நீதிபதிகளை விமர்சிக்கலாமா?

நீதிபதிகளை விமர்சிக்கலாமா? 

விமர்சனத்துக்கான அளவுகோல் என்ன?

“ஜெயலலிதாவை நிரபராதி என்று விடுதலை செய்கிறேன். சசிகலா, சுதாகரன், இளவரசி ஆகியோருக்கு இந்த வழக்கில் பெரிய பங்கு இல்லை என்பதால், அவர்களையும் விடுதலை செய்கிறேன்” என்று கர்நாடக உயர் நீதிமன்ற நீதிபதி குமாரசாமி, மே 11, 2015 அன்று, தீர்ப்பை வாசித்ததும், இணையதளம், ஃபேஸ்புக், ட்விட்டர், வாட்ஸ்அப் என தொலைத் தொடர்பு சாதனங்கள் அனைத்தும் ‘நெட் டிராஃபிக்’ பிரச்னையில் சிக்கித் திணறின. அடுத்த சில நொடிகளில், சமூக வலைத்தளங்களின் ‘டிரெண்ட்’டில், டாப்பில் இருந்தவர்கள், ஜெயலலிதாவும் நீதிபதி குமாரசாமியும்தான்.

அந்த சமயத்தில், சர்ச்சைக்குரிய அறிக்கை ஒன்றை வெளியிட்டார், தமிழ்நாடு – பாண்டிச்சேரி பார் கவுன்சில் தலைவர் செல்வம். அதில், ‘நீதிபதி குமாரசாமியையையும் அவருடைய தீர்ப்பையும் உள்நோக்கத்துடன் விமர்சனம் செய்பவர்கள் மீது கடுமையான நடவடிக்கை எடுக்கப்படும்’ என்று எச்சரித்திருந்தார். அந்த அறிக்கையும் சமூக வலைத்தளங்களில் கடுமையான விமர்சனத்துக்கு உள்ளானது.

பார் கவுன்சில் தலைவர் செல்வத்தின் அறிக்கைக்குப் பதில் அளிக்கும் விதமாக, தமிழ்நாடு வழக்கறிஞர்கள் சங்கம் அறிக்கை வெளியிட்டது. அதில், ‘‘செல்வத்தின் இந்தக் கருத்து தவறானது. ஜனநாயக அமைப்பில், நீதிமன்றத் தீர்ப்பை யார் வேண்டுமானாலும் விமர்சனம் செய்யலாம். தமிழ்நாடு – பாண்டிச்சேரி பார் கவுன்சில் தலைவர் நடுநிலைமையோடு நடந்து கொள்ள வேண்டும்” என்று சொல்லப்பட்டு இருந்தது.

இந்த நிலையில், நீதிபதிகள் விமர்சனத்துக்கு அப்பாற்பட்டவர்களா? நீதிமன்றத் தீர்ப்புகளை விமர்சிக்கக் கூடாதா?என்ற கேள்விகளை, மூத்த வழக்கறிஞர்கள் மற்றும் சட்ட வல்லுநர்கள் முன்பாக வைத்தோம். அவர்களின் கருத்துகள்…

‘‘அப்படியானால் மேல்முறையீடு செய்வதே தவறா?”

மூத்த வழக்கறிஞர் துரைசாமி: “நீதிமன்றம் வழங்கிய ஒரு தீர்ப்பு விமர்சனத்துக்கு அப்பாற்பட்டது என்றால், அந்தத் தீர்ப்பை எதிர்த்து மேல்முறையீடு செய்ய முடியாதே. மேல்முறையீட்டு வழக்கை நடத்தும் வழக்கறிஞர், ‘கீழ் நீதிமன்றத்தின் தீர்ப்பு தவறானது. பொருத்தமில்லாதது. நீதிபதி இந்த வழக்குக்குப் பொருந்தாத வகையில் தீர்ப்பளித்துள்ளார்’ என்று சொல்லித்தான் மனுச் செய்கிறார். அதை ஏற்றுக்கொண்டுதான் அந்த மனுவையே விசாரணைக்கு எடுக்கிறது, மேல் நீதிமன்றம்.

கீழ் நீதிமன்றத்தில் நீதிபதி அளித்த தீர்ப்பு தவறானது என்று மேல் நீதிமன்றத்தில் குறிப்பிடப்படுவதற்கு என்ன அர்த்தம்? அங்கு நீதிபதியும் விமர்சிக்கப்படுகிறார் என்றுதான் அர்த்தம். அதேசமயம், நீதிபதிகளின் மீதான விமர்சனம், அவர் வழங்கிய தீர்ப்பின் அடிப்படையில் இருக்கலாமே தவிர, தனிப்பட்ட முறையில் இருக்கக் கூடாது. உதாரணத்துக்கு, ஜெயலலிதா வழக்கில் கணக்கைக் தவறாகப் போட்டுக் காட்டி, ஜெயலலிதாவை விடுதலை செய்துள்ள நீதிபதி குமாரசாமியின் தீர்ப்பை விமர்சிக்கலாம். குமாரசாமி தனக்கிருக்கும் அறிவை சரியாகப் பயன்படுத்தாமல் அல்லது முழுமையாகப் பயன்படுத்தாமல், தீர்ப்பை வழங்குவதில் தவறு செய்துள்ளார் என்று குறிப்பிட்டால் அது தவறில்லை. அதாவது, விமர்சனம் தவறில்லை. ஆனால், உள்நோக்கம் கற்பிப்பது தவறு. ஒரு நீதிபதி உள்நோக்கத்துடன் இந்தத் தீர்ப்பை எழுதி உள்ளார், ஆதாயம் அடைந்துள்ளார், பணம் வாங்கி உள்ளார் என்று விமர்சித்தால், அது உள்நோக்கம் கொண்ட விமர்சனம். அது தவறு.

1956-ம் ஆண்டு, திருச்சி மாவட்ட கலெக்டராக இருந்தவர் மலையப்பன். அவர் பிறப்பித்த மாவட்ட உத்தரவு ஒன்றை எதிர்த்து, அந்தப் பகுதி நிலச்சுவான்தார்கள், சென்னை உயர் நீதிமன்றத்தில் வழக்குத் தொடுத்தனர். வழக்கை விசாரித்த நீதிபதிகள் தங்களுடைய தீர்ப்பில், வழக்குக்கும் தீர்ப்புக்கும் சம்பந்தம் இல்லாத வகையில், தனிப்பட்ட முறையில் கலெக்டர் மலையப்பனைக் கடுமையாகச் சாடி இருந்தனர். அத்துடன், மலையப்பனுக்கு பதவி உயர்வு கொடுக்கக் கூடாது என்றெல்லாம் குறிப்பிட்டு தீர்ப்பெழுதி இருந்தனர். இதையடுத்து, டிவிஷன் பெஞ்ச் நீதிபதிகளின் தீர்ப்பில் உள்நோக்கம் உள்ளது என்று சொல்லி அந்தத் தீர்ப்பை பெரியார் தீயிட்டுக் கொளுத்தினார். பெரியார் மீது நீதிமன்ற அவமதிப்பு வழக்குத் தொடுக்கப்பட்டது.

அந்த வழக்கை விசாரித்த நீதிபதிகள் வி.வி.ராஜமன்னார், பஞ்சாபசேச அய்யர் ஆகியோர் முன்பாக, பெரியார் 75 பக்கத்தில் தனது பதிலைக் கொடுத்தார். அதில், மலையப்பன் ஒரு பிற்படுத்தப்பட்ட சமூகத்தைச் சேர்ந்தவர் என்பதால்தான், டிவிஷன் பெஞ்ச் நீதிபதிகள் அவரை இப்படிச் சாடி உள்ளனர் என்று குற்றம்சாட்டினார் பெரியார். இதையடுத்து நீதிபதிகள், ‘தீர்ப்பை பெரியார் விமர்சனம் செய்தது தவறில்லை. ஆனால், தீர்ப்பை வழங்கிய நீதிபதிகளின் சாதியைக் குறிப்பிட்டு பெரியார் உள்நோக்கம் கற்பித்தது தவறு’ என்று சொல்லி அவருக்கு நூறு ரூபாய் அபராதம் விதித்தனர். ஒரு தீர்ப்பைப் பற்றிய விமர்சனத்துக்கும் உள்நோக்கத்தோடு விமர்சிப்பதுக்கும் உள்ள வித்தியாசத்துக்கு இந்த வழக்குதான் சிறந்த உதாரணம்.”

கண்ணியமான மொழியில் விமர்சிக்கலாம்!

மூத்த வழக்கறிஞர் ராதாகிருஷ்ணன்: “கண்ணியமான மொழியில் எந்த ஒரு தீர்ப்பையும் அதை வழங்கிய நீதிபதியையும் யார் வேண்டுமானாலும் விமர்சனம் செய்யலாம்; அது குற்றமாகாது. சட்டத்தின் துணைகொண்டு தீர்ப்புகளை விமர்சிக்கலாம். அரசியலமைப்புச் சட்டத்தின் நலனைக் கருத்தில் கொண்டு விமர்சிக்கலாம். சமூக மேம்பாடு என்னும் லட்சியத்துடன் தீர்ப்புகளை விமர்சிக்கலாம். ஆனால், இந்த விமர்சனங்கள் நியாயமாக இருக்க வேண்டும்.

ஆனால், நியாயமான விமர்சனம் என்பது எது? அதற்கான அளவுகோல் என்ன என்பதே கேள்வியாக இருக்கிறது. 

ஒரு நீதிபதி, தீர்ப்பில் இழைத்துள்ள தவறுகளைச் சுட்டிக்காட்டி தீர்ப்பு திருத்தப்பட வேண்டும் என்று பேசுவதும் விமர்சிப்பதும் நியாயமான விமர்சனம். அதை நீதிமன்ற அவமதிப்பாகக் கொள்ளமுடியாது. 

ஆனால், குற்றவாளியை விடுதலை செய்ய வேண்டும் என்பதற்காகவே நீதிபதி தீர்ப்பை எழுதியிருக்கிறார். அதற்காக அவர் ஆதாயம் அடைந்திருக்கிறார் என்று பேசுவது, நீதிமன்ற அவமதிப்பு.”

ஆரோக்கியமான விமர்சனங்களுக்குத் தடையில்லை!

ஓய்வுபெற்ற உயர் நீதிமன்ற நீதிபதி கே.சந்துரு: “தீர்ப்புகளை ஆரோக்கியமாக விமர்சனம் செய்வதற்கு சட்டத்தில் தடையில்லை. 1971-ம் வருட நீதிமன்ற அவமதிப்பு சட்டத்தின் ஐந்தாவது பிரிவில், ‘ஒரு வழக்கு விசாரிக்கப்பட்டு, இறுதியாகத் தீர்ப்பு வழங்கியபின் அதன்மீது வைக்கப்படும் நியாயமான விமர்சனம் நீதிமன்ற அவமதிப்பாகக் கருதப்படாது’ என்று கூறப்பட்டுள்ளது. 1993-ல் உச்ச நீதிமன்றம் ரோஷன்லால் அகுஜா என்ற வழக்கில் கொடுத்த தீர்ப்பில், ‘நீதிபதிகளும், நீதிமன்றங்களும் முறையான, நியாயமான விமர்சனங்களைப் பார்த்து உணர்ச்சிவசப்படாமலும், பாதிக்கப்படாமலும் இருக்கக் கற்றுக்கொள்ள வேண்டும்’ என்று மற்ற நீதிமன்றங்களுக்கு அறிவுறுத்தியுள்ளது.

சமீபகாலங்களில், இந்தியாவில் நீதிமன்ற நடவடிக்கைகள் முன்னெப்போதும் இல்லாத வகையில் பொதுவெளியில் கவனத்தைப் பெறுவதுடன் விமர்சனத்துக்கும் உள்ளாக்கப்படுகின்றன.

ஒரு வகையில், இந்தப் போக்கு வரவேற்கத்தக்கது. அதேசமயத்தில், மக்கள் தாங்கள் விரும்பும் தலைவர்கள் மற்றும் கலைஞர்கள் குற்றத்துக்கு உள்ளாகி தண்டனை பெறும்போது உணர்ச்சிவசப்பட்டு சட்டத்தின் வரையறை புரியாமல் எதிர்ப்பு தெரிவிக்க முயலுவது வருந்தத்தக்கது. சட்டத்தின் மாட்சியை அது அவமானத்துக்கு உள்ளாக்குகிறது. இப்படிப்பட்ட சூழலில் அட்வகேட் ஜெனரல் அல்லது அவருடைய அனுமதியைப் பெற்ற தனிநபர் மட்டுமே அவதூறு வழக்குத் தொடரலாம். நினைத்தவர்கள் எல்லாம் வழக்குத் தொடங்க முடியாது.

குற்றம் நிரூபிக்கப்பட்டால் ஆறு மாதம் சிறை அல்லது 2,000 ரூபாய் அபராதம் அல்லது இரண்டும் வழங்கப்படும். இப்படி நீதிமன்றங்களை முறைகேடாக விமர்சனம் செய்து தண்டனை பெற்றவர்கள் ஏராளம்!”

நன்றி : ஜூனியர் விகடன் - 24.05.2015

நீதிமன்றம் தானாகவே ஜாமீன் வழங்கலாமா?

நீதிமன்றம் தானாகவே ஜாமீன் வழங்கலாமா?

உயர் நீதிமன்ற வழக்கறிஞர், யு.எம்.ரவிச்சந்திரன் கூறுகிறார்

சாதாரணமாக, ஒரு வழக்கில் ஒருவரை கைது செய்து, மாஜிஸ்திரேட் முன் ஆஜர்படுத்தும் போது, போலீஸ் தரப்பில், 'ரிமாண்ட்' அறிக்கை அளிக்க வேண்டும். அதை பரிசீலித்த பின், காவலில் வைக்கும்படி, மாஜிஸ்திரேட் உத்தரவிடுவார். சாதாரண குற்ற வழக்குகளில், 60 நாட்களிலும், கடுமையான குற்றங்கள் தொடர்பான வழக்குகளில், 90 நாட்களிலும் குற்றப்பத்திரிகை தாக்கல் செய்யப்பட வேண்டும். அதன்படி, மாஜிஸ்திரேட்டும், 60 நாட்கள், 90 நாட்கள் வரை, காவலை நீட்டிப்பு செய்யலாம்.

இந்த நாட்களுக்குள் குற்றப்பத்திரிகை தாக்கல் செய்யப்படவில்லை என்றால், அதன்பின் காவலை நீட்டிக்க முடியாது. காவல் நீட்டிப்பு செய்யும்படி, போலீஸ் தரப்பில் கோரவில்லை என்றாலும், மாஜிஸ்திரேட்டுக்குரிய அதிகாரத்தின்படி, ஜாமினில் விடுவிக்க முடியும்.

ஜாமின் மனுவை, குற்றவாளி தரப்பில் தாக்கல் செய்யவில்லை என்றாலும், விசாரணைக்கு அவர் தேவையில்லாத பட்சத்தில், சிறையில் இருக்க வேண்டிய அவசியம் எழவில்லை. புலன் விசாரணை அதிகாரி, குற்றவாளியை காவலில் வைக்கும்படி கோராத போது, மாஜிஸ்திரேட், தனக்குரிய அதிகாரத்தை செயல்படுத்தி, ஜாமின் வழங்கி இருக்கலாம்.

விசாரணைக்கு குந்தகம் விளைவிப்பார்; சாட்சியங்களை கலைப்பார் என, கருதினால் மட்டுமே, ஒருவரை சிறையில் வைக்க முடியும். தனிமனித சுதந்திரம், ஒவ்வொருவருக்கும் அரசியலமைப்பு சட்டத்தில் வரையறுக்கப்பட்டுள்ளது.

கடந்த, 1984ல் நடந்த ஆசிரியர்கள் போராட்டத்தின் போது, அவர்கள் சிறையில் அடைக்கப்பட்டனர். 15 நாட்களுக்கு பின், காவல் நீட்டிப்புக்காக ஆஜர்படுத்தப்பட்டனர். அப்போது, கோவையில், மாஜிஸ்திரேட்டாக நான் இருந்தேன்.

ஆசிரியர்கள், ஜாமினில் செல்ல விரும்பவில்லை. ஆனால், அவர்களை சிறையில் வைக்க நான் விரும்பவில்லை. அதனால், காவல் நீட்டிப்பு தேவையில்லை; சொந்த ஜாமினில் விடுவிக்கும்படி, நான் உத்தரவிட்டேன்.

எனவே, சிறையில் இருப்பவர், ஜாமின் கோரவில்லை என்றாலும், அவரை ஜாமினில் விட, நீதிமன்றத்துக்கு அதிகாரம் உள்ளது. அது, அந்தந்த நீதிபதிகளைப் பொறுத்தது.

(ஜாமீனில் வெளிவரலாமா வைகோ? என்ற செய்தியில் இருந்து தலைப்புக்குத் தேவையானது மட்டும் எடுக்கப்பட்டுள்ளது.)

நன்றி : தினமலர் நாளிதழ் - 20.05.2017 

வங்கியில் மோசடி : 6 பேருக்கு சிறை

வங்கியில் மோசடி : 6 பேருக்கு சிறை

மதுரை: மதுரை பஞ்சாப் நேஷனல் வங்கியில் கடன் பெற்று, மோசடியில் ஈடுபட்டதாக, முன்னாள் மேலாளர் செல்வராஜ் உட்பட நால்வருக்கு ஏழு ஆண்டுகள், இருவருக்கு ஐந்து ஆண்டுகள் சிறை தண்டனை விதிக்கப்பட்டது. மதுரை மேல மாசி வீதியில் பஞ்சாப் நேஷனல் வங்கி செயல்படுகிறது. இங்கு, 2003ல் மேலாளராக இருந்தவர் செல்வராஜ். அந்த ஆண்டில், மகால், ஐந்தாவது தெருவில் ஜவுளி நிறுவனம் நடத்துவதாக கூறி, ஐந்து பேர் வங்கியில் போலி ஆவணங்களை கொடுத்து, 26.83 லட்சம் ரூபாய் கடன் பெற்று மோசடி செய்தனர்.

இது குறித்து, சி.பி.ஐ., விசாரித்து, கடன் வாங்கிய ஐந்து பேர் மற்றும் வங்கி மேலாளர் மீது வழக்கு பதிவு செய்தது.

இவ்வழக்கு மதுரை, சி.பி.ஐ., சிறப்பு நீதிமன்றத்தில் நடந்தது. வழக்கில், இருவருக்கு தலா, ஐந்து ஆண்டுகள் சிறையும், 35 ஆயிரம் ரூபாய் அபராதமும், மேலாளர் செல்வராஜ் உட்பட நான்கு பேருக்கு தலா, ஏழு ஆண்டுகள் சிறையும், 50 ஆயிரம் ரூபாய் அபராதமும் விதித்து, நீதிபதி கணேசன் தீர்ப்பளித்தார்.

நன்றி : தினமலர் நாளிதழ் - 20.05.2017

பத்திரப்பதிவு செலவுக்கு வரிச் சலுகை உண்டா?

பத்திரப்பதிவு செலவுக்கு வரிச் சலுகை உண்டா?

வங்கியில் வாங்கிய வீட்டுக் கடனுக்கு வழங்கப்படும் வரிச் சலுகை பற்றி உங்களுக்குத் தெரிந்திருக்கும். வாங்கிய வீட்டை பத்திரப் பதிவு செய்யும்போது செய்யப்படும் தொகைக்கும் வரிச் சலுகை பெற முடியும். ஆனால், அதற்காக வரிச் சலுகை பெறுவது பற்றி பலருக்கும் விழிப்புணர்வு இல்லை அல்லது தெரிந்திருந்தாலும் கண்டுகொள்வதில்லை.

புதிதாக வீடு வாங்க உத்தேசிக்கும்போதே பத்திரப்பதிவுக்கான செலவையும் சேர்த்து சிந்திப்பார்கள். நகர்ப்புறங்கள் என்றால் பத்திரப்பதிவுக்கான செலவு மட்டும் ஒரு லட்சம் ரூபாயையும் தாண்டி வந்துவிடும். வரிச் சலுகை என்று வரும்போது வீட்டுக்கடனுக்கு வாங்கிய தொகைக்கு உண்டு. தற்போதைய நிலையில் வீட்டுக் கடனில் வாங்கிய வீட்டில் குடியிருப்பவருக்கு 2 லட்சம் ரூபாய் வரை வரிச் சலுகை வழங்கப்படுகிறது. அந்த வரிச் சலுகையை வீட்டுக் கடன் வாங்கிய அனைவரும் நிச்சயம் பயன்படுத்திக்கொள்வார்கள். ஆனால், பத்திரப்பதிவுக்கான செலவும் என்பதும் வீட்டுக்காக வாங்கியது என்பதால் அதற்கும் வரிச் சலுகை உண்டு.

பத்திரப்பதிவு செலவு என்பது சொத்து அமைந்துள்ள இடத்தின் அரசு வழிகாட்டி மதிப்பு (கைடு லைன் வேல்யூ) என்னவோ அதையொட்டி செலவு இருக்கும். அரசு வழிகாட்டி மதிப்பு அதிகமாக இருந்தால் முத்திரைக் கட்டணச் செலவும் அதிகமாக இருக்கும். குறிப்பாக நகர்ப்புறங்களில் அரசு வழிகாட்டி மதிப்பு அதிகமாக இருக்கும். நகர்ப்புறங்களில் சொத்து வாங்கி பத்திரப்பதிவு செய்பவர்களுக்கு செலவு மிகக் கூடுதலாகவே இருக்கும். இப்படி செய்யப்படும் தொகைக்கும் வரிச் சலுகை கோர முடியும்.

அந்த வரிச் சலுகை எப்படி வழங்கப்படுகிறது?
இந்த வரிச் சலுகை என்பது மனையின் மதிப்பில் 8 சதவீதமாக செலுத்தப்படும் முத்திரைக் கட்டணத்துக்கு மட்டும்தான் வழங்கப்படுகிறது. அதாவது, உங்களுடைய வீட்டுடன் சேர்ந்து மனையை வாங்கினால் வீட்டின் மதிப்புக்கு கட்டும் முத்திரைக் கட்டணத்துக்கு இந்த வரிச் சலுகை கிடையாது. அடுக்குமாடி குடியிருப்பு என்றால் யு.டி.எஸ். எனப்படும் பிரிக்கப்படாத மனையின் மதிப்பில் 8 சதவீதம் தொகையாக கட்டப்படும் முத்திரைத்தாள் கட்டணத்துக்கு வரி விலக்கு வழங்கப்படுகிறது. அதுவே இப்போது வசூலிக்கப்படும் கட்டுமான ஒப்பந்த பதிவுக்கான 2 சதவீத தொகைக்குக் கிடையாது. செலுத்தப்படும் பிற வரிகளுக்கும் கிடையாது.

இந்த வரிச் சலுகையை நீங்கள் எந்த நிதியாண்டில் செலவு செய்தீர்களோ அந்தக் குறிப்பிட்ட ஆண்டுக்கு மட்டுமே வருமான வரிச் சட்டம் 80 சி பிரிவின் கீழ் கோரலாம். ஒரு வேளை 8 சதவீத முத்திரைக் கட்டணத்தைத் தாண்டி செலவு செய்திருந்தால், அதற்குரிய தொகையைக் கழித்து விட்டு மீதி தொகைக்கு மட்டும் வரி கட்டினால் போதுமானது. இந்த வரிச் சலுகையைக் கோர வருமான வரிக் கணக்கு தாக்கல் செய்யும்போது ஆவணங்கள் இணைக்க வேண்டும். பத்திரப்பதிவுக்காக செலவு செய்த ரசீதின் நகலை இணைக்க வேண்டியிருக்கும்.

அதே நேரத்தில் நீங்கள் லே அவுட் மனையையோ அல்லது நிலத்தையோ மட்டும் வாங்கி செலவு செய்யும் முத்திரைக் கட்டணத்துக்கு எந்த வரிச் சலுகையும் கிடையாது. வீட்டு மனையை தவணை அல்லது கடனில் அல்லது ஒரே தவணையில் செலுத்தி வாங்கியிருந்தாலும் வரிச் சலுகை கிடைக்காது.

உமா

நன்றி : தி இந்து தமிழ் நாளிதழ் - 20.05.2017

ரியல் எஸ்டேட் சட்டம்: நடைமுறைச் சிக்கல்கள் என்னென்ன?

ரியல் எஸ்டேட் சட்டம்: நடைமுறைச் சிக்கல்கள் என்னென்ன?

பல ஆண்டுகளாக எதிர்பார்க்கப்பட்ட ‘ரியல் எஸ்டேட் மசோதா’ என்று சுருக்கமாக அழைப்படும் ‘ரியல் எஸ்டேட் ஒழுங்குமுறை மற்றும் வளர்ச்சி’ மசோதா நாடு முழுவதும் கடந்த ஆண்டு நடைமுறைக்கு வந்தது. மகாராஷ்டிரா, மேற்கு வங்காளம், ஹரியானா உள்ளிட்ட மாநிலங்கள் மற்றும் யூனியன் பிரதேசங்கள் இந்த மசோதாவில் உள்ள சட்ட விதிகளை ஏற்கெனவே அமல்படுத்தியிருக்கின்றன. தற்போதுதான் தமிழகத்தில் இந்தச் சட்ட விதிகள் நடைமுறைப்படுத்தப்பட்டுள்ளன. ஆனால், இந்த மசோதாவில் உள்ள முழுமையான சட்ட விதிகளை அமல்படுத்த தொடர்ந்து பல மாநிலங்களில் தாமதம் செய்யப்பட்டு வருகின்றன. இதன் காராணமாக இந்த மசோதா சட்ட விதிகள் அமலாவதில் தொடர்ந்து கால தாமதம் ஏற்பட்டு வருகிறது.

கடந்த ஐக்கிய முற்போக்குக் கூட்டணி ஆட்சியில் கொண்டு வரப்பட்டது ரியல் எஸ்டேட் ஒழுங்குமுறை மற்றும் வளர்ச்சி மசோதா. ஆனால், இந்த மசோதாவை ரியல் எஸ்டேட் தொழிலில் உள்ளவர்கள் பரவலாக எதிர்த்தனர். மத்தியில் பா.ஜ.க. ஆட்சிக்கு வந்த பிறகு அந்த மசோதாவில் மேலும் பல திருத்தங்கள் செய்யப்பட்டன. அப்படித் திருத்தப்பட்ட மசோதாதான் சென்ற ஆண்டு நடைமுறைக்கு வந்தது. ஒவ்வொரு மாநிலமும் இந்த மசோதாவில் உள்ள சட்ட விதிகளை இறுதி செய்து நடைமுறைப்படுத்த வேண்டும் என்பது மத்திய அரசின் வழிகாடுதல் ஆகும்.

அதாவது, அந்தந்த மாநில அரசுகள் இந்தச் சட்டத்தை நடைமுறைப்படுத்தும் வகையில் விதிகளை உருவாக்கி அறிவிக்க வேண்டும். இதன்படி சில மாநிலங்கள் விதிகளை உருவாக்கி அமல்படுத்தியிருக்கின்றன. தமிழக அரசு சட்ட விதிகளைக் கடந்த ஜனவரியில் இறுதி செய்து, தற்போது நடைமுறைப்படுத்தியிருக்கிறது.

ரியல் எஸ்டேட் ஒழுங்குமுறை மற்றும் வளர்ச்சி மசோதாவில் மொத்தம் 92 சட்ட விதிகள் இடம் பெற்றிருக்கின்றன. ஆனால், இவற்றில் 59 சட்ட விதிகள் மட்டுமே இதுவரை செயல்வடிவம் பெற்றிருக்கின்றன. மீதமுள்ள சட்ட விதிகள் இந்த மாதத்துக்குள் அமலுக்கு வந்துவிடும் என எதிர்பார்க்கப்படுகிறது. ஆனால், சட்ட விதிகளுக்கு செயல்வடிவம் கொடுப்பதற்கானப் பணிகளை முடிப்பதில் பல மாநில அரசுகள் மிகவும் தாமதம் செய்து வருகின்றன. எனவே சட்ட விதிகளை அமலாக்க மேலும் தாமதமாகும் சூழல் ஏற்பட்டுள்ளது.

இந்த மசோதா சட்ட விதிகளை 2017-ம் ஆண்டு ஏப்ரல் இறுதிக்குள் முழுமையாக அமல்படுத்திவிட வேண்டும் என்ற காலக்கெடு இருந்தும், மாநில அரசுகள் இதில் சுணக்கம் காட்டி வருகின்றன. இதில் சில மாநில அரசுகள் இடைக்காலமாக சட்ட விதிகளை ஏற்படுத்திவிட்டு, அடுத்த கட்டத்துக்கு நகராமல் இருக்கின்றன. இதன் காரணமாக நாடு முழுவதும் முழுமையாக அமலாகியிருக்க வேண்டிய ரியல் எஸ்டேட் ஒழுங்கு முறை மற்றும் வளர்ச்சி மசோதா தொடர்ந்து தாமதமாகிவருகிறது. இதனால் வீடு வாங்குபவர்களுக்கான நலன்களும் தொடர்ந்து பாதிக்கப்பட்டு வருகின்றன.

இந்த மசோதாவில் மத்திய அரசின் சட்ட விதிகளின்படி தற்போது செயல்படுத்தப்பட்டிருக்கும் கட்டுமானத் திட்டங்களுக்கு ஜூலை இறுதிக்குள் நிறைவுச் சான்றிதழ் (Completion certificate) பெற வேண்டும் என்றும் அதை ரியல் எஸ்டேட் ஒழுங்குமுறை ஆணையத்தில் பதிவு செய்ய வேண்டும் என்றும் மத்திய அரசு தெளிப்படுத்தியுள்ளது. ஆனால், இந்தச் சட்ட விதியைப் பல மாநில அரசுகள் கண்டுகொள்ளாமல்லேயே இருக்கின்றன. வழக்கமான பாணியிலே கட்டுமானத் திட்டங்களுக்கு அனுமதி வழங்கி வருகின்றன என்று ஆய்வறிக்கைகள் சுட்டிக்காட்டுகின்றன.

ரியல் எஸ்டேட் தொழிலில் ஏராளமான தரகர்கள் உள்ளனர். இவர்கள் மூலம்தான் மனைகள், வீடுகள் விற்பனை மற்றும் பரிவர்த்தனைகள் நடைபெற்று வருகின்றன. இவர்களை முறைப்படுத்தும் வகையில் ஜூலை இறுதிக்குள் ரியல் எஸ்டேட் தரகர்கள் தங்களது பெயர்களைப் பதிவு செய்ய வேண்டும் என்று மத்திய அரசின் சட்ட விதியில் வழிகாட்டப்பட்டுள்ளது. இந்த விதிமுறை முறையாகப் பின்பற்றப்படுமா என்ற சந்தேகம் நிலவுகிறது. இதில் எவ்வளவு காலதாமதம் ஏற்படும் என்றும் தெரியவில்லை.

சட்ட விதிகளில் குறிப்பிடப்பட்டிருக்கும் முக்கிய விதிகளில் ஒன்று, மசோதா அமலான நாளிலிருந்து ஓராண்டுக்குள் வீடு வாங்குபவர்கள் மற்றும் பில்டர்களின் பயன்பாடுக்காக இணையதள சேவை தொடங்கப்பட வேண்டும் என்று சொல்லப்பட்டிருக்கிறது. ஆனால், இதுவரை மகாராஷ்டிரா, மத்தியப் பிரதேசம் மாநிலங்கள் மட்டுமே இதுபோன்ற இணையதள சேவைகளைத் தொடங்கியிருக்கின்றன. இந்த மாநிலங்களின் இணையதள சேவைகளிலும் குறிப்பிடும்படியான தகவல்கள் இடம் பெறவில்லை. இணையதள சேவைகள் தொடங்கப்பட்டால்தான் பில்டர்கள், வீடு வாங்குபவர்கள் தங்களுக்குத் தேவையான தகவல்களை இணையதளத்திலிருந்து பெற்று செயல்பட முடியும். ஆனால், அதுபோன்ற சேவைகள் பெரும்பாலான மாநிலங்களில் தொடங்கப்படாமலேயே கால தாமதம் செய்யப்பட்டு வருகின்றன.

ரியல் எஸ்டேட் ஒழுங்குமுறை மற்றும் வளர்ச்சி மசோதா அறிமுகப்படுத்தப்பட்ட நாளிலிருந்தே தொடர்ந்து பல்வேறு காரணங்களுக்காக, அதை இறுதி செய்து நாடாளுமன்றத்தில் நிறைவேற்றும் வரை தொடர்ந்து கால தாமதம் ஆனது. தற்போது மசோதா அமலாகியும் சட்ட விதிகள் மாநிலங்களில் முழுமை பெறாமல் இருப்பதால், இந்தச் சட்டம் இன்னும் அமலுக்கு வந்தபாடில்லை. தற்போது இந்தச் சட்ட விதிகளை விரைந்து செயல்படுத்த மத்திய அரசு மாநில அரசுகளை நெருக்கி வருகிறது. இதை ஏற்று மாநில அரசுகள் செயல்பட்டாலும்கூட, மேற்சொன்ன சட்ட விதிகளைப் பூர்த்தி செய்ய குறைந்தபட்சம் ஆறு மாதங்களாகவது ஆகலாம். அதுவரையிலும் இந்தச் சட்ட மசோதா மாநிலங்களில் அமல்படுத்தியிருந்தாலும், பெரிய பலன் இல்லாமலேயே இருக்கும்.

டி.கார்த்திக்

நன்றி : தி இந்து தமிழ் நாளிதழ் - 20.05.2017

இளம்பெண் பலி : கமிஷனருக்கு 'நோட்டீஸ்'

இளம்பெண் பலி : கமிஷனருக்கு 'நோட்டீஸ்'

சென்னை: மின் கம்பம் விழுந்து இளம்பெண் பலியானது குறித்து, திருப்பூர் போலீஸ் கமிஷனர், ஆறு வாரத்தில் அறிக்கை தாக்கல் செய்ய, மாநில மனித உரிமைகள் ஆணையம், 'நோட்டீஸ்' அனுப்பி உள்ளது.

திருச்சியை சேர்ந்தவர் புனிதா, 22; திருப்பூரில் உள்ள தனியார் பள்ளியில் ஆசிரியராக பணியாற்றி வந்தார். சாப்பாடு வாங்க, மங்கலம் சாலையில் உள்ள உணவகத்துக்கு சகோதரருடன் சென்றார். அப்போது, அங்கிருந்த உயர் கோபுர மின் கம்பம் முறிந்து விழுந்ததில், புனிதா உயிரிழந்தார். இதுகுறித்து, மாநில மனித உரிமைகள் ஆணையம் வழக்கு பதிவு செய்தது.

இதையடுத்து, ஆணைய தலைவர் டி.மீனாகுமாரி பிறப்பித்த உத்தரவில், 'புனிதாவின் மரண வழக்கு குறித்து, திருப்பூர் போலீஸ் கமிஷனர், ஆறு வாரத்தில் அறிக்கை தாக்கல் செய்ய வேண்டும். திருப்பூர் மாவட்ட மின் வாரிய கண்காணிப்பு பொறியாளர், மின் கம்பம் முறிந்து விழுந்தது குறித்து, விரிவான அறிக்கையை தாக்கல் செய்ய வேண்டும்' என, கூறப்பட்டுள்ளது.

நன்றி : தினமலர் நாளிதழ் – 19.05.2017

சங்க நிதி மோசடி - வழக்கு பதிவு செய்ய கோர்ட் உத்தரவு

சங்க  நிதி மோசடி - வழக்கு பதிவு செய்ய கோர்ட் உத்தரவு

மோசடியில் சங்க நிர்வாகிகள் : விசாரிக்க நீதிமன்றம் உத்தரவு

திருநெல்வேலி: திருநெல்வேலியில், செஞ்சிலுவை சங்கத்தின் பெயரில், பண மோசடி செய்ததாக எழுந்த புகாரில், முந்தைய நிர்வாகிகள், அரசு அதிகாரிகள், 10 பேர் மீது, வழக்கு பதிவு செய்ய நீதிமன்றம் உத்தரவிட்டது. திருநெல்வேலி மாவட்ட செஞ்சிலுவை சங்கத்தின் தலைவராக, பிரபாகர் என்பவர், பல ஆண்டுகளாக செயல்பட்டு வந்தார். இவரது காலத்தில், போலி ஆவணங்கள் மூலம் பணம் பெற்றுக் கொண்டது உள்ளிட்ட பல்வேறு குற்றச்சாட்டுகள் எழுந்தன.

திருநெல்வேலியைச் சேர்ந்த, வழக்கறிஞர் பிரம்மா என்பவர், இது குறித்து, தகவலறியும் உரிமை சட்டத்தில், பல்வேறு தகவல்களை சேகரித்தார். அவற்றின் அடிப்படையில் ஊழல் நடந்திருப்பது தெரிய வந்ததால், போலீசில் புகார் அளித்தார். போலீசார் வழக்கு பதிவு செய்யாமல் காலம் தாழ்த்தினர். இதனிடையே, கலெக்டர் கருணாகரன் உத்தரவின்படி, செஞ்சிலுவை சங்க நிர்வாகிகள் பிரபாகர் உள்ளிட்டவர்கள், அப்பொறுப்பில் இருந்து நீக்கப்பட்டனர்.

இந்த மோசடி குறித்து, போலீசார் விசாரிக்க வலியுறுத்தி பிரம்மா, நெல்லை நீதிமன்றத்தில் வழக்கு தொடர்ந்தார். இதையடுத்து, மாநில செஞ்சிலுவை சங்க தலைவர் மேத்தா, பிரபாகர் உட்பட, 10 பேர் மீது, நெல்லை போலீசார் வழக்கு பதிவு செய்து விசாரிக்க, மாஜிஸ்திரேட் ராமதாஸ் உத்தரவிட்டார்.

நன்றி : தினமலர் நாளிதழ் – 19.05.2017

Cr.P.C:155(4) கைது பற்றி என்ன சொல்கிறது?

Cr.P.C:155(4) கைது பற்றி என்ன சொல்கிறது?

நம்முடைய நாட்டில் மற்றவற்றிற்கு குறை இருக்கலாம். ஆனால், குற்றங்களுக்கு குறைவே இல்லை. ஏதோ ஒரு குற்றம் செய்திருக்கிறார் என்று ஒருவரை விசாரணை செய்ய காவல்துறை அணுகினால், அவர் பல குற்றங்கள் செய்துள்ளது விசாரணை மூலம் தெரிய வருவதை, நாம் அடிக்கடி ஊடகங்களின் வாயிலாக கண்டு வருகிறோம். 

அது போன்ற ஒரு நபர் மீது முதல் தகவல் அறிக்கை போடப்படுகிறது. அவர் செய்த குற்றங்கள் வரிசைப்படுத்தப்படுகின்றது. அந்த நபர் கைது செய்யப்பட வேண்டியதல்லாத குற்றத்தையும்,  கைது செய்யப்பட வேண்டிய குற்றத்தையும், புரிந்திருக்கிறார். அவரை கைது செய்யலாமா? வேண்டாமா? என்ற கேள்வி எழுகின்ற போது, குற்றவியல் விசாரணை முறைச் சட்டம் - 1973, பிரிவு - 155(4) நமக்கு  வழி காட்டுகிறது. 

அதில் என்ன சொல்லப்பட்டுள்ளது என்றால், ஒரு வழக்கு இரண்டு அல்லது இரண்டுக்கு மேற்பட்ட குற்றங்களைப் பற்றியதாக இருந்து, அவற்றில் குறைந்தது ஒன்றாவது கைது செய்யப்படக் கூடிய இருந்தால், அந்த வழக்குக்கு உட்பட்டவரை காவல்துறையினர் கைது செய்யலாம்.

*********************************** அன்புடன் செல்வம் பழனிச்சாமி   

தண்ணீர் ஏன், எவ்வளவு குடிக்க வேண்டும்?

தண்ணீர் ஏன், எவ்வளவு குடிக்க வேண்டும்?

மருத்துவம் விவரிக்கும் உண்மைகள்!

'நீரின்றி அமையாது உலகு' என்பது வள்ளுவன் கூற்று. நம் உடலுக்கும் தண்ணீரே அடிப்படை. ஆரோக்கியத்துக்கு தண்ணீர் எவ்வளவு அடிப்படையானது, நம் உடல் இயக்கங்களில் அதன் பங்கு எவ்வளவு அத்தியாவசியமானது என்பது பற்றி அறிந்தால், ஆச்சர்யம் மேலோங்கும்!

சரி... ஏன் தண்ணீர் குடிக்க வேண்டும்? அந்தத் தண்ணீர் வியர்வையும் சிறுநீருமாய் எப்படி வெளியேற்றப்படுகிறது? அதற்கானத் தேவையும் முக்கியத்துவமும் என்ன? சிந்தித்துப் பார்க்கிறோமா? தவிக்கும் நேரம் மட்டும் தண்ணீர் அருந்திவிட்டு, அடுத்த வேலையைப் பார்க்கத் துவங்குகிறோம்.

தண்ணீரை அப்படி சர்வ அலட்சியமாக நிராகரிக்க முடியாது. ஏனென்றால், உடம்பின் எடையில் 50 முதல் 75 சதவிகிதம் நீர் நிரம்பியிருக்கிறது. நம்பமுடிகிறதா? அறிவியல் பூர்வமாக அதுதான் உண்மை. அதுபற்றிய தகவல்களை விரிவாகத் தருகிறார், தஞ்சாவூரைச் சேர்ந்த பொதுநல மருத்துவர் டாக்டர் பி. கிருஷ்ணமூர்த்தி.

ஆண்களுக்கு 60 சதவிகிதம்... பெண்களுக்கு 55 சதவிகிதம்!

''திசுக்களின் செயல்பாடுகளுக்கு உந்து சக்தியாக இருப்பது தண்ணீர் மற்றும் எலெக்ட்ரோலைட்ஸ் (Electrolytes). இவை உற்பத்தி ஆவதும் உட்கிரகிப்பதும் முழுவதுமாக குடல்பகுதியில்தான். செல்களின் வெளிப்பகுதியில் உள்ள இறுக்கமான இணைப்புகளுக்கு இடையே சவ்வூடு பரவல் (Osmosis) மூலம் நின்று நிதானிக்கிறது தண்ணீர். அதேசமயம், உடலின் மொத்த நீரின் அளவில் 3-ல் 2 பங்கு செல்களுக்கு உள்ளேயே காணப்படுகிறது. அதனால்தான், செல்கள் மற்றும் உடல் உறுப்புகளுக்கு தண்ணீர் பிரதானமாக விளங்குகிறது. கொழுப்பு திசுக்களாக இருக்கிறபட்சத்தில், அதற்குள் நீரின் அளவு குறையும்.

ஆண்களுக்கு உடல் எடையில் 60 சதவிகிதம் தண்ணீர் இருந்தால் பெண்களுக்கு 52 சதவிகிதம் முதல் 55 சதவிகிதம் மட்டுமே இருக்கும். உடல் பருமன் மற்றும் முதுமையடைந்த பெண்களுக்கும் ஆண்களுக்கும் நீரின் அளவு கணிசமாகக் குறையலாம் என்கிறது மருத்துவ ஆய்வு.

சராசரியாக 68 கிலோ எடை இருப்பவரின் உடலில் 41 லிட்டர் தண்ணீர் இருக்கக் கூடும். அதில் 23 முதல் 27 லிட்டர் திசுக்களின் உள்ளேயும், 7 லிட்டர் திசுக்களின் வெளியேயும் அதைச் சுற்றியும் இருக்கிறது. 4 லிட்டர் தண்ணீர் ரத்தப் பிளாஸ்மாவில் இருப்பதாக மருத்துவக் கருத்தரங்க ஆய்வுகள் முன்வைக்கின்றன.

ஒரு குழந்தை பிறக்கும் தருணத்தில் ஏறக்குறைய 85 சதவிகிதம் தண்ணீர் அதன் உடலில் மிகுந்திருக்கும். குழந்தைப் பருவம் எய்துகிறபோது 75 சதவிகிதம் ஆக அது குறையும். ''உடலில் தண்ணீர்ச் சத்து குறைந்தால் மயக்கம், நினைவிழத்தல், ஏன் மரணம் கூட உண்டாகும்'' என தஞ்சையைச் சேர்ந்த சிறுநீரகச் சிறப்பு மருத்துவர் மோகன்தாஸ், தன் 'உணவும் நலவாழ்வும்' எனும் நூலில் குறிப்பிட்டுள்ளார்.

ஒரு நாளைக்கு இரண்டரை லிட்டர் தண்ணீர்!

இத்தனை முக்கியத்துவம் வாய்ந்த தண்ணீரை எவ்வளவு குடிக்க வேண்டும் என்பது கவனிக்கத்தக்கது. ஒரு நாளில் குறைந்தபட்சம் இரண்டரை லிட்டர் தண்ணீர் நம் உடலுக்குத் தேவைப்படுகிறது. கோடை காலம், கடுமையான உடற்பயிற்சி, வாந்தி, பேதி போன்றவற்றால் உடலில் உண்டாகும் நீர்ச்சத்து இழப்பினால் நீரின் தேவை இன்னும் அதிகரிக்கலாம்.

பொதுவாக நாம் தாகத்தின்போது மட்டுமே தண்ணீர் அருந்துகிறோம். அதுவே போதுமானது எனக் கூறமுடியாது. பிற நேரங்களில் உட்கொள்ளக்கூடிய திரவ ஆகாரங்களினாலும் உணவுப்பொருட்களின் வளர்ச்சிதை மாற்றங்களினாலும் உடலுக்கு நீர்ச்சத்து கிடைக்கப்பெறுகிறோம். சொல்லப்போனால், செல்களால் ஆன நம் உடலில், செல்களுக்கு வெளியில், கொள்கலன்போல் தண்ணீர் பாதுகாக்கப்படுகிறது. அதுதான் அதிகப்படியான நீர் இழப்பு (Dehydration) ஏற்படும்போது ஈடு செய்து நம்மைக் காப்பாற்றுகிறது. எப்போதுமே உடலில் உள்ள நீருக்கும், வெளியேற்றப்படும் நீருக்கும் இடையே இருக்கும் சமநிலையில்தான் பற்றாக்குறையில் இருந்து தற்காத்துக்கொள்ள இயலும். அதில் மிகுந்த எச்சரிக்கையோடு இருக்க வேண்டியது அவசியம்.

குறிப்பாகச் சொல்ல வேண்டிய தகவல் என்னவெனில், தோராயமாக 1500 மி.லி தண்ணீர் ஒருநாளைக்கு எடுத்துக் கொள்கிறோம் என்றால், அதுமட்டுமே உடலின் இயக்கச் சீர்பாடுகளை கட்டமைத்து சிறுநீராக வெளியேறுகிறது எனக் கணக்கில்கொள்ள முடியாது. இயல்பிலேயே உடலில் சுரக்கப்படும் நீர், தன் வேலையைச் செய்து கொண்டுதான் இருக்கும்.

உதாரணமாக, உமிழ்நீரில் 1,500 மி.லி, இரைப்பையில் 2000 மி.லி, பித்தநீரில் 500 மி.லி, கணையத்தில் 1,500 மி.லி, சிறுகுடலில் 1,500 மி.லி எனத் தண்ணீர் உடலின் அத்தனை பாகங்களிலும் சுற்றிச் சுழல்கிறது. குடல் பகுதியில் 1,400 மி.லி, (Colonic reabsorption), போர்டல் வெயின் பகுதியில் (Portal vein reabsorption) 6,700 மி.லி தண்ணீர் உறிஞ்சப்படுகிறது. நம் உணவு மண்டலத்தில் 8,200 மி.லி நீரானது விரவிக்கிடக்கிறது என்றால், அதில் 8,100 மி.லி செரிமானப் பகுதியில் உட்கிரகிக்கப்படுகிறது. எஞ்சிய 100 மி.லி தண்ணீர்தான் மலத்துடன் வெளியேற்றப்படுகிறது என்பதை ‘டேவிட்சன்’ எனும் ஆங்கில மருத்துவ நூல் வாயிலாக அறியலாம்.

சுரப்பு நீர், செரிமானம், கடத்துதல், கரைத்தல், சுத்திகரிப்பு!

தண்ணீர் டூ சிறுநீர் என்பது வெறும் உள்ளே வெளியே ஆட்டம் அல்ல. தண்ணீரின் பயன்பாடு அளப்பரியது. உடலுக்குத் தேவையான சுரப்பு நீர், உணவுச் செரிமானம், அதற்குப் பிறகான சத்துப் பொருட்களை கடத்துதல், கரைத்தல் என முக்கிய பங்கு வகிக்கிறது. மூட்டுகளுக்கு இடையே ஏற்படும் உராய்வைத் தடுக்கும் திரவமாகவும் செயல்படுகிறது. ஒவ்வாத, தேவையற்ற நச்சுப் பொருட்களை தண்ணீர் அப்புறப்படுத்திவிடுகிறது. வயிற்றுப் புண் மற்றும் சிறுநீரகக் கல் அடைப்பு வராமல் காப்பாற்றுகிறது.

பொதுவாக இழப்பு என்பதைவிட, கழிவாக வெளியேறும் நீரின் அளவை அறிய வேண்டும். சிறுநீரின் வழியாக 1500 மி.லி மலத்துடன் 100 மி.லி வியர்வையில் 200 மி.லி நீர் வெளியேறுகிறது. சுவாசம் என்றால் ஆக்சிஜனை உள்ளிழுத்து கார்பன்-டை-ஆக்ஸைடை வெளியிடுவது மட்டுமல்ல... காற்றுடன் 700 மிலி நீரும் வெளியேற்றப்படுகிறது.

இன்றைய காலகட்டத்தின் அறிவியல் வளர்ச்சியில், மனிதனின் ஆக்கப்பூர்வச் சிந்தனையில், உடல் உழைப்பில் எதை வேண்டுமானாலும் செயற்கையாக உருவாக்கிவிட முடியும். ஆனால், இயற்கையின் கொடையான தண்ணீரை ஒருபோதும் செயற்கையாக உருவாக்க இயலாது. மண், மரம், விலங்குகள் உட்பட மனிதனும் நீரை நம்பி வாழவேண்டும் என்பது இயற்கையின் கட்டாயம். எந்த மென்பொருட்களாலும் இதை மாற்றியமைக்க முடியாது. அதனால்தான் 'தண்ணீரைச் சேமியுங்கள்' எனச் சுற்றுச் சூழல் பாதுகாப்பு அமைப்புகளும் அரசும் கவனப்படுத்திக் கொண்டே இருக்கின்றன. ஆனால், நீர் அரசியல்தான் நம் சாபக்கேடு. இல்லாமையும் கலப்படமும் இதில்தான் வியாபார நோக்கில் கையாளப்படுகின்றன. இயற்கைக்குப் புறம்பாக போகிறபோதெல்லாம் உயிர் வாழ ஏதோ ஒரு வகையில் தண்ணீர் நம்மை கைகோத்துக் கொண்டே இருக்கிறது.

ஆகவே, யார் தடுத்தாலும் விலைமதிப்பற்ற நீரின் இயக்கம், நம் உடலுக்குள் தன்னியல்பாக நடந்துகொண்டே இருக்கும். இதில் ஏதேனும் குளறுபடி ஏற்பட்டால் உடற்கூறுகள் பாதிப்படையும் அல்லது உடல் பாதிப்பால் நீர் இயக்கத்தில் சிக்கல் ஏற்படலாம். உடல் எடை, வயது, பருவகால மாற்றங்கள், உடற்பயிற்சி, மருத்துவக் காரணங்கள் இவற்றை மனத்தில் கொண்டு, காய்ச்சிய நீரை தேவைக்கேற்ப அருந்த வேண்டும்.

அளவுக்கு அதிகமாகத் தண்ணீர் குடிப்பதும் வேண்டாம்!

இன்னொரு புறம், தண்ணீர் நல்லது எனக் குடம் குடமாகக் குடிப்பது ஆபத்தில் முடியும். சிறுநீரகம் தன் வேலையில் திணற ஆரம்பிக்கலாம். உடலில் நீர்ச்சத்து குறைந்தால் உடனே மூளை நரம்பு மண்டலம் தூண்டப்படும். தாகம் ஏற்பட ஆரம்பிக்கும். தண்ணீர் குடித்தாகும் நிலைக்கு தள்ளப்படுவோம். பெரும்பாலும் தன்னைத் தானே சரி செய்யக் கூடிய வகையிலேயே உடல் அமைப்பு உள்ளது. உடலில் தேவையான அளவு நீர்ச்சத்து இருந்தால் தாகம் ஏற்படும் வாய்ப்புகள் குறைவு.

உணவு இல்லாமல் 50 நாட்கள் கூட வாழலாம். ஆனால், தண்ணீர் இல்லாமல் ஒருசில நாட்கள் கூட வாழமுடியாது என்கிறார்கள். நீருக்கும் சோடியம், பொட்டாசியம் போன்ற தாது உப்புகளுக்கும் நெருங்கிய தொடர்பு உண்டு. சோடியம் அதிகமானால் தாகம் அதிகரிக்கும். சோடியம் குறைந்தால் சிறுநீரகம் அதிகமான சிறுநீரை வெளியேற்றும். அதிகப்படியான நீர் இழப்பு (Dehydration) ஏற்படுகிற காலகட்டத்தில் மூளையில் சுரக்கும் வேஸோபிரஸ்சின் (Vasopressin) என்ற ஹார்மோன் சிறுநீரகத்தில் நீர் வெளியேறுவதைக் குறைத்து விடுகிறது. இருதயம் மற்றும் சிறுநீரகம் அவைகளுக்கான வேலைகளைச் சரிவர செய்ய இயலாத நிலையில், நுரையீரல் மற்றும் திசுக்களில் தண்ணீர் கோத்து நிற்கிறது. இதனால் கை,கால், முகம், வயிற்றுப் பகுதியில் வீக்கம் ஏற்படுவதோடு மூச்சுத் திணறலும் உண்டாகிறது. இந்த நேரங்களில் மருத்துவரை அணுகி முறையான மருத்துவ சிகிச்சை மேற்கொள்ள வேண்டும்.

எந்த மருத்துவ முறையாக இருந்தாலும், வறட்சியால் வாய் உலர்ந்து, கண்கள் உள்ளே போய் பலமிழக்கும் நிலை வந்தால் உப்பு, சர்க்கரை கலந்த நீர் (ORS), நீர் மோர், இளநீர், பழச்சாறு போன்றவை அருந்தி ஈடு செய்ய வேண்டும் என மருத்துவர்கள் அறிவுறுத்துகிறார்கள். இயற்கை மருத்துவத்தில் நீர்சிகிச்சை என்று கூட உண்டு. இவையெல்லாம் கடந்து, நீர்ச்சத்து குறைவினால் ஏற்படும் உயிர்ச்சேதத்தைத் தடுக்க, மருத்துவமனைகளில் உடனடியாக சிரைத்திரவம் (Intra venious fluids) செலுத்திக்கொள்வது சாலச் சிறந்தது.

பெண்கள் தண்ணீர் தவிர்க்கக் கூடாது!

உடல் எடையில் 5 சதவிகிதம் நீர்ச்சத்து குறைந்தால் நம் வேலைத்திறன் 30 சதவிகிதம் குறைவதாகச் சொல்கிறார்கள். அப்படியென்றால், நாம் உயிர்வாழத் தண்ணீரின் பங்கு எத்தகையது என்பதை யோசித்துப் பார்க்கவேண்டும். முக்கியமாகப் பெண்கள் இதை மனதில் ஏற்றிக்கொள்ள வேண்டும். வெளிப் பிரயாணங்களில் சிறுநீர் கழிக்க வேண்டுமே என்கிற அச்சத்தால் தண்ணீர் குடிப்பதை பெண்கள் முற்றிலுமாகத் தவிர்க்கின்றனர். இது எத்தகைய பின்விளைவுகளை ஏற்படுத்தும் என்பதை மேற்கூறிய காரணங்கள் தெளிவுபடுத்தும்.

போதிய கழிப்பறை வசதி இன்மை மற்றும் சமூக அச்சுறுத்தல்களுக்குப் பயந்து மனதளவில் பாதிக்கப்படுகின்றனர். மணிக்கணக்கில் தண்ணீர் குடிக்கவில்லை என்றால் வறட்சி ஏற்பட்டு நீர்ச்சத்து குறைகிறது. இதனால் அடர் மஞ்சள் நிறத்துடன்கூடிய சிறுநீரோடு நீர்க்குத்தலும் ஏற்படும். இயற்கை உபாதைகளை அடக்குவதால், ஆண்களைவிட பெண்களே அதிகம் பாதிக்கப்படுகின்றனர். மாதவிலக்கு நேரங்களில் உதிரத்தோடு தண்ணீரும் அதிகம் வெளியேறுமோ என்று பெண்கள் பயப்படத் தேவையில்லை. சாதாரணமாக மாதவிடாயில் 40 மி.லி முதல் 50 மி.லி ரத்தம் மட்டுமே வெளியேறும். அதேநேரம், மட்டுப்படாத உதிரப்போக்கு மற்றும் மாதவிலக்கு நிற்கும் காலங்களில் (Menopause) ஹார்மோன்களின் ஏற்ற இறக்கங்களால் உண்டாகும் கட்டுக்கடங்காத வியர்வை இவற்றால் நிச்சயம் நீர்ச்சத்து இழப்பு அதிகரிக்கும். பதட்டமின்றி விழிப்பு உணர்வோடு பெண்கள் தங்கள் மருத்துவ நெருக்கடிகளைச் சமாளிக்க வேண்டும்.

வயதான காலங்களில் செல்களின் செயல்களில் தேக்கம் ஏற்படலாம். உடலுக்குள் நீர் தேவைப்படும். ஆனால், தாகம் எடுக்காமல் இருக்கும். வாழ்க்கையின் மீதான விரக்தி, உளச் சோர்வு, உடல் நலம் குறித்த ஆர்வமின்மை போன்ற மனக் காரணங்களால் தண்ணீர் அருந்துவதில் முதியோர் கவனக்குறைவாக இருக்கின்றனர். உடலுக்குத் தேவையான தண்ணீரைப் பருகப் பழக வேண்டும்.

தரமற்ற பாட்டில்கள், பாக்கெட்டுகள், கேன்களில் விற்கப்படும் நீர், நச்சு ஊட்டப்பட்ட குளிர்பானங்கள் இவற்றை அறவே தவிர்ப்பது நல்லது. இதனால், வயிற்றுப்போக்கு, காலரா, டைஃபாய்டு போன்ற அசுத்த நீரால் வரக்கூடிய தொற்று நோய் வராமல் தற்காத்துக்கொள்ளலாம். காய்ச்சி வடிகட்டிய சுத்தமான நீரும் மண்பானை நீருமே ஏற்புடையது.

வந்தபின் காப்பது அனுபவம். வருமுன் காப்பது புத்திசாலித்தனம். நிறைவாகத் தண்ணீர் அருந்தி, நோய்கள் தவிர்த்து, நலமோடு வாழ முயற்சிக்கலாமே!

- அகிலா கிருஷ்ணமூர்த்தி

நன்றி : விகடன் செய்திகள் - 16.05.2017

இடையூறாக உள்ள ஆட்டோ ஸ்டாண்டை முன்னறிவிப்பின்றி அகற்றலாம்:

பொதுமக்களுக்கு இடையூறாக உள்ள நடைபாதை ஆட்டோ ஸ்டாண்டை முன்னறிவிப்பின்றி அகற்றலாம்:

சென்னை உயர் நீதிமன்றம் உத்தரவு

சென்னை ஆவடியை சேர்ந்த ஆட்டோ ஓட்டுநர் காந்திராஜ், உயர் நீதிமன்றத்தில் தாக்கல் செய்த மனுவில், ‘‘ஆவடி அரசு பேருந்து பணிமனைக்கு பின்புறம் அண்ணா சிலை அருகே ஆட்டோ ஸ்டாண்டு வைத்துள்ளோம். எந்த முன்னறிவிப்பும் இல்லாமல் இதை அகற்றும் நடவடிக்கையில் காவல்துறையும், ஆவடி நகராட்சியும் ஈடுபட்டுள்ளன. இந்த நடவடிக்கைக்கு இடைக்கால தடை விதிக்க வேண்டும்’’ என்று கோரியிருந்தார்.

உயர் நீதிமன்ற தலைமை நீதிபதி இந்திரா பானர்ஜி, நீதிபதி எம்.சுந்தர் ஆகியோரைக் கொண்ட முதல் அமர்வு முன்பு இந்த மனு விசாரணைக்கு வந்தது. அப்போது அரசு வழக்கறிஞர் எம்.கே.சுப்பிரமணியம் ஆஜராகி, பொதுமக்களுக்கும், போக்குவரத்துக்கும் இடை யூறு செய்யும் வகையில் ஆட்டோ ஸ்டாண்டு அமைத்துள்ளதாக கூறினார்.

அண்ணா சிலை அருகே ஆட்டோக்களை நிறுத்திக் கொள்ள காவல்துறையினர் அனுமதி அளித்திருப்பதாகக் கூறிய மனுதாரரின் வழக்கறிஞர், அதற்கான ஆவணத்தை தாக்கல் செய்தார்.

இதையடுத்து நீதிபதிகள் பிறப்பித்த உத்தரவு வருமாறு:

பொதுமக்கள் பயன்படுத்தும் நடைபாதையை வழிமறித்து பொதுமக்கள் போக்குவரத்துக்கு இடையூறு ஏற்படுத்தும் வகையில் ஆட்டோ ஸ்டாண்டு அமைக்க மனுதாரருக்கு உரிமை இல்லை. தவிர, அங்கு அதிகபட்சம் 5 ஆட்டோக்களை சுழற்சிமுறையில் நிறுத்திக்கொள்ளவே காவல்துறை அனுமதி அளித்துள்ளது. அந்த இடத்தில் ஸ்டாண்டு அமைக்க அனுமதிக்க முடியாது.

பொதுமக்களுக்கும், போக்குவரத்துக்கும் இடையூறாக நடைபாதையில் ஆட்டோ ஸ்டாண்டு அமைத்தால், அதை முன்னறிவிப்பு இல்லாமல் அகற்ற காவல்துறையினருக்கும், நகராட்சி அதிகாரிகளுக்கும் உரிமை உள்ளது’’ என்று கூறி, மனுவை நீதிபதிகள் தள்ளுபடி செய்தனர்.

நன்றி : தி இந்து தமிழ் நாளிதழ் - 17.05.2017