பள்ளி, கல்லூரிகளில் பொருட்காட்சி நடத்த தடை

சென்னை: பள்ளி, கல்லுாரிகளில் அரசின் சாதனை விளக்க கண்காட்சி மற்றும் பொருட்காட்சி நடத்த, சென்னை உயர் நீதிமன்றம் தடை விதித்துள்ளது.

திருப்பூர் மாவட்டம், அங்கேரிபாளையத்தை சேர்ந்த கதிர்வேல், எம்.காம்., மாணவர், உயர் நீதிமன்றத்தில், மனு தாக்கல் செய்தார். அதில், ’திருப்பூரில் உள்ள, சிக்கன்னா அரசு கலை கல்லுாரியில், டிச., 3 முதல், 45 நாட்களுக்குபொருட்காட்சி நடைபெற உள்ளது. இது, வகுப்புகளுக்கு இடையூறாக இருக்கும்.

எனவே, கல்லுாரி வளாகத்தில், பொருட்காட்சி நடத்த தடை விதிக்க வேண்டும்; வேறு இடத்தில் நடத்த உத்தரவிட வேண்டும்’ என, கோரி இருந்தார்.

வழக்கை நீதிபதி, கிருபாகரன் விசாரித்தார். அப்போது அரசு தலைமை வழக்கறிஞர், விஜய் நாராயண் ”பொருட்காட்சி நடத்துவதற்கு, 90 சதவீத ஏற்பாடுகள் முடிந்து விட்டது. அதனால், பொருட்காட்சியை வேறு இடத்திற்கு மாற்ற முடியாது,” என்றார்.

இதையடுத்து நீதிபதி பிறப்பித்த உத்தரவு

கடைசி நேரத்தில் வழக்கு தொடரப்பட்டுள்ளது. எனவே, திருப்பூர், கலை கல்லுாரியில் பொருட்காட்சி நடத்த தடை விதிக்க முடியாது. வரும் காலங்களில், அரசு பள்ளி, கல்லுாரிகளில் பொருட்காட்சி நடத்த, தடை விதிக்கப்படுகிறது. இதுகுறித்து, அரசு விதிமுறைகளை வகுக்க வேண்டும். இவ்வாறு நீதிபதி உத்தரவிட்டார்.

நன்றி : தினமலர் நாளிதழ் - 02.12.2017 

குடியிருப்பு திட்டங்கள் பதிவு

குடியிருப்பு திட்டங்கள் பதிவு : 'சிடி' ஆவணம் கட்டாயம்

ரியல் எஸ்டேட் ஒழுங்குமுறை சட்டப்படி,குடியிருப்பு திட்டங்களை பதிவு செய்ய விண்ணப்பிக்கும் நிறுவனங்கள், அனைத்து ஆவணங்களையும், 'சிடி' வடிவத்தில் தருவது கட்டாயமாக்கப்பட்டு உள்ளது. தமிழகத்தில், ரியல் எஸ்டேட் ஒழுங்குமுறை ஆணையத்தில், தற்போதைய நிலவரப்படி, 223 திட்டங்கள் பதிவு செய்யப்பட்டு உள்ளதாக, இணையதளத்தில் தெரிவிக்கப்பட்டு உள்ளது. ஆனால், பெரும்பாலான திட்டங்களின் வரைபடங்கள், திட்ட அனுமதி விபர ஆவணங்கள் உள்ளிட்ட விபரங்கள், இணையதளத்தில் பதிவேற்றப்படவில்லை.

