீஸார் முன்வரவில்லை.

இருப்பினும், அமைச்சர் காமராஜ் வழக்கு தொடர்பாக கடந்த 3-ம் தேதி முதல் டெல்லியில் முகாமிட்டுள்ள டிஎஸ்பிக்கள் அறிவானந்தம், அருண்குமார், துணை ஆய்வாளர் கழனியப்பன் ஆகியோர் உச்ச நீதிமன்றத்தில் வழக்கு தொடர்பாக பிரமாண பத்திரம் தாக்கல் செய்துள்ளனர் என்பது மட்டும் உறுதியாகியுள்ளது.

கைதாவாரா காமராஜ்?

சட்டப் பிரிவு 420, சட்டப் பிரிவு 506 /1 ஆகிய இரண்டுமே ஜாமீன் பெறக்கூடியவையே என்பதால் அமைச்சர் காமராஜர் கைதாவார் என்று கூற முடியாது. அவர் ஜாமீன் பெற்று வழக்கை எதிர்கொள்ளவும் வாய்ப்பிருக்கிறது.

காமராஜ் மீது எஃப்.ஐ.ஆர். ஏன்?

சென்னையில் தனக்கு சொந்தமான வீட்டில் குடியிருந்த ஆக்கிரமிப்பாளர்களை காலி செய்வதற்காக தமிழக உணவுத் துறை அமைச்சர் காமராஜின் உறவினர் ராமகிருஷ்ணன் என்பவர் மூலம் ரூ.30 லட்சம் பணத்தை அமைச்சர் காமராஜிடம் கொடுத்ததாகவும், ஆனால், சொன்னபடி வீட்டை காலிசெய்து தராததுடன், பணத்தையும் திருப்பித் தராமல் தன்னை மிரட்டியதாகவும் கூறி, மன்னார்குடி டிஎஸ்பியிடம் கடந்த 2015 மார்ச் 10-ம் தேதி புகார் அளித்தார்.

பின்னர், அந்தப் புகாரின் மீது நடவடிக்கை எடுக்கவில்லை எனக் கூறி, உயர் நீதிமன்றத்திலும், அதைத்தொடர்ந்து, உச்ச நீதிமன்றத்திலும் வழக்கு தொடர்ந்தார். இதை விசாரித்த உச்ச நீதிமன்றம், தமிழக காவல்துறை உடனடியாக அமைச்சர் மீது வழக்கு பதிவு செய்ய வேண்டும் என்று ஏப்ரல் 28-ம் தேதி உத்தரவிட்டது. தொடர்ந்து, மே 3-ம் தேதி நடைபெற்ற விசாரணையின்போதும் வழக்கு பதிவு செய்ய முகாந்திரம் இருந்தும், வழக்கு பதியாதது ஏன் என கேள்வி எழுப்பியதுடன், வரும் 8-ம் தேதிக்கு வழக்கை தள்ளிவைத்து, அன்று இதுதொடர்பாக அறிக்கை தாக்கல் செய்ய வேண்டும் என தமிழக காவல்துறைக்கு உச்ச நீதிமன்றம் உத்தரவிட்டுள்ளது.

இதையடுத்து கடந்த 3-ம் தேதி மன்னார்குடி மன்னை நகரில் உள்ள குமாரின் வீட்டில் மன்னார்குடி போலீஸார் ஒரு சம்மனை ஒட்டிவிட்டு சென்றுள்ளனர். அதேபோல, கீழ வாழாச்சேரியில் உள்ள வீட்டிலும் சம்மன் ஒட்டப்பட்டது.

மன்னார்குடி டிஎஸ்பி பெயரில் வழங்கப்பட்டுள்ள சம்மனில், "தாங்கள் அனுப்பிய மனுவின் அடிப்படையில் தங்களிடம் (குமாரிடம்) விசாரிக்க வேண்டியுள்ளது. எனவே, மன்னார்குடி டிஎஸ்பி அலுவலகத்தில் மே 5-ம் தேதி ஆஜராகி விசாரணைக்கு ஒத்துழைக்க வேண்டும். தக்க பாதுகாப்பு ஏற்பாடு செய்யப்பட்டுள்ளது" என குறிப்பிடப்பட்டிருந்தது.

