768 மாணவர்களை நீக்குமாறு மருத்துவ கவுன்சில் உத்தரவு!

768 மாணவர்களை நீக்குமாறு மருத்துவ கவுன்சில் உத்தரவு!

புதுச்சேரி: ”புதுச்சேரியில் உள்ள ஏழு தனியார் மருத்துவக் கல்லுாரிகளில், நிர்வாக ஒதுக்கீட்டில் முறைகேடாக சேர்த்த 768 மாணவர்களை கல்லுாரியில் இருந்து நீக்க வேண்டும்” என, இந்திய மருத்துவ கவுன்சில் அதிரடி உத்தரவிட்டுள்ளது.

புதுச்சேரியில் ஒரு அரசு மருத்துவக் கல்லுாரி, மூன்று சுயநிதி மருத்துவக் கல்லுாரிகள், நான்கு நிகர் நிலைப் பல்கலைக்கழக மருத்துவக் கல்லுாரிகள் உள்ளன.

சுயநிதி கல்லுாரிகளான வெங்கடேஸ்வரா -150, மணக்குள விநாயகர் -150, பிம்ஸ்-150 மற்றும் லட்சுமிநாராயணா, மகாத்மா காந்தி, அறுபடை வீடு, விநாயகா மிஷன் ஆகிய 4 நிகர்நிலை பல்கலைக்கழக மருத்துவ கல்லுாரிகளில் 600 எம்.பி.பி.எஸ்., இடங்கள் உள்ளன.

கடந்த 2016ம் ஆண்டு, தனியார் கல்லுாரிகளில் மொத்தமுள்ள 1050 எம்.பி.பி.எஸ்., இடங்களில், 282 இடங்கள் அரசு ஒதுக்கீட்டிற்கு வழங்கப்பட்டது. இந்த 282 இடங்கள் மற்றும் புதுச்சேரி அரசு மருத்துவக் கல்லுாரியில் உள்ள 150 இடங்களுக்கு, 2016-17ம் கல்வியாண்டில், சென்டாக் கவுன்சிலிங் மூலம், பிளஸ் 2 மதிப்பெண் மெரிட் ரேங்க் அடிப்படையில் சேர்க்கை நடத்தப்பட்டது.

சுப்ரீம் கோர்ட் உத்தரவு

நிகர்நிலை மற்றும் சுயநிதி மருத்துவக் கல்லுாரிகளில் மீதமுள்ள 768 எம்.பி.பி.எஸ்., இடங்களுக்கு, ’நீட்’ தேர்வு மதிப்பெண் அடிப்படையில் சேர்க்கை நடத்த வேண்டும் என, சுப்ரீம் கோர்ட் உத்தரவிட்டு இருந்தது. இதற்காக, சென்னை ஐகோர்ட் ஓய்வு பெற்ற நீதிபதி சித்ராவெங்கட்ராமன், நிர்வாக ஒதுக்கீட்டு சேர்க்கை கமிட்டி தலைவராக நியமிக்கப்பட்டார்.

நிர்வாக ஒதுக்கீட்டில் சேர விண்ணப்பித்தவர்களில், ’நீட்’ மதிப்பெண் அடிப்படையில் 768 பேர் கொண்ட பட்டியலை, சேர்க்கை கமிட்டி தயாரித்து, தனியார் மருத்துவ கல்லுாரிகளுக்கு வழங்கியது. ஆனால், சேர்க்கை கமிட்டி அளித்த பட்டியலில் உள்ள மாணவர்களை, சுயநிதி மருத்துவக் கல்லுாரிகள் சேர்க்காமல், ’நீட்’ தேர்வு எழுதாத, வெளிமாநில மாணவர்களிடம் அதிக கட்டணம் வசூலித்துக் கொண்டு, எம்.பி.பி.எஸ்., சேர்க்கையை நடத்திக் கொண்டன.

மருத்துவ கவுன்சிலில் புகார்

இது தொடர்பாக பெற்றோர் - மாணவர் சங்கங்கள், அகில இந்திய மருத்துவ கவுன்சில் மற்றும் புதுச்சேரி அரசிடம் புகார் தெரிவித்தன. மேலும், சேர்க்கை கமிட்டி தலைவர் சித்ரா வெங்கட்ராமன், கட்டண குழு தலைவர் ராஜேஸ்வரன் ஆகியோர், ஏழு தனியார் மருத்துவக் கல்லுாரிகளும் நிர்வாக ஒதுக்கீட்டு எம்.பி.பி.எஸ்., இடங்களை முறைகேடாக சேர்க்கை நடத்திக் கொண்டதாக, புதுச்சேரி அரசுக்கும், சென்னை ஐகோர்ட் தலைமை நீதிபதி மற்றும் இந்திய மருத்துவக் கவுன்சிலுக்கும் புகார் அனுப்பினர்.

இந்த புகார் மீது எடுத்த நடவடிக்கை குறித்து, இந்திய மருத்துவக் கவுன்சில் புதுச்சேரி அரசிடம் கேள்வி எழுப்பியபோது, ”சட்டசபையில் விவாதித்து தனியார் கல்லுாரிகள் மீது நடவடிக்கை எடுக்கப்படும்” என புதுச்சேரி அரசு பதில் அளித்தது.

தேர்வு எழுத அனுமதி மறுப்பு

சுய அதிகாரம் கொண்ட நிகர்நிலை பல்கலை கழகங்கள், எம்.பி.பி.எஸ்., முதலாம் ஆண்டு தேர்வை நடத்தி முடித்தன. ஆனால், புதுச்சேரி பல்கலைக் கழக கட்டுப்பாட்டில் வரும், மூன்று சுயநிதி மருத்துவக் கல்லுாரிகள் கொல்லைப்புறமாக சேர்க்கை நடத்தியதால், ’நீட்’ ரேங்க் அடிப்படையில் சேர்க்கப்பட்ட மாணவர் பட்டியலை, பல்கலை கழகத்திற்கு வழங்கவில்லை.

இடைக்கால உத்தரவு

இதனால், கடந்த ஜூன் மாதம் நடந்த முதலாம் ஆண்டு எம்.பி.பி.எஸ்., தேர்வை, மூன்று சுயநிதி மருத்துவக் கல்லுாரியில் சேர்க்கப்பட்ட 304 மாணவர்கள் எழுத அனுமதிக்கப்படவில்லை. அதையடுத்து, பாதிக்கப்பட்ட மாணவர்கள் மற்றும் மருத்துவக் கல்லுாரிகள் சார்பில், சென்னை ஐகோர்ட்டில் வழக்கு தொடரப்பட்டது. இடைக்கால உத்தரவுப்படி, 304 மாணவர்களும் தேர்வு எழுத அனுமதிக்கப் பட்டனர்.

மருத்துவ கவுன்சில் அதிரடி

இந்நிலையில், இந்திய மருத்துவக் கவுன்சில் கூட்டம், கடந்த மாத இறுதியில் நடந்தது. ஓய்வு பெற்ற நீதிபதி தலைமையில் அமைக்கப்பட்ட, ஒருங்கிணைந்த சேர்க்கை கமிட்டியின் பரிந்துரையை மீறி, புதுச்சேரியில் உள்ள ஏழு சுயநிதி மற்றும் நிகர்நிலை பல்கலைக்கழக மருத்துவக் கல்லுாரிகளில் முறைகேடாக, மாணவர் சேர்க்கை நடத்தியது கண்டுபிடிக்கப்பட்டது. மேலும், சுப்ரீம் கோர்ட் வழிகாட்டுதல்படி, ’நீட்’ ரேங்க் அடிப்படையில் மாணவர் சேர்க்கை நடத்தப்படவில்லை என்பதை உறுதி செய்தனர்.

அதையடுத்து, தனியார் கல்லுாரிகளில் நிர்வாக ஒதுக்கீட்டு எம்.பி.பி.எஸ்., இடங்களில், சேர்க்கை இறுதி நாளான 30.09.2016ம் தேதிக்கு பிறகு, கொல்லைப்புறமாக சேர்க்கப்பட்ட 768 மாணவர்களை கல்லுாரியில் இருந்து உடனடியாக நீக்க வேண்டும் என இந்திய மருத்துவ கவுன்சில், அதிரடியாக உத்தரவு பிறப்பித்துள்ளது.

இந்த உத்தரவு, சம்பந்தப்பட்ட தனியார் மருத்துவக் கல்லுாரிகள் மற்றும் புதுச்சேரி கவர்னரின் தனி செயலர், புதுச்சேரி அரசின் ’நீட்’ நோடல் அதிகாரி, சுகாதாரத் துறை செயலர் மற்றும் இயக்குநர் ஆகியோருக்கு அனுப்பப் பட்டுள்ளது.

இந்திய மருத்துவக் கவுன்சிலின் அதிரடி உத்தரவால், கடந்த ஆண்டு கல்லுாரியில் சேர்ந்து, தற்போது 2ம் ஆண்டு படித்து வரும் 768 மாணவர்களின் எதிர்காலம் கேள்விக்குறியாகி உள்ளது.

முதல்வர் நாராயணசாமி கூறியதாவது:

புதுச்சேரியில் உள்ள தனியார் மருத்துவ கல்லுாரிகளில், அரசுக்கு 283 எம்.பி.பி.எஸ்., இடங்களைப் பெற்றோம். புதுச்சேரி மாநில ஒதுக்கீட்டு இடங்களில் மட்டும் தான் அரசுக்கு அதிகாரம் உள்ளது.

கடந்தாண்டு ’நீட்’ தேர்விலிருந்து மத்திய அரசு விலக்கு அளித்ததன்பேரில், மாநில அரசின் இடங்களை சென்டாக் கவுன்சிலிங் மூலம், வெளிப்படையாகவும், தகுதி அடிப்படையிலும் எவ்வித புகாரும் இல்லாமல், புதுச்சேரி மாநிலத்தை சேர்ந்த மாணவர்களைக் கொண்டு நிரப்பப்பட்டது.

நிர்வாக ஒதுக்கீட்டு சேர்க்கை, கல்லுாரி நிர்வாகம், மருத்துவ கவுன்சில் சம்பந்தப்பட்டது. இதனைக் கண்காணிக்க ஓய்வு பெற்ற நீதிபதி சித்ராவெங்கட்ராமன் தலைமையில் குழு அமைக்கப்பட்டது. நிர்வாக ஒதுக்கீட்டு சேர்க்கையில் தவறு நடந்திருந்தால் நடவடிக்கை எடுக்கும் பொறுப்பு மருத்துவ கவுன்சில், கண்காணிப்பு குழுவிற்கு உள்ளது.

மருத்துவ கவுன்சில் கடிதத்தில், ’தனியார் மருத்துவ கல்லுாரிகள், நிகர்நிலை பல்கலைக் கழகங்களில் நிர்வாக ஒதுக்கீட்டில் வீதிமுறைகளை மீறி சேர்க்கப்பட்ட மாணவர்களை நீக்க வேண்டும்’ என உத்தரவிட்டுள்ளது; மாணவர்களின் எண்ணிக்கையை குறிப்பிடவில்லை. இதற்கு, மாநில அரசு பொறுப்பு ஏற்காது. மாணவர்கள் நலன் கருதி, தனியார் மருத்துவ கல்லுாரி நிர்வாகத்தை அழைத்து பேச உள்ளோம். இவ்வாறு அவர் கூறினார்.

பெற்றோர்- மாணவர் சங்கத் தலைவர் பாலா கூறியதாவது:

தனியார் மருத்துவ கல்லுாரி நிர்வாக ஒதுக்கீட்டில், ’நீட்’ தேர்வில் வெற்றி பெற்ற புதுச்சேரி மாணவர்கள் சேர தயாராக இருந்தனர்.ஆனால், கல்லுாரிகள் ரூ.12 லட்சம், 18 லட்சம் கட்டணம் கேட்டதால், மாணவர்கள் சேரவில்லை. இதனால், ’நீட்’ தேர்வு எழுதாத வெளி மாநில மாணவர்களிடம் அதிக கட்டணம் வசூலித்துக் கொண்டு, எம்.பி.பி.எஸ்., இடங்களை தனியார் கல்லுாரிகள் நிரப்பிக் கொண்டன.

இது தொடர்பாக சேர்க்கை கமிட்டி தலைவர் சித்ராவெங்கட்ராமன், கட்டண குழு தலைவர் ராஜேஸ்வரன் ஆகிய இருவரும், புதுச்சேரி அரசுக்கும், உயர்நீதிமன்ற நீதிபதி, இந்திய மருத்துவ கவுன்சிலுக்கு புகார் அனுப்பினர்.

இந்த புகார் குறித்து, புதுச்சேரி சுகாதாரத் துறைக்கு 13 நினைவூட்டல் கடிதங்களை மருத்துவ கவுன்சில் அனுப்பியது. அதற்கு, புதுச்சேரி சுகாதாரத் துறை சரியான விளக்கம் அளிக்கவில்லை. தற்போது, முறைகேடாக கல்லுாரியில் சேர்த்த மாணவர்களை நீக்குமாறு, மருத்துவ கவுன்சில் உத்தரவிட்டுள்ளது.

இந்த விவகாரத்தில் சி.பி.ஐ., விசாரணை நடத்த வேண்டும். மாணவர்களின் எதிர்காலத்தை கேள்விக்குறியாக்கிய கல்லுாரி நிர்வாகம், சுகாதாரத் துறை அதிகாரிகள் மீது நடவடிக்கை எடுக்க வேண்டும். இவ்வாறு அவர் தெரிவித்தார்.

புதுச்சேரி சென்டாக் அனைத்து மாணவர்- பெற்றோர் சங்க தலைவர் நாராயணசாமி கூறியதாவது:

தனியார் மருத்துவக் கல்லுாரிகளின் நிர்வாக ஒதுக்கீட்டு இடங்கள் நீட் தேர்வு அடிப்படையில் நடத்தப்பட வேண்டும். கடந்தாண்டு புதுச்சேரியை சேர்ந்த 96 மாணவர்கள் நீட் தேர்வில் வெற்றி பெற்றனர்.

இவர்களை, தனியார் மருத்துவக் கல்லுாரி நிர்வாக ஒதுக்கீட்டில் சேர்க்க மறுத்து, அதிக பணம் பெற்றுக் கொண்டு வெளிமாநில மாணவர்களை முறைகேடாக சேர்த்துக் கொண்டனர்.

இது குறித்து, மருத்துவக் கவுன்சில், புதுச்சேரி அரசு, சேர்க்கை கமிட்டி தலைவரான ஓய்வுபெற்ற நீதிபதியிடம் புகார் அளித்தோம். இந்திய மருத்துவ கவுன்சில்,இது தொடர்பாக புதுச்சேரி அரசிடம் 8 முறை விளக்கம் கேட்டு கடிதம் அனுப்பியது.

இதுவரை எவ்வித பதிலையும் அரசு தெரிவிக்கவில்லை. தற்போது, இந்திய மருத்துவ கவுன்சில் நடவடிக்கை எடுத்து, சென்டாக் மூலம் சேர்ந்த மாணவர்களை தவிர, மற்ற அனைவரையும் நீக்குமாறு உத்தரவிட்டுள்ளது.

இப் பிரச்னையில், கல்லுாரிகள் மீது நடவடிக்கை எடுப்பதற்கு பதிலாக, மாணவர்கள் மீது நடவடிக்கை எடுக்கப்பட்டுள்ளது.

காலம் கடந்து எடுக்கப்பட்ட நடவடிக்கையால் மாணவர்களின் எதிர்காலம் பாதிக்கப் பட்டுள்ளது. இதற்கு காரணமான சுகாதாரத் துறை அதிகாரிகள் மீது நடவடிக்கை எடுக்க வேண்டும். இவ்வாறு, அவர் கூறினார்.

நன்றி : தினமலர் நாளிதழ் - 15.09.2017 

வேன் டிரைவரிடம் ஹெல்மெட் கேட்டு ரூ.100 அபராதம்

வேன் டிரைவரிடம் ஹெல்மெட் கேட்டு ரூ.100 அபராதம்

வேன் டிரைவரிடம் ஹெல்மெட் கேட்டு அடாவடி! ரூ.100 அபராதம் விதித்து சாதனை!

வேன் டிரைவரிடம் ஹெல்மெட் கேட்டு அடாவடி: ரூ.100 அபராதம் விதித்து சாதனை!

கோவை மாவட்டம் ஆலந்துறை பகுதியைச் சேர்ந்தவர் கர்ணன். நேற்று முன்தினம் மாலை, இவர் தன் 'டாடா ஏஸ்' வாகனத்தை ஓட்டிச் சென்றுள்ளார். அப்போது, காருண்யா நகர் போலீஸ் சப் - இன்ஸ்பெக்டர் சங்கர நாராயணன் வாகனத்தை மறித்து சோதனையிட்டுள்ளார். ஆவணங்கள் எல்லாம் சரியாக இருக்கவே, என்ன செய்வதென்று தெரியாமல், 'நான் நிறுத்தியது நிறுத்திவிட்டேன். அதனால் கேஸ் போடாமல் விடமாட்டேன் ' என கர்ணணிடம் கூறியுள்ளார்.

ஹெல்மட் அணியாததால் அபராதம்

பின்னர், 'நீ ஹெல்மெட் அணியவில்லை. அதனால், அபராதம் 100 ரூபாய் மற்றும் ஸ்டேஷன் செலவுக்கு ரூ. 200 என மொத்தம் 300 ரூபாய் கொடுத்துவிட்டுப் போ' எனக் கூறியுள்ளார். 'டாடா ஏஸ் வாகனத்தில் வந்த நான் ஏன் ஹெல்மெட் அணிய வேண்டும்' என கர்ணன் கேட்கையில், 'என்னைப் பணி செய்யவிடாமல் தடுப்பதாக கேஸ் போட்டுவிடுவேன்' என அவரை மிரட்டியுள்ளார். சம்பவத்தின் உச்சகட்டமாக, வேனில் வந்தவர் ஹெல்மட் அணியவில்லை என ரூ.100 அபராதம் விதித்து ரசீதும் கொடுத்துள்ளார்.

சமூக விழிப்புஉணர்வு இயக்கத்தில் செயல்பட்டு வந்த கர்ணன், டாடா ஏஸ் வாகனத்தில் சென்றவருக்கு ஹெல்மெட் அணியாததால் அபராதம் என ஃபேஸ்புக் உள்ளிட்ட சமூக வலைதளங்களில் போலீஸ் தந்த ரசீதை பரப்பினார். கடமையை நேர்மையா கட் செய்த சப்-இன்ஸ்பெக்டர் சங்கர நாராயணனுக்கு குடியரசுத் தலைவர் விருது வழங்க வேண்டுமென கையெழுத்து இயக்கம் நடத்தப் போவதாக சமூக வலைதளங்களில் சிலர் இன்ஸ்பெக்டரை கேலிசெய்துவருகின்றனர்.

இதுகுறித்து காருண்யா நகர் போலீஸ் நிலையத்துக்குத் தொலைபேசியில் தொடர்பு கொண்டபோது, “அப்படி ஒரு சம்பவம் நடக்கவேயில்லை” என்று மறுத்தனர். 'சங்கர நாராணன் என்ற பெயரில் சப் -இன்ஸ்பெக்டர் அங்கே பணியில் இருக்கிறாரா' என்று கேட்ட போது, 'அப்படி யாரும் இங்கே இல்லை ' என்று மறுத்தனர்.

இதற்கிடையே, நேற்று இரவு கர்ணனை போலீஸ் நிலையத்துக்கு அழைத்த சப்-இன்ஸ்பெக்டர் சங்கர நாராயணன், அவரிடம் சமாதானம் பேசி, மன்னிப்புக் கேட்டதையடுத்து பிரச்னை முடிவுக்குவந்துள்ளது.

நன்றி : விகடன் செய்திகள் - 15.09.2017

‛அங்கீகாரம் ரத்து': பள்ளி நிர்வாகங்களுக்கு சி.பி.எஸ்.இ., எச்சரிக்கை

‛அங்கீகாரம் ரத்து': பள்ளி நிர்வாகங்களுக்கு சி.பி.எஸ்.இ., எச்சரிக்கை

புதுடில்லி: 'பள்ளி வளாகத்திற்குள் மாணவர்கள் துன்புறுத்தப்பட்டால், சம்பந்தப்பட்ட பள்ளியின் அங்கீகாரம் ரத்து செய்யப்படும்' என, மத்திய இடைநிலைக் கல்வி வாரியமான, சி.பி.எஸ்.இ., எச்சரித்துள்ளது.

வழிகாட்டி நெறிமுறைகள்:

ஹரியானா மாநிலம் குர்கானில் உள்ள ஒரு பள்ளியில், 7 வயது மாணவர் படுகொலை செய்யப்பட்டார். டில்லியில், 5 வயது மாணவி, பள்ளி ஊழியரால் பலாத்காரம் செய்யப்பட்டார். இதையடுத்து, பள்ளிகளில் மாணவர் பாதுகாப்பு தொடர்பான வழிகாட்டி நெறிமுறைகளை, சி.பி.எஸ்.இ., வெளியிட்டுள்ளது.

எச்சரிக்கை:

அதில், கூறப்பட்டுள்ளதாவது: மாணவர்களின் பாதுகாப்புக்கு, பள்ளி நிர்வாகம் மட்டுமே முழு பொறுப்பு. பள்ளி வளாகத்தில் மாணவர்கள் உடல்ரீதியாகவோ அல்லது மனரீதியாகவோ துன்புறுத்தப்பட்டால், சம்பந்தப்பட்ட பள்ளியின் அங்கீகாரம் ரத்து செய்யப்படும். மாணவர்களை பாதுகாப்பதில் உள்ள பொறுப்பு குறித்து, பள்ளி ஊழியர்களுக்கு பயிற்சி வழங்க வேண்டும். பள்ளி வளாகத்தில், கண்டிப்பாக, கண்காணிப்பு கேமரா பொருத்தப்பட வேண்டும். இவ்வாறு அதில் கூறப்பட்டுள்ளது.

நன்றி : தினமலர் நாளிதழ் - 15.09.2017

தாம்பரம் செங்கோட்டை சிறப்பு கட்டண ரயில் இயக்கம்

தாம்பரம் செங்கோட்டை சிறப்பு கட்டண ரயில் இயக்கம்

சென்னை: காவிரி புஷ்கர விழாவை முன்னிட்டு தாம்பரத்தில் இருந்து செங்கோட்டைக்கு சிறப்பு கட்டண ரயில்கள் இயக்கப்படும் என தெற்கு ரயில்வே வெளியிட்டுள்ள செய்திகுறிப்பில் தெரிவிக்கப்பட்டுள்ளது.

இதன்படி தாம்பரத்தில் இருந்து செங்கோட்டைக்கு விருத்தாசலம் திருச்சி வழியாக இயக்கப்படும்.    

மேலும் தாம்பரம்- செங்கோட்டை ரயில் செப்.,15, 16, 18. 20, 21, 22, 23, 25, 27, 28, 29 ஆகியதேதிகளில் அதிகாலை 5 மணிக்கு புறப்பட்டு இரவு 8.05க்கு செங்கோட்டை வந்து சேரும்.

அதே போல் செங்கோட்டை-தாம்பரம் ரயில் 16, 17, 19, 21, 22, 23, 24, 26, 28, 30 ஆகிய தேதிகளில் இயக்கப்படும் என தெரிவிக்கப்பட்டுள்ளது. இது செங்கோட்டையிலிருந்து காலை 6.35 மணிக்கு புறப்பட்டு இரவு 10.30க்கு தாம்பரம் சென்றடையும்.

இதற்கான முன்பதிவு  செப்.,14 காலை 8 மணி முதல் துவங்கப்பட்டுள்ளது.

நன்றி : தினமலர் நாளிதழ் - 13.09.2017

நன்றி : தினமலர் இபேப்பர் - மதுரை பதிப்பு - 29.09.2017 பக்கம்-6

முன்பதிவு பயணிகளுக்கு ஒரு மகிழ்ச்சியான செய்தி!

முன்பதிவு பயணிகளுக்கு ஒரு மகிழ்ச்சியான செய்தி!

ரயில்வேயில் 'எம் ஆதார்': புதிய வசதி அறிமுகம்

புதுடில்லி: ரயிலில் முன்பதிவு செய்யப்பட்ட பெட்டிகளில் பயணம் செய்யும் பயணியர், பயணத்தின்போது, தங்கள் மொபைலில் உள்ள டிஜிட்டல் வடிவ ஆதாரை அடையாள அட்டையாக ஏற்க முடிவு செய்யப்பட்டுள்ளது.

ரயில்வே வட்டாரங்கள் கூறியதாவது: 

இந்திய ஆதார் ஆணையம் அறிமுகப்படுத்தியுள்ள, 'எம் ஆதார்' என்ற, 'ஆப்'பை பயன்படுத்தி, ஒருவர், தன், ஆதார் அடையாள அட்டையை, மொபைல்போனுக்கு பதிவிறக்கம் செய்யலாம். ஆதார் அட்டையில், எந்த மொபைல் எண் உள்ளதோ, அந்த எண் பயன்படுத்தப்படும் மொபைல்போனில் மட்டுமே, இந்த, 'ஆப்'பை பதிவிறக்கம் செய்ய முடியும். ரயில்களில், முன்பதிவு செய்யப்பட்ட பெட்டிகளில் பயணம் செய்யும் பயணியர், பயணத்தின்போது, தங்கள் மொபைலில் உள்ள இந்த, 'ஆப்'பை பயன்படுத்தி, டிஜிட்டல் வடிவ ஆதாரை காட்டினால், அதை அடையாள அட்டையாக ஏற்க முடிவு செய்யப்பட்டுள்ளது.

நன்றி : தினமலர் நாளிதழ் -14.09.2017 

பொய் சாட்சியம் புனைதல்

பொய் சாட்சியம் புனைதல்

நமது நாட்டில் தண்டணைக்குரிய தப்பை செய்துவிட்டு ”பணம் படைத்தவர்களும், அரசியல்வாதிகளும், ரௌடிகளும்” தைரியமாக, உலாவிக் கொண்டு இருப்பதற்குக் காரணமான சட்டப் பிரிவு என்று ஒன்று உண்டென்றால் அது இந்திய தண்டணைச் சட்டம் 192வது பிரிவுதான்.

• தவறு செய்தவர்களை தண்டிக்க வேண்டும் என்று பொது மக்களும், சமூக ஆர்வலர்களும் முயற்சி செய்து முனையும்போது அவர்களை காவல்துறையினர் தடம் மாற, தடுமாற வைப்பது இந்தப் பிரிவின் மூலமாகத்தான்.
• இந்தப் பிரிவை நாம் தெரிந்துகொண்டு பயன்படுத்தாமல், சட்ட விழிப்புணர்வு இல்லாமல் இருப்பதுதான், நாட்டில் குற்றங்கள் பெருக வழி வகுக்கிறது.
• பொதுவாக காவல் நிலையத்தில் நாம், கடும் தண்டணைக்குரிய ஒரு குற்றம் சம்பந்தமாக ஆதாரங்களுடன் புகார் அளித்தால், முதலில் அதனை வாங்கவே மாட்டார்கள்.
• அப்படியே வாங்கினாலும் அதற்குரிய ஒப்புதல் ரசீது (CSR) தரமாட்டார்கள்.
• ரசீது தந்தாலும் விசாரணை செய்ய மாட்டார்கள்.
• ஒருவேளை விசாரணை நடத்தினாலும், முதல் தகவல் அறிக்கை (F.I.R) பதிவு செய்ய மாட்டார்கள்.
• முதல் தகவல் அறிக்கை பதிவு செய்தாலும், நீதிமன்றத்தில் குற்றப்பத்திரிக்கை (Police Report) தாக்கல் செய்ய மாட்டார்கள்.
• குற்றப்பத்திரிக்கை தாக்கல் செய்தாலும், எத்தனை ஆதாரங்களை நாம் அளித்திருந்தாலும் எதிரி குற்றமே செய்யாதது போல் பொய் சாட்சியங்களை புனைந்து அந்த வழக்கை முடித்து வைத்து விடுவார்கள்.

இதனைக் கடந்து போவதற்கு சட்டம் நமக்கு வழி வகுத்திருந்தாலும், இந்தப்பிரிவானது காவல்துறையினர் மூலம் நமக்கு தடங்கலை ஏற்படுத்தி விடுகிறது.

• பலர் தவங்கி விடுகிறார்கள்.
• இதற்கு அடுத்துச் செல்ல தய்ங்குகிறார்கள்.
• இதனைக் கடந்து சென்று எதிரிக்கு தண்டணை வாங்கித் தருகின்ற போராளிகளும் கூட, பொய்சாட்சியம் புனைந்த காவல்துறையினர்க்கு தண்டணை வாங்கித்தர வாய்ப்புகள் இருந்தும், ஏனோ அதுபோன்ற நடவடிக்கை எதுவும் எடுக்காமல், எதிரிக்கு தண்டணை வாங்கித் தந்த திருப்தியில் பேசாமல் இருந்து விடுகிறார்கள்.
• பொய் சாட்சியம் புனைந்த காவல்துறையினருக்கு சட்டப்போராளிகள் இந்தப் பிரிவின் மூலம் நடவடிக்கை எடுத்து அவர்களுக்கு கடுமையான தண்டணை பெற்றுத் தரலாம்.
• அவ்வாறு சிலர் செய்தாலே போதும்.
• பொய்சாட்சியம் புனைவதற்கு காவல்துறையினர் பயப்படுவார்கள்.
• நமது நாட்டில் குற்றங்கள் குறையும். நீதி தழைக்கும்.

அப்படி என்னதான் இருக்கிறது இந்தப் பிரிவில்? வாருங்கள் பார்க்கலாம்!

இந்திய தண்டணைச் சட்டம், பிரிவு-192

• புத்தகம் அல்லது பதிவேடு (Document) அல்லது மின்னணுப் பதிவுறு (Online Certificates) ஆகியவற்றில் சூழ்நிலை அல்லது பொய்யான பதிவு எதையேனும் அல்லது பொய்யுரையைக் கொண்ட பத்திரங்கள் எதையேனும் ஒரு நீதிமன்ற நடவடிக்கையில் ஒரு பொது ஊழியர் என்ற முறையில் ஒரு சாட்சியத்தின்படி தீர்ப்பு வழங்க வேண்டிதிருக்கும் போது, அந்த சாட்சியத்தில் தவறான எண்ணம் கொள்ளுமாறு உட்கருத்துடன் பொய்யான கருத்துக்களை புனைந்து நீதிமன்றத்தில் சம்ர்ப்பிக்கின்ற எவர் ஒருவரும் பொய் சாட்சியம் புனைபவர் ஆவார்.

இந்திய தண்டணைச் சட்டம், பிரிவு-193

• ஒரு நீதிமன்ற நடவடிக்கைகளின் எந்தக் கட்டத்திலும், உட்கருத்தோடு பொய் சாட்சியம் தருகின்ற அல்லது ஒரு நீதிமன்ற நடவடிக்கைகளின் எந்தக் கட்டத்திலும் பொய்சாட்சியம் புனைகின்றவர் யாராக இருந்தாலும், அவருக்கு ஏழு ஆண்டுகள் சிறைத் தண்டணை விதித்து தண்டிக்கப்படுவார்கள். மேலும் அவருக்கு அபராதமும் விதிக்கலாம்.

*************************************************அன்புடன் செல்வம் பழனிச்சாமி

பொதுக்குழுக் கூட்டம் - சட்டம் என்ன சொல்கிறது?

பொதுக்குழுக் கூட்டம் - சட்டம் என்ன சொல்கிறது?

தமிழ்நாடு சங்கங்கள் பதிவுச் சட்டம் - பிரிவு:26

1. பதிவு செய்யப்பட்ட சங்கங்கள் ஒவ்வொன்றும் ஆண்டுக்கு ஒரு முறையாவது பொதுக்குழுக் கூட்டத்தை கூட்ட வேண்டும். 
2. கூட்டத்தைக் கூட்டுவதற்கு முன்னர் 21 நாட்களுக்கு முன்னதாக அந்த பொதுக்குழுக்குட்டம் கூட்டப்படுவது குறித்து பதிவு செய்யப்பட்ட சங்கமானது தனது உறுப்பினர்களுக்கு அறிவிப்பு கொடுத்தல் வேண்டும்.
3. அந்த அறிவிப்பில் கூட்டம் நடக்கும் நாள், நேரம், இடம் ஆகியவற்றையும், கூட்டத்தின் குறிக்கோளையும் குறிப்பிட்டு இருக்க வேண்டும். 
4. மேலும் பைலாவில் அடங்கியுள்ள துணை விதிகளுக்கு அல்லது குறிக்கோளூக்கு திருத்தம் ஏதாவது கொண்டுவர  ஷை சங்க நிர்வாகிகள் நினைத்தால், அத்தகைய திருத்தத்தின் நகல் ஒன்றையும் இணைத்து தெரிவிக்க வேண்டும்.
5. மாவட்டப் பதிவாளர் அந்த பொதுக்குழுக் கூட்டத்தில் முன்னிலையாக தமக்கு கீழுள்ள ஒரு அலுவலரை நியமிக்கலாம்.

தமிழ்நாடு சங்கங்கள் பதிவுச் சட்டம் - விதி எண்:25

1. பதிவு செய்யப்பட்ட சங்கங்கள் ஒவ்வொன்றும் பிரிவு:26ன் கீழ் கூட்டப்படுகின்ற பொதுக்குழுக் கூட்ட அறிவிப்பை அநதக்கூட்டம் நடைபெற உள்ள நாளுக்கு குறைந்தது 21 நாட்களுக்கு முன்னர் உறுப்பினர்களுக்கு கொடுக்க வேண்டும்.
2. கீழ்காணும் முறைகளில் ஒன்றால் அல்லது பலவற்றால் உறுப்பினர்களுக்கு அந்த அறிவிப்பை அனுப்ப வேண்டும்.

• உள்ளூர் தபால் சேர்ப்பிப்பு வழியாக; அல்லது
• தபால் மூலமாக; அல்லது 
• உறுப்பினர்களுக்கு சுற்றறிக்கை வழியாக; அல்லது
• அரசு இதழ் விளம்பரம் வழியாக.

*************************************************அன்புடன் செல்வம் பழனிச்சாமி

தமிழக அரசுக்கு மதுரை உயர்நீதிமன்றக் கிளை உத்தரவு

தமிழக அரசுக்கு மதுரை உயர்நீதிமன்றக் கிளை உத்தரவு

நவோதயா வித்யாலயா பள்ளிகள்

தமிழகத்தில் துவங்க தமிழகத்தில் மாவட்டந் தோறும் நவோதயா வித்யாலயா பள்ளிகளை துவக்க, அனுமதி வழங்குவது குறித்து, தமிழக அரசு முடிவெடுக்க வேண்டும்’ என, உயர் நீதிமன்ற மதுரைக் கிளை உத்தரவிட்டுள்ளது.

குமரி மகாசபா செயலர் ஜெயகுமார் தாமஸ் தாக்கல் செய்த பொதுநல மனு:

கேந்திரிய வித்யாலயா, ஜவஹர் நவோதயா வித்யாலயா பள்ளிகளை மத்திய அரசு நடத்துகிறது. தமிழகத்தில் கேந்திரிய வித்யாலயா பள்ளிகள் மட்டுமே உள்ளன. ஜவஹர் நவோதயா வித்யாலயா என்பது உண்டு, உறைவிடப் பள்ளி.மும்மொழி கொள்கைஆறாவது வகுப்பு முதல், பிளஸ் 2 வரை கற்பிக்கப்படுகிறது. பிராந்திய மொழி, ஆங்கிலம், ஹிந்திக்கு முக்கியத்துவம் அளிக்கப்படுகிறது.

மும்மொழிக் கொள்கையுடையது

தமிழகத்தில் மாவட்டந்தோறும், ஜவஹர் நவோதயா வித்யாலயா பள்ளிகளை துவக்க மத்திய, மாநில அரசுகள் நடவடிக்கை எடுக்க உத்தரவிட வேண்டும். இவ்வாறு ஜெயகுமார் தாமஸ் மனு செய்திருந்தார். 

தமிழக அரசு சார்பில் தாக்கல் செய்த பதில் மனுவில்,

’தமிழ்நாடு தமிழ்வழி கற்பித்தல் - 2006 சட்டத்தின்படி, தமிழ், ஆங்கிலம் இருமொழிக் கொள்கை பின்பற்றப்படுகிறது.

நவோதயா பள்ளியானது பிராந்திய மொழி, ஆங்கிலம், ஹிந்தி மும்மொழிக் கொள்கையுடையது. தமிழுக்கு வாய்ப்பு மறுக்கப்படும்’ என குறிப்பிட்டு இருந்தது.மத்திய அரசு சார்பில் தாக்கலான பதில் மனுவில், ’நவோதயாவில் 6ம் வகுப்புமுதல், 10ம் வகுப்பு வரை, தமிழ் கட்டாயப் பாடம். ஆங்கிலம் உட்பட இதர பாடங்கள் உள்ளன.

’பிளஸ் 1 முதல், பிளஸ் 2 வரை, தமிழ் கூடுதல் மொழி. நவோதயாவில் தங்குமிடம், உணவு,கட்டணம் இலவசம். கிராமப்புற மாணவர்களுக்கு, 75 சதவீதம் முன்னுரிமை உண்டு. தமிழக அரசு ஒப்புதல் அளித்தால் நவோதயா பள்ளிகள் துவக்கத் தயார்’ என, தெரிவித்து இருந்தது.

நீதிபதிகள், கே.கே.சசிதரன், ஜி.ஆர்.சுவாமிநாதன் அமர்வு நேற்று விசாரித்தது.தமிழக அரசின் கூடுதல் தலைமை வழக்கறிஞர், ’இவ்விவகாரம் அரசின் கொள்கை முடிவு தொடர்புடையது; அமைச்சரவை கூடித்தான் இறுதி முடிவு எடுக்க முடியும்’ என்றார்.

மாவட்டத்திற்கு, ரூ.20 கோடி

புதுச்சேரி ஜவஹர் நவோதயா வித்யாலயா முதல்வர் வெங்கடேஸ்வரன் ஆஜராகி விளக்கமளிக்கையில், 

’மாவட்டந்தோறும் நவோதயா வித்யாலயாக்கள் அமைக்கதலா, 30 ஏக்கர் நிலம் தேவை. கட்டுமானத்திற்கு ஒரு மாவட்டத்திற்கு, 20 கோடி ரூபாயை மத்திய அரசு வழங்கும். கட்டுமானம் முடியும் வரை, முதல் மூன்று ஆண்டுகளில் தற்காலிக இடத்தில் பள்ளிகள் இயங்கும்.

முதற்கட்டமாக, 6ம் வகுப்பில், 240 மாணவர்கள் அனுமதிக்கப்படுவர். அவர்கள் பிளஸ் 2 வரை படிப்பை தொடர்வர்.’நவோதயா வித்யாலயாவில், 2018 - 19 கல்வியாண்டில் சேருவதற்கான நுழைவுத் தேர்வு, 2018 ஜனவரியில் நடக்கிறது. அதற்கேற்ப தமிழகத்தில், நவோதயா வித்யாலயாக்களை துவங்க, நடவடிக்கை எடுக்க வேண்டும்’ என்றார்.இவ்வாறு விவாதம் நடந்தது.

30ஆண்டு நடைமறை சிக்கல்

நீதிபதிகள் பிறப்பித்த உத்தரவில் கூறியதாவது:

நவோதயாவில் தமிழுக்கு முக்கியத்துவம் அளிக்கப்படுகிறது’ என, மத்திய அரசு கூறுகிறது. நவோதயாவை தமிழகத்தில் துவங்க அனுமதிப்பதன் பயனாக, இவ்விவகாரத்தில், 30 ஆண்டுகளாக இருந்த நடைமுறைச் சிக்கல்களுக்கு தீர்வு ஏற்படும். இதில் மத்திய, மாநில அரசுகள் இடையே தகவல் தொடர்பில் இடைவெளி இருந்துள்ளது.

இப்பள்ளிகளை அனுமதிப்பது, கட்டமைப்பு மற்றும் தடையில்லாச் சான்று வழங்குவது குறித்து, தமிழக அரசு, எட்டு வாரங்களில் தகுந்த முடிவெடுக்க வேண்டும்.இவ்வாறு உத்தரவில் கூறினர்.

நன்றி : தினமலர் - கல்விமலர் - 12.09.2017 

ஆவணங்களின் முக்கியத்துவம் பற்றி .....

ஆவணங்களின் முக்கியத்துவம் பற்றி .....

குற்றங்களை வகைப்படுத்தி,  இந்திய தண்டணைச் சட்டத்தின் கீழ்,  அதனைச் செய்தவர்களுக்கு உரிய தண்டணையை வழங்குவதற்கு நீதிமன்றங்களில் இந்திய சாட்சியச் சட்டம் பயன்படுத்தப்படுகிறது. 

சாட்சியம் என்று சொன்னால், ஒரு நீதிமன்றத்தில் ஒருவராலோ அல்லது பலராலோ கொடுக்கப்படுகின்ற வாக்குமூலங்கள்  அல்லது சமர்ப்பிக்கப்படுகின்ற ஆவணங்கள் ஆகும்.
இந்திய சாட்சியச் சட்டம், பிரிவு - 3

எழுத்தால் எழுதப்பட்ட உரையையே நாம் ஆவணம் என்கிறோம். இதனை நீதிமன்றத்தில் சாட்சியமாக அளிக்கும்போது "ஆவண சாட்சியம்" (Documentary Evidence) என்று சொல்கிறோம்.  ஒரு ஆவணத்தில் கூறப்பட்டு உள்ள சங்கதிகளை நிரூபிப்பதற்கு, அந்த ஆவணத்தை நீதிமன்றத்தில் சமர்ப்பிப்பது தவிர சிறந்தது ஏதுமில்லை. 
இந்திய சாட்சியச் சட்டம், பிரிவு - 59
ஆவணங்களில் உள்ள சங்கதிகளை வாய்மொழி சாட்சியங்கள் மூலம் மெய்ப்பிக்க வேண்டியதில்லை. ஏனென்றால், அந்த ஆவணத்தையே ஒரு சாட்சியமாக நீதிமன்றத்தில் தாக்கல் செய்யும்போது அதில் உள்ள சங்கதிகளை மெய்ப்பித்து விடலாம். அந்த அளவுக்கு ஒரு சிறந்த சாட்சியம் ( Best Evidence) ஆவண சாட்சியம் ஆகும்.
இந்திய சாட்சியச் சட்டம், பிரிவு - 61
ஒரு ஆவணத்திலுள்ள சங்கதிகளை தலைநிலை சாட்சியம் மூலமாகவோ அல்லது சார்நிலை சாட்சியம் மூலமாகவோ நீதிமன்றத்தில் நாம் மெய்ப்பிக்கலாம்
இந்திய சாட்சியச் சட்டம், பிரிவு - 62
ஒருவர் ஆவண சாட்சியத்தை நீதிமன்றத்தில் தாக்கல் செய்யும்போது அந்த ஆவணத்தின் அசலையே தாக்கல் செய்ய வேண்டும்   இந்த  அசல்  ஆவணமானது  “தலை நிலை சாட்சியம்”      
 ( Primary Evidence) அல்லது “முதல் நிலை சாட்சியம்”  ஆகும்.  இதற்கு இணை ஏதுமில்லை. 

இந்திய சாட்சியச் சட்டம், பிரிவு - 63

ஆவண சாட்சியத்தை நீதிமன்றத்தில் தாக்கல் செய்யும்போது அந்த ஆவணத்தின் அசலை தாக்கல் செய்ய முடியாத சமயத்தில் அந்த அசல் ஆவணத்தின் உண்மை நகலை தாக்கல் செய்யலாம். இது சார்நிலை சாட்சியம் (Secondary Evidence)  ஆகும். ஆனால், இது  இரண்டாந்தரமான  சாட்சிய்ம் ஆகும்.
இந்திய சாட்சியச் சட்டம், பிரிவு - 64
ஆவணங்களை நீதிமன்றத்தில் மெய்ப்பிக்க தலைநிலை சாட்சியம் மூலமாகவே மெய்ப்பிக்க வேண்டும்.  
இந்திய சாட்சியச் சட்டம், பிரிவு - 65
சார்நிலை சாட்சியம்  எந்தெந்த சூழ்நிலைகளில் அளிக்கப்படலாம்? என்பது குறித்து இந்தப்பிரிவு விளக்குகிறது.

1. எவர் ஒருவருக்கு அந்த ஆவணமானது பயன்படுத்தப்படுமோ, அந்த நபர் அந்த ஆவணத்தின் அசலை வைத்திருக்கும்போது அல்லது அவ்வாறு வைத்திருப்பதாக தோன்றும் போது.
2. எவருக்கு எதிராக ஒரு ஆவணத்தின் சங்கதிகள் பயன்படுத்தப்படுமோ அவரே அதனை எழுத்து மூலமாக அந்த ஆவணத்தின் சங்கதிகளை ஏற்றுக் கொண்டுள்ளார்! என்று மெய்ப்பிக்கப்படும்போது.
3. அசல் ஆவணமானது அழிந்து போயிருந்தாலோ அல்லது தொலைந்து போயிருந்தாலோ.
4. அசல் ஆவணத்தை எளிதாக வெளியில் எடுத்துச் செல்ல முடியாதபோது.
5. அசல் ஆவணமானது இந்திய சாட்சியச் சட்டம், பிரிவு-74ன்படி பொது ஆவணமாக இருக்கும்போது.
6. அசல் ஆவணமானது எந்த ஒரு சட்டத்தாலும் அனுமதிக்கப்பட்ட வகையில் சான்றளிக்கப்பட்ட நகலாக இருக்கும்போது.
7. அசல் ஆவணமானது நீதிமன்றத்தில்  வைத்து வசதியாக ஆய்வு செய்வத்ற்கு முடியாதவாறு ஏராளமான பக்கங்களை கொண்டிருக்கும்போது.

தொல்லாவணம் ( Ancient Document) 

ஒரு ஆவணமானது முப்பது ஆண்டுகளுக்கு முந்தையதாக இருந்தால், அதனை தொல்லாவணம் என்கிறோம். எதிர் தரப்பினர் மறுப்பு ஏதும் இல்லாமல் இருந்தால் அதிலுள்ள சங்கதிகள் அனைத்தையும் நீதிமன்றம் உண்மையானது என்று  நம்பிக்கை கொள்ளலாம். ஆனால், சம்பந்தப்பட்ட ஆவணம் அது எழுதப்பட்ட நாளில் இருந்து முப்பது ஆண்டுகளை கடந்ததாக இருக்க வேண்டும். அது அந்த ஆவணத்தில் குறிக்கப்பட்டு இருக்கவேண்டும். 

இந்திய சாட்சியச் சட்டம், பிரிவு - 90

மேற்கண்ட தொல்லாவணத்தைப் பற்றி இந்திய சாட்சியச் சட்டம் பிரிவு 90ல் கூற்ப்பட்டுள்ளது. மேலும், தொல்லாவணம் போல் ஐந்து ஆண்டுகள் ஆகிய மின்னியக்க பதிவேடுகள் (Online Documents) குறித்தும் நம்பிக்கை கொள்ளலாம் என்று புதிதாக சேர்க்கப்பட்ட இந்திய சாட்சியச் சட்டம், பிரிவு - 90-A-3 ல் கூறப்பட்டுள்ளது.
************************************************அன்புடன் செல்வம் பழனிச்சாமி