ஆங்கில வார்த்தைகளின் சுருக்கம்

நாம் தினமும் அடிக்கடி பேசும் போது பல ஆங்கில சுருக்க வார்த்தைகளை பயன்படுத்தி வருகிறோம். அதில் பல ஆங்கில சுருக்க வார்த்தைகளின் விரிவாக்கம் என்ன என்பது தெரிந்து வைத்திருக்க மாட்டோம். நன்றாக தெரிந்த வார்த்தையைப் போல தான் இருக்கும். ஆனால், யாராவது அதன் விரிவாக்கம் என்ன? என்று திடீரென கேள்வி எழுப்பினால் திருதிருவென முழிப்போம். நாம் அடிக்கடி பேச்சுவழக்கில் உபயோகிக்கும் ஆங்கில சுருக்க வார்த்தைகளின் விரிவாக்கங்களை தொகுத்து தந்திருக்கிறேன். அறிந்து கொள்ளுங்கள்.. 
PDF 

நாம் மெயில்களின் மூலமாக அனுப்புகின்ற பைல்களை PDF பைல்களாகவே அனுப்புகிறோம். இதனால், அதனை பெறுபவர்களுக்கு நாம் அனுப்புகின்ற செய்தி தோற்றம் மாறாமல் அப்படியே கிடைக்கும். இந்த PDF என்பதன் விரிவாக்கம் Portable Document Format ஆகும்.

DP

ஃபேஸ்புக், வாட்ஸ்-அப், ட்விட்டர் என அனைத்து சமூக செயலிகளிலும் முகப்பு படம் என்று ஒன்று வைத்திருப்போம். பெரும்பாலும் அந்தப்படம் நமது உண்மையான படமாக இருப்பதில்லை. இருந்தாலும், அது நம்மை அடையாளம் காட்டும் படமாக திகழ்கிறது. இதை சுருக்கமாக DP என்று ஆங்கிலத்தில் கூறுகிறோம். இதன் விரிவாக்கம் Display Picture ஆகும்.

ROFL

சில சமயங்களில் ஃபேஸ்புக், வாட்ஸ்-அப், ட்விட்டர் போன்றவைகளில் நீங்கள் ஏதேனும் காமெடியான படம், வீடியோ அல்லது ஸ்டேட்ஸ் பகிர்ந்திருந்தாலோ, பல சமயங்களில் உங்கள் முகப்பு படத்திற்கு கீழேயும் இப்படி ROFL என சிலர் கமெண்ட் செய்ததை நீங்கள் பார்த்திருக்கலாம்.. இதை விரிவாக்கம் Rolling On Floor Laughing. அதாவது விழுந்து, விழுந்து சிரிச்சேன் என்ற அர்த்தம் கொண்ட வாசகம்.
SMS 
செல்போன் மூலமாக நாம் அனுப்புகின்ற செய்திகளை SMS  என்கிறோம். இதன் விரிவாக்கம் Short Message Service ஆகும்.
DSLR

 உன்னோட DSLR கொடேன், எங்க காலேஜ்ல இருந்து டூர் போறாங்க என்று உங்கள்  நண்பர்கள் உங்களிடம் கேட்டிருக்கலாம். இந்த DSLR-ன் விரிவாக்கம் Digital Single Lens Reflex.

OTP

நீங்கள் ஆன்லைன் மூலமாக  பண பரிமாற்றம் செய்தாலும், டிக்கெட்டுகள் புக் செய்தாலும் இந்த OTP உங்கள் மொபைல் எண் குறுஞ்செய்திக்கு அந்த நிறுவனத்தால் அனுப்பப்படும். இதன் விரிவாக்கம் One Time Password  ஆகும்.

AM ,  PM

மொபைல், கணினி, லேப்டாப், வ்ரிஸ்ட் வாட்சுகளில் நேரத்தை பிரித்துக் காண உதவுகின்ற வார்த்தை AM / PM ஆகும்.   இதன் விரிவாக்கம் AM என்றால் Ante Meridiem, PM என்றால் Post Meridiem ஆகும்.