குமார் ஆஜராவார் என்பதற்காக மன்னார்குடி டிஎஸ்பி அலுவலகம் முழுவதும் கண்காணிப்பு கேமராக்கள் வைக்கப்பட்டன. எனினும் அவர், நேற்று இரவு வரை வராததால், காத்திருந்த போலீஸார் ஏமாற்றம் அடைந்தனர்.

இதுகுறித்து குமார் தரப்பினர் கூறியபோது, "உச்ச நீதிமன்ற உத்தரவின்படி எஃப்ஐஆர் பதிவு செய்யாமல், விசாரணைக்கு அழைத்திருப்பதில் வேறு நோக்கம் உள்ளதாக தெரிகிறது. குமார் மீது போலீஸார் வேறு ஏதாவது வழக்குப் பதிவு செய்யவும் வாய்ப்பு உள்ளது" என்றனர்.

நன்றி : தி இந்து தமிழ் நாளிதழ் - 06.05.2017

அங்கீகாரமற்ற வீட்டு மனைகள் - அரசு விதிமுறைகள்

அங்கீகாரமற்ற வீட்டு மனைகள் - அரசு விதிமுறைகள்

சென்னை:அங்கீகாரமற்ற வீட்டு மனைகளை வரன்முறை செய்வதற்கான விதிமுறைகளை, தமிழக அரசு அறிவித்துள்ளது. அதன் மூலம், ஏரி, குளம், கால்வாய் மற்றும் கோவில் நிலத்தில் வீடுகள் கட்டவும், விவசாய நிலத்தை வீட்டு மனையாக மாற்றவும், தடை விதிக்கப் பட்டு உள்ளது. இது தொடர்பான, இரண்டு அரசாணைகளை, உயர் நீதிமன்றத்தில், தமிழக அரசு, நேற்று தாக்கல் செய்தது.

தமிழகத்தில், அங்கீகாரமற்ற வீட்டு மனை களை பதிவு செய்ய, சென்னை உயர் நீதிமன்றம், 2016 செப்., 9ல், தடை விதித்தது. இதையடுத்து, மனைகள் வரன்முறை திட்டம், விவசாய நிலங்கள் பயன்பாடு மாற்றம் தொடர்பான புதிய விதிமுறைகளுக்கு, மே, 2ல் நடந்த தமிழக அமைச்சரவை கூட்டத்தில், ஒப்புதல் அளிக்கப்பட்டது.

அதன்படி, வீட்டு வசதி மற்றும் நகர்ப்புற வளர்ச்சி துறை செயலர், தர்மேந்திர பிரதாப் யாதவ், இரண்டு அரசாணைகளை, நேற்று வெளியிட்டார். அவற்றை, உயர் நீதிமன்றத் தில், தமிழக அரசு தாக்கல் செய்தது.முதலாவது அரசாணை யில், அங்கீகாரமற்ற மனைகளை, வரன்முறை செய்வதற்கான, விதிமுறைகள் அறிவிக்கப்பட்டுள்ளன. அதன்படி, அங்கீகார மின்றி உருவாக்கப்பட்டு, 2016 அக்., 20க்கு முன், விற்பனை பத்திரம் பதிவு செய்த மனைகளை, வரன்முறை செய்யலாம். இதில், விண்ணப்ப தாரர் பெயரில், பத்திரம் பதிவாகி இருக்க வேண்டும். 'பவர்' பத்திரம் பெற்றவர்களுக்கு, வரன்முறையில் விண்ணப் பிக்க தகுதி இல்லை.

இத்திட்டம் அறிவிக்கப்பட்ட நாளில் இருந்து, குறிப்பிட்ட காலக்கெடுவுக்குள், வரன் முறைக்கு, மனை உரிமையாளர்கள் விண்ணப் பிக்க வேண்டும். தவறினால், குடிநீர், கழிவுநீர், மின்சார இணைப்புகள் துண்டிக்கப்படும்;

பத்திரப்பதிவு, கட்டட அனுமதிக்கு தடை விதிக்கப்படும்.இந்த வரன்முறை, நிலத்துக்கு மட்டும் தான்; அதில், அனுமதியின்றி கட்டிய கட்டடங்களை வரன்முறைபடுத்தியதாக ஆகாது.நீர் வழித்தடம், கால்வாய், குளம், ஆறு உள்ளிட்டவற்றை ஆக்கிரமித்து உருவாக்கப் பட்ட மனைகளை வரன்முறை செய்ய முடியாது. அரசு புறம்போக்கு நிலம் ஏற்கப் படாது.ஓ.எஸ்.ஆர்., எனப்படும், திறந்தவெளி ஒதுக்கீட்டு நிலத்தில், உருவாக்கப்பட்ட மனை யாக இருக்ககூடாது.

உத்தேச சாலைகள், ரயில் பாதைகள், புற வழிச்சாலைகளில் இருக்கக் கூடாது. பொது பாதையை ஆக்கிரமித்த மனைகளுக்கு, வரன்முறை கிடையாது. இவ்வாறு முதல் அரசாணையில் கூறப்பட்டு உள்ளது. இரண்டாவது அரசாணை மூலமாக, விவசாய நிலத்தை வீட்டு மனையாக மாற்ற,அரசின் முன் அனுமதி பெற வேண்டும் என்பதை, அரசு கட்டாயமாக்கி உள்ளது.

கட்டணம் எவ்வளவு?

* பரிசீலனை கட்டணம்:

ஒரு மனைக்கு, 500 ரூபாய்; வரன்முறை கட்டணம், மாநகராட்சிகளில் ஒரு சதுர மீட்டருக்கு, 100 ரூபாய்; நகராட்சிகளில், 60; பேரூராட்சி, ஊராட்சிகளில், 30 ரூபாய்

* வளர்ச்சி கட்டணம்:

மாநகராட்சிகளில் ஒரு சதுர மீட்டருக்கு, 600 ரூபாய்; நகராட்சிகளில், 250 - 350; பேரூராட்சிகளில், 150; ஊராட்சிகளில், 100 ரூபாய்

* ஓ.எஸ்.ஆர்., கட்டணம்:

மொத்த பரப்பளவில், 10 சதவீத அளவுக்கு, பதிவுத்துறையின் வழிகாட்டி மதிப்பு அடிப்படையில், செலுத்த வேண்டும்

* இதில், 2012 மார்ச், 31க்கு முன், பதிவு செய்யப்பட்ட மனைகளுக்கு, 2007 ஆக., 1ன் படியான வழிகாட்டி மதிப்பும், அதற்கு பிந்தைய மனைகளுக்கு, தற்போது நடைமுறையில் இருக்கும் வழிகாட்டி மதிப்பும், கணக்கில் எடுத்துக் கொள்ளப்படும்.

வரன்முறை அதிகாரம்

* தனிபட்ட மனைகளை வரன்முறை செய்ய, மாநகராட்சி, நகராட்சி, பேரூராட்சி, ஊராட்சி களின் நிர்வாகங்களுக்கு, அதிகாரம் வழங்கப் படுகிறது

* மனைப்பிரிவு வரன்முறையில் முடிவு எடுக்க, சென்னை பெருநகர் வளர்ச்சி குழுமமான, சி.எம்.டி.ஏ., உறுப்பினர் செயலர், நகர், ஊரமைப் புத் துறை இயக்குனருக்கு, அதிகாரம் வழங்கப் படுகிறது

* தகுதிகள்முழுமையாக இருந்து,சம்பந்தப்பட்ட அதிகாரி வரன்முறை செய்ய முடியாது என நிராகரித்தால், சென்னையில் இருப்பவர்கள், அரசிடமும், இதர பகுதிகளில் இருப்பவர்கள் நகர், ஊரமைப்பு துறையிடமும், மேல் முறையீடு செய்யலாம்.

விவசாய நிலங்களை மாற்ற அரசு புதிய கட்டுப்பாடு

விவசாய நிலங்களை அடிப்படையாக கொண்ட புதிய மேம்பாட்டு திட்டங்களுக்கு, கலெக்டர், நகரமைப்பு துறை இயக்குனரிடம், முன் அனுமதி பெறுவது கட்டாயம் என, தமிழக அரசு அறிவித்துள்ளது.இதுதொடர்பான புதிய அரசாணை மற்றும் அறிவிக்கையை, வீட்டு வசதி மற்றும் நகர்ப்புற வளர்ச்சி துறை செயலர், தர்மேந்திர பிரதாப் யாதவ், நேற்று வெளியிட்டார்.

அதன் விபரம்:

* திட்டமில்லா பகுதிகளில், விவசாய நிலத்தை வேறு தேவைக்கு பயன்படுத்த, உள்ளூர் திட்ட அமைப்பிடம் விண்ணப்பிக்கும்போது, 1,000 ரூபாய் கட்டணம் செலுத்த வேண்டும்; இது, திருப்பி தரப்பட மாட்டாது.

* உள்ளூர் திட்ட அமைப்பு, அந்த விண்ணப் பத்தை பரிசீலித்து, அனுமதி வழங்கும் முன், நகரமைப்புத்துறை இயக்குனரின் முன் அனுமதியை பெற வேண்டும்.

* நகரமைப்பு இயக்குனர் முன் அனுமதி அளிக்கும் முன், அந்த நிலம் நஞ்சையா, விவசாயம் செய்ய ஏற்றதா என்பது குறித்து, கலெக்டர், வேளாண் இணை இயக்குனர் ஆகியோரிடம் அறிக்கை பெற வேண்டும்

* அதற்கு முன், அந்த நிலத்தின் தன்மை, பயன்பாடு, ஆக்கிரமிப்பு ஆகியவை குறித்து, கலெக்டர் ஆய்வு செய்ய வேண்டும்

* வருவாய் துறை ஆவணங்கள் அடிப்படை யில், நிலத்தின் உரிமை, உண்மை தன்மை ஆகிய விபரங்களையும் ஆய்வு செய்ய வேண்டும்

* இவை அனைத்தும் திருப்தி அளித்தால் மட்டுமே, நகரமைப்புத்துறை இயக்குனர் முன் அனுமதி அளிப்பது குறித்து, முடிவு எடுக்க வேண்டும்.

* முன் அனுமதி அளிக்கும்போது, நிலத்தின் சந்தை மதிப்பில், மூன்று சதவீத தொகையை, பயன்பாடு மாற்ற கட்டணமாக வசூலிக்க வேண்டும்.இவ்வாறு அதில் கூறப்பட்டுள்ளது.

இந்த விதிமுறைகள், நீதிமன்றத்தின் அடுத்த உத்தரவின் அடிப்படையில் அமலுக்கு வரும். இதன்படி, விவசாய நிலங்களை, உரிய முன் அனுமதி இன்றி, வேறு தேவைகளுக்கு பயன்படுத்த முடியாது.

நன்றி : தினமலர் நாளிதழ் - 05.05.2017

தினமணி நாளிதழ் - மதுரை பதிப்பு - 06.05.2017 - பக்கம் 7

ஜாமீனுக்கு சொத்து ஆவணம் தேவையா? ஐகோர்ட் அதிரடி

ஜாமீனுக்கு சொத்து ஆவணம் தேவையா? ஐகோர்ட் அதிரடி

'ஜாமினில் வருவதற்கு, சொத்து ஆவணங்கள் தாக்கல் செய்யும்படி வற்புறுத்தக் கூடாது; உத்தரவாதம் தருபவர் அரசு ஊழியராகவோ, ரத்த உறவாகவோ இருக்கவும் தேவையில்லை' என, சென்னை உயர் நீதிமன்றம் உத்தரவிட்டுஉள்ளது.

நிபந்தனை :

சென்னையை சேர்ந்த சகாயம் என்பவருக்கு, முன் ஜாமின் வழங்கும் போது, சில நிபந்தனைகளை, உயர் நீதிமன்றம் விதித்தது. '15 ஆயிரம் ரூபாய்க்கு உத்தரவாதம், ரத்த உறவாக இருவரது உத்தரவாதம் வழங்க வேண்டும்' என, நிபந்தனைகள் விதிக்கப்பட்டன.

இந்த நிபந்தனைகளில் மாற்றம் செய்ய கோரி, உயர் நீதிமன்றத்தில் சகாயம் மனு தாக்கல் செய்தார். அவர் தரப்பில், '15 ஆயிரம் ரூபாய் மதிப்பிலான சொத்து ஆவணம் தாக்கல் செய்ய, செஷன்ஸ் நீதிமன்றம் உத்தரவிட்டது. ஜாமின்தாரர்களுக்கு சொத்து கிடையாது' என, தெரிவிக்கப்பட்டது.

மனுவை விசாரித்த, நீதிபதி தேவதாஸ் பிறப்பித்த உத்தரவு:

ஜாமினுக்கான உத்தரவாதத்தை குற்றம் சாட்டப்பட்டவர் வழங்கும் போது அல்லது ஜாமின்தாரர் உத்தரவாதம் வழங்கும் போது, சொத்து ஆவணங்களை தாக்கல் செய்யும்படி, வற்புறுத்த முடியாது.

ஜாமின் அளிப்பவர் அரசு ஊழியராகவோ, ரத்த உறவாகவோ, உள்ளூர்காரராகவோ இருக்க வேண்டிய அவசியம் இல்லை.

சொத்து ஆவணங்கள், கிராம நிர்வாக அதிகாரி மற்றும் தாசில்தாரின் சான்றிதழ், வாகன பதிவு சான்றிதழை, குற்றம் சாட்டப்பட்டவரோ, ஜாமின்தாரரோ சமர்ப்பிக்க வேண்டும் என, கட்டாயப்படுத்தக் கூடாது.

ஆவண நகல் :

ஜாமின்தாரர், நேர்மையான நியாயமான நபராக இருக்க வேண்டும்.

ரொக்க உத்தரவாதத்தை வழங்கும்படி, முதல்கட்டத்திலேயே வற்புறுத்தக் கூடாது. தனிப்பட்ட உத்தரவாதம் அளிக்க முடியாமல், ரொக்க உத்தரவாதம் அளிக்க முன்வந்தால், அதை ஏற்கலாம்.

பாஸ்போர்ட், குடும்ப அட்டை, பான் கார்டு, ஓட்டுனர் உரிமம், ஆதார் அட்டை போன்ற ஏதாவது ஒரு ஆவணத்தின் நகலை, அடையாளத்தை றுதிப்படுத்துவதற்காக,நீதிமன்றம் ஏற்றுக்கொள்ளலாம்.

இவ்வாறு நீதிபதி உத்தரவிட்டுள்ளார்.

(இது பற்றிய செய்தியானது மதுரை பதிப்பு தினமலர் நாளிதழில் பக்கம் 14ல் வெளியிடப்பட்டுள்ளது. அதன் நகலினை கீழே காணலாம்)

நன்றி : தினமலர் நாளிதழ் - 05.05.2017

தூக்கு!

தூக்கு!

மாணவி 'நிர்பயா' வழக்கில் நால்வருக்கு...

சுப்ரீம் கோர்ட் பரபரப்பு தீர்ப்பு

புதுடில்லி:நாட்டையே உலுக்கிய, மருத்துவ மாணவி, 'நிர்பயா'வை ஓடும் பஸ்சில் பாலியல் பலாத்காரம் செய்து, தெருவில் வீசியெறிந்து கொலை செய்த வழக்கில், நான்கு பேருக்கு விதிக்கப்பட்ட துாக்கு தண்டனையை சுப்ரீம் கோர்ட் உறுதி செய்துள்ளது.

• டில்லியைச் சேர்ந்த, 23 வயது மருத்துவ மாணவி ஒருவர், கடந்த, 2012, டிச., 16 இரவில், தன் நண்பருடன் வீடு திரும்பி கொண்டிருந்தார்.
• அப்போது, பஸ் டிரைவர் உட்பட ஆறு பேர், இவ்விருவரையும் தாக்கியுள்ளனர்.
• மேலும், ஓடும் பஸ்சில், மாணவியை, கொடூரமான முறையில் பாலியல் பலாத்காரம் செய்ததுடன், இரும்பு கம்பியால் அவருடைய பிறப்புறுப்பை தாக்கினர்.
• பின், இருவரையும் பஸ்சில் இருந்து துாக்கி வீசியது அந்த கும்பல்.

கொந்தளிப்பு

• இதில் பலத்த காயமடைந்த அந்த மாணவி, டில்லியிலும், பின், சிங்கப்பூர் மருத்துவமனை யிலும் சேர்க்கப்பட்டார்.
• ஆனால், 2012, டிச., 29ல் சிகிச்சை பலனளிக்காமல் உயிரிழந்தார்.
• கொடூரமான முறையில் நடந்த இந்த சம்பவம், நாடு முழுவதும் மிகப் பெரிய கொந்தளிப்பை ஏற்படுத்தியது.
• மாணவிக்கு, 'நிர்பயா' எனப்படும், பயமறியாதவள் என்று பெயரிட்டு, பெண்களுக்கு எதிரான வன்முறைக்கு எதிராக மிகப் பெரிய அளவில் டில்லி மற்றும் நாடு முழுவதும் போராட்டங்கள் நடந்தன.
• இந்த சம்பவத்தைத் தொடர்ந்தே, பலாத்காரம் உள்ளிட்ட குற்றங்களால் பாதிக்கப்படும் பெண்களுக்கு நிவாரணம் அளிக்கும், 'நிர்பயா நிதி' உருவாக்கப்பட்டது.
• இந்த வழக்கு தொடர்பாக விசாரணை நடத்திய போலீசார், ஒரு சிறுவன் உட்பட, ஆறு பேரை கைது செய்தனர்.
• இதில், பஸ் டிரைவர் ராம் சிங், சிறையில் துாக்கிட்டு தற்கொலை செய்து கொண்டான்.
• சிறுவனுக்கு 3 ஆண்டு:இந்த வழக்கில் தொடர்பு டைய சிறுவன் மீதான வழக்கு சிறார் கோர்ட்டில் நடந்தது.
• அதிகபட்ச தண்டனையாக, சிறார் கூர்நோக்கு இல்லத்தில் அவனை, மூன்றாண்டு அடைப் பதற்கு, 2016, ஆகஸ்டில் தீர்ப்பு அளிக்கப்பட்டது.
• இதனிடையில், குற்றம் சாட்டப்பட்டுள்ள அக்ஷய், பவன், வினய் சர்மா, முகேஷ் ஆகியோ ருக்கு மரண தண்டனை விதித்து, டில்லி கோர்ட், 2013ல் தீர்ப்பு அளித்தது.
• இந்த தண்டனையை, டில்லி ஐகோர்ட், 2014ல் உறுதி செய்தது.
• இதை எதிர்த்து தொடரப்பட்ட வழக்கை, நீதிபதிகள், தீபக் மிஸ்ரா, ஆர்.பானுமதி, அசோக் பூஷண் அடங்கிய சுப்ரீம் கோர்ட் அமர்வு விசாரித்து, நேற்று தீர்ப்பு அளித்தது.

அரிய வழக்கு

• 'டில்லி ஐகோர்ட் உறுதிசெய்துள்ள, மரண தண்டனையை உறுதி செய்கிறோம்' என, சுப்ரீம் கோர்ட் அமர்வு தன் தீர்ப்பில் கூறியுள்ளது.
• 'நிர்பயா பலாத்கார, கொலை வழக்கு, அரிதிலும் அரிதான வழக்கு.
• அதனால், இந்த வழக்கில் குற்றவாளி களுக்கு மிகவும் அதிகபட்ச தண்டனை தர வேண்டிய கட்டாயத்தில் உள்ளோம்.
• அவர்களுக் கான மரண தண்டனையை உறுதி செய்கிறோம்' என, சுப்ரீம் கோர்ட் அமர்வு கூறியுள்ளது.

சுப்ரீம் கோர்ட் தீர்ப்பு குறித்து, நிர்பயாவின் தந்தை பத்ரிநாத் சிங் கூறுகையில்,

• ''எங்களுடைய மகள் வழக்கில் நல்ல தீர்ப்பு அளிக்கப்பட்டுள்ளது; இனி நிம்மதியாக துாங்குவோம்,'' என்றார்.

வழக்கு கடந்து வந்த பாதை

• 2012, டிச., 16: டில்லியில், 23 வயது மருத்துவ மாணவி, 'நிர்பயா' நண்பருடன் இரவில், தனியார் பஸ்சில் பயணம் செய்த போது, ஆறு பேர் கொண்ட கும்பலால் கொடூரமாக கற்பழிக்கப்பட்டு, ஆயுதங்களால் தாக்கப்பட்டு, பஸ்சில் இருந்து துாக்கி வீசப்பட்டார். அவரது நண்பரும் தாக்கப்பட்டார்.
• டிச., 17: நிர்பயா, சப்தர்ஜங் மருத்துவமனையில் சேர்ப்பு.
• டிச., 17 - டிச., 21: இக்குற்றத்தில் ஈடுபட்ட பஸ் டிரைவர், ராம் சிங், அவன் சகோதரர் முகேஷ் சிங் ஆகிய இரண்டு பேரும் ராஜஸ்தானில் கைது. வினய் சர்மா, புவன் குப்தா, ஒரு சிறுவன் ஆகியோர் டில்லியில் கைது. அக் ஷய் தாகூர், அவுரங்காபாத்தில் கைது.
• டிச., 21: பாலியல் வன்கொடுமைக்கு உள்ளான மாணவி, சப்தர்ஜங் மருத்துவமனையில்மாஜிஸ்தி ரேட்டிடம் வாக்குமூலம்.
• டிச., 26: குற்றவாளிகளை துாக்கிலிட வலியுறுத்தி நாடு முழுவதும் போராட்டம்.
• டிச., 27:நிர்பயா, மேல் சிகிச்சைக்காக சிங்கப்பூர் மவுன்ட் எலிசபெத் மருத்துவமனைக்கு கொண்டு செல்லப்பட்டார்.
• டிச., 29: சிகிச்சை பலனின்றி, அதிகாலை, 2:15 மணிக்கு உயிரிழந்தார். பாலியல் குற்றங்களுக்கு கடுமையான தண்டனை வழங்கும் சட்டம், பார்லிமென்டில் தாக்கல்.
• 2013 ஜன., 3: கற்பழிப்பு, கொலை, கடத்தல், ஆவணங்களை அழித்தல் ஆகிய பிரிவுகளில் ஐந்து குற்றவாளிகள் மீது வழக்கு பதிவு. ஆறு பேரில் மைனர் குற்றவாளி வழக்கு மட்டும், சிறுவர் கோர்ட்டுக்கு மாற்றம்.
• ஜன., 17: டில்லி சாகேட் விரைவு கோர்ட்டில் விசாரணை துவங்கியது.
• மார்ச் 11: திகார் சிறையில் அடைக்கப்பட்டிருந்த முக்கிய குற்றவாளியான ராம் சிங், துாக்கிட்டு தற்கொலை. மற்ற ஐந்து பேர் மீதான விசாரணை தொடர்ந்தது.
• ஆக., 31: குற்றம் நிரூபிக்கப்பட்ட மைனர் குற்றவாளிக்கு மூன்று ஆண்டு சிறை தண்டனை.
• செப்., 3: விரைவு கோர்ட்டில் விசாரணை முடிந்தது; தீர்ப்பு செப்., 10ல் வெளியாகும் என அறிவிப்பு.
• செப்., 10: இவ்வழக்கில் குற்றம் சாட்டப்பட்ட நான்கு பேரும் குற்றவாளிகள் என கோர்ட் தீர்ப்பு. 13 பிரிவுகளில் இவர்களது குற்றம் நிரூபிக்கப்பட்டுஉள்ளது.
• செப்., 11: இரு தரப்பு விசாரணை நிறைவு. தீர்ப்பு செப்., 13க்கு ஒத்திவைப்பு.
• செப்., 13: குற்றவாளிகளான அக் ஷய் தாகூர், பவன் குப்தா, வினய் சர்மா, முகேஷ் சிங் ஆகிய நான்கு பேருக்கும் மரண தண்டனை வழங்கி சிறப்பு கோர்ட் தீர்ப்பு.
• 2014 ஜன., 3: சிறப்பு நீதிமன்றத்தின் தீர்ப்பை உறுதி செய்து டில்லி உயர் நீதிமன்றம் உத்தரவு.
• 2014 ஜூன் 2: குற்றவாளிகள் இருவர் இத் தீர்ப்பை எதிர்த்து உச்ச நீதிமன்றத்தில் மேல் முறையீடு.
• 2014 ஜூலை 14: குற்றவாளிகளின் துாக்கு தண்டனைக்கு இடைக்கால தடை.
• 2015 டிச.: மைனர் குற்றவாளியை விடுவிக்கக் கூடாது என பா.ஜ.,வின் சுப்பிரமணியன் சாமி டில்லி உயர் நீதிமன்றத்தில் மனு.
• 2015 டிச., 18: இம்மனுவை விசாரித்த நீதிமன்றம் இதை தள்ளுபடி செய்தது.
• டிச., 20: மைனர் குற்றவாளிக்கு விதிக்கப்பட்ட மூன்று ஆண்டு சிறை தண்டனை முடிந்ததால், விடுதலை.
• 2016 ஏப்., 3: உச்ச நீதிமன்றத்தில் விசாரணை துவக்கம்.
• 2017 மே 5: நான்கு பேருக்கும் மரண தண்டனை விதித்த டில்லி உயர் நீதிமன்றம் தீர்ப்பை, சுப்ரீம் கோர்ட் உறுதி செய்தது.

நன்றி : தினமலர் நாளிதழ் - 05.05.2017

பிளஸ் 1, பிளஸ் 2 சேர்க்கையில் பாடப்பிரிவு வாரியாக இட ஒதுக்கீடு

பிளஸ் 1, பிளஸ் 2 சேர்க்கையில் பாடப்பிரிவு வாரியாக இட ஒதுக்கீடு

அனைத்து மேல்நிலைப் பள்ளிகளும் பின்பற்ற இயக்குநர் உத்தரவு

பிளஸ் 1, பிளஸ் 2 மாணவர் சேர்க்கையில் பாடப்பிரிவு வாரியாக இட ஒதுக்கீடு பின்பற் றப்பட வேண்டும் என்று அனைத்து மேல்நிலைப் பள்ளிகளுக்கும் பள்ளிக்கல்வி இயக்குநர் ஆர்.இளங்கோவன் உத்தரவு பிறப்பித்துள்ளார்.

இது தொடர்பாக அனைத்து மாவட்ட முதன்மைக் கல்வி அதிகாரிகள் மற்றும் மாவட்ட கல்வி அதிகாரிகளுக்கும் அவர் அனுப்பி யுள்ள சுற்றறிக்கையில் கூறி இருப்பதாவது:

மேல்நிலைப் பள்ளிகளில் மாணவர் சேர்க்கையின்போது நடைமுறையில் உள்ள இட ஒதுக்கீடு விதிகள் பாடப்பிரிவுகள் வாரியாக (குரூப் வாரியாக) கடைபிடிக்கப்பட வேண்டும் என்றும் மேல்நிலைப் பள்ளிகள் அங்கீகாரம் வழங்கும் விதிகளில் குறிப்பிடப்பட்டுள்ளது.

இட ஒதுக் கீடு தொடர்பான சட்டங்களின்படி, 2017-18-ம் கல்வி ஆண்டிலும் மேல்நிலைக் கல்விக்கான மாணவர் சேர்க்கையில் மாநில அரசின் அதிகார வரம்புக்குள் செயல்படும் அனைத்து வகை பள்ளிகளும் (சிறுபான்மை பள்ளிகள் தவிர) பின்வரும் விகிதத்தில் இட ஒதுக்கீடு பின்பற்றப்பட வேண்டும்.

பொதுப் பிரிவினர் (ஓசி) - 31 சதவீதம்

பழங்குடியினர் (எஸ்டி) - 1 சதவீதம்

ஆதி திராவிடர் (எஸ்சி) - 18 சதவீதம் (இதில் 3 சதவீதம் அருந்ததியினருக்கு)

மிகவும் பிற்படுத்தப்பட்டோர் மற்றும் சீர்மரபினர் (எம்பிசி, டிஎன்சி) - 20 சதவீதம்பிற்படுத்தப்பட்ட முஸ்லிம் - 3.5 சதவீதம்

பிற்படுத்தப்பட்டோர் (பிசி) - 26.5 சதவீதம்

மேற்கண்ட இட ஒதுக்கீடு முறையில், முதலில் பொதுப் பிரிவினருக்கான 31 சதவீத இடத் துக்கான பட்டியல் தயாரிக்கப்பட வேண்டும்.

அதில் மாணவர்கள் பெற்ற மதிப்பெண் அடிப்படை யில் மட்டுமே முன்னுரிமை வழங்கப்பட வேண்டும்.

இந்த பட்டியலை ஓசி, பிசி, எம்பிசி என எந்தவித பாகுபாடும் இல்லாமல் தயாரித்து அதன் பின்னர் அந்தந்த பிரிவினருக்கான பட்டியல் தயாரிக்கப்பட வேண்டும்.

மாநிலத்தின் அதிகார வரம்புக்குள் செயல்படும் அனைத்து வகை பள்ளிகளிலும் (சிறுபான்மை கல்வி நிலையங்கள் நீங்கலாக) பாடப்பிரிவு வாரியாக (Group-wise) இட ஒதுக் கீடு முறை பின்பற்றப்பட்டு மாணவர் சேர்க்கை நடைபெற வேண்டும்.

இவ்வாறு அந்த சுற்றறிக் கையில் கூறப்பட்டுள்ளது.

நன்றி : தி இந்து தமிழ் நாளிதழ் – 04.05.2017