இந்நிலையில், ரியல் எஸ்டேட் ஒழுங்குமுறை சட்டப்படி, பதிவு செய்ய விண்ணப்பிக்கும் நிறுவனங்கள், வரைபடம், திட்ட அனுமதி, பரப்பளவு விபரங்களை, 'ஸ்கேன்' செய்யப்பட்ட ஆவணங்களாக அளிக்கின்றன. இவற்றை இணையதளத்தில் பதிவேற்றுவதில், பல்வேறு சிக்கல்கள் ஏற்படுவதாக கூறப்படுகிறது. எனவே, புதிதாக பதிவு செய்ய விண்ணப்பிக்கும் நிறுவனங்கள், திட்டம் தொடர்பான ஆவணங்களை, பி.டி.எப்., வடிவில், 'சிடி'யில் பதிவு செய்து அளிக்க வேண்டும். இந்த நடைமுறை கட்டாயமாக்கப்பட்டு உள்ளதாக, ரியல் எஸ்டேட் ஒழுங்குமுறை ஆணையம் அறிவித்துள்ளது.

நன்றி : தினமலர் நாளிதழ் - 30.11.2017 

குழந்தைகளுக்கான இணையதள பக்கங்கள்!

இணையத் தொழில்நுட்ப வளர்ச்சியில் குழந்தைகளும் கைகோத்து பயணிக்க ஆரம்பித்துள்ளனர். ஆனால், ஃபேஸ்புக், பொழுதுபோக்குப் பக்கங்கள் என அவர்களின் கவனம் சிதற விடாமல் ஆக்கப்பூர்வமான வழியில் மடை திருப்ப, குழந்தைகளுக்கான பிரத்யேக வலைதளங்கள் பல செயல்பட்டு வருகின்றன. உங்கள் வீட்டு குட்டிஸுக்கு அறிமுகப்படுத்த சில தரமான வலைதள முகவரிகள் இங்கே..

Kids Health

மருத்துவச் செய்திகளை குழந்தைகளுக்குக் கற்றுக் கொடுக்கும் பக்கம் இது. ‘ஆஸ்துமா என்றால் என்ன?’, ‘நமது உடல் பாகங்கள் எவ்வாறு செயல்படுகின்றன?’, ‘வைரஸ் காய்ச்சல் எதனால் ஏற்படுகிறது?’ என, இப்படி மருத்துவம் சம்பந்தமான குழந்தைகளின் அனைத்து சந்தேகங்களுக்கும், கேள்விகளுக்கும் இங்கே விடை கிடைக்கும்.

மேலும், வீடியோ மூலமாகவும் தகவல்களை தெளிவுற தெரிந்துகொள்ளலாம். 

இதன் வலைதள முகவரி: http://kidshealth.org/kid/.National Geographic Kids

National Geographic Kids

அமெரிக்காவிலிருந்து செயல்படும் அறிவியல், கல்வி அமைப்பான The National Geographic Society, குழந்தைகளுக்காக நடத்தும் வலைதளம் இது. இதில் தாவரங்கள், உயிரினங்கள் பற்றிய செய்திகளை குழந்தைகள் சுலபமாக கற்றுக் கொள்ளலாம்.

வாண்டுகளின் ஆர்வத்தைத் தூண்டும் வகையிலான இந்த தளத்தின் புகைப்படங்களும், வீடியோக்களின் இதன் பெரிய பிளஸ். வலைதள முகவரி: http://kids.nationalgeographic.com/kids/.

Kidsmart

இது லண்டனிலிருந்து குழந்தைகளுக்காகச் செயல்படும் இணையதளம். இணையம் தொடர்பான பல்வேறு விஷயங்களை சுலபமாகப் புரிந்துகொள்ளும் வகையில் குழந்தைகளுக்கு கற்றுத் தருகிறது இந்த இணையதளம்.

சாட்டிங், சமூக வலைதள பக்கங்கள், இணைய பாதுகாப்பு உள்ளிட்ட பல விஷயங்களை சின்ன சின்ன டிப்ஸ்களாகத் தெரிந்துகொள்ளலாம். வலைதள முகவரி: http://www.kidsmart .org.uk/.

உங்கள் செல்லங்களின் இணையப் பொழுதுகள் இனி பயனுள்ளதாகக் கழியட்டும்!

- சா.வடிவரசு

நன்றி “ விகடன் செய்திகள் 28.11.2014