YOLO

பெரும்பாலும் யோ-யோ மக்கள் தான் இத்தகைய சுருக்க வார்த்தைகளை பயன்படுத்துவார்கள். YOLO என்றால் You Only Live Once என்பதாகும். நீ வாழும் வாழ்க்கை ஒரு முறையானது என்பதை இது குறிக்கிறது.

JPEG

பெரும்பாலும் நாம் இணையத்தில் இருந்து ஒரு புகைப்படத்தை பதிவிறக்கம் செய்தால் அதன் டீடெய்ல்ஸ்-ல் Format என்ற இடத்தில் .JPEG என்று இருக்கும். இதன் விரிவாக்கம் Joint Photographic Experts Group என்பதாகும்.

அதேபோல வாட்ஸ்-அப்பில் GIF என்ற பெயரில் சிறிய வீடியோ போல சில பகிர்வுகள் வரும். இதன் விரிவாக்கம் Graphic Interchange Format ஆகும்.

BYE

Bye னா ஏன்ன? டாட்டா, See You சொல்ற மாதிரி ஒரு வார்த்தை அல்ல.  BYE என்பதற்கு ஒரு விரிவாக்கம் இருக்கிறது. BYE என்றால் Be With You Every time அர்த்தம். நான் எல்லா நேரத்திலும் உன்னுடன் இருப்பேன் என்பதை இது குறிக்கிறது.

ZIP

விண்ணப்பங்களை  நீங்கள் ஃபில் செய்யும் போது நகரம் என்பதற்கு பக்கத்தில் ZIP என்ற பெட்டி இருக்கும் அங்கே நாம் வசிக்கும் இடத்தின் குறியீட்டு எண்னை பதிவு செய்வோம். 600001, 641008, 560011 என ஒவ்வொரு நகரத்தின் ஒவ்வொரு பகுதிக்கும் இப்படி ஒரு குறியீட்டு என் இருக்கும். இதன் விரிவாக்கம் Zone Improvement Plan Code ஆகும்.

SIM

செல்போன் வைத்திருப்பவர்கள் அனைவரும் அடிக்கடி சொல்லக்கூடிய வார்த்தை இது.   இந்த SIMன் விரிவாக்கம்  Subscribers Identification Module ஆகும். 
QR Code

 நாம் Bar Code  பற்றி அறிந்திருக்கிறோம். சில வருடங்களுக்கு முன்னால்தான் இந்த QR Code நமக்கு அறிமுகம் ஆனது. நாம் வாங்குகின்ற எல்லா பொருளிலும், சில பில்களிலும் கூட இந்த Codeஐ நாம் பார்க்கலாம். இதன் விரிவாக்கம் Quick Response Code ஆகும்.

TRP

இன்றைய சூழலில் பல தொலைக்காட்சி நிகழ்சிகள் மிகமிக மோசமாக தான் நடத்தப்படுகின்றன. சில மோசமான நிகழ்சிகளை காணுகின்ற நாம்  இவனுங்க டிஆர்பி-காக தான் இப்படி பண்றாங்க... என்போம். இதன் விரிவாக்கம் Television Rating Point ஆகும்.

GPS

ஒருவர் எங்கே இருக்கிறார்?, எங்கே சென்றிருக்கிறார்? அவர் எந்த திசையில் பயணித்துக் கொண்டிருக்கிறார்? என அனைத்தையும் GPS உதவியுடன் நாம் அறிந்துக் கொள்ள முடியும். பெரு நகரங்களில் கால் டாக்ஸி புக் செய்துவிட்டு அது எங்கு வந்து கொண்டிருக்கிறது என்பது இதை வைத்துத்தான். இதன் விரிவாக்கம் என்னவெனில், Global Positioning System ஆகும்.
RIP
இரங்கல் செய்திகளுக்குக் கீழே RIP என்று சுருக்கமாக கமெண்ட் செய்வதை நீங்கள் பார்த்திருக்கலாம். அது இறந்தவர் ஆத்மா சாந்தி அடையட்டும் என்ற அர்த்தத்தைக் குறிக்கும் வார்த்தை ஆகும். இதன் விரிவாக்கம் requiescat in pace ஆகும்.

************************************* அன்புடன் செல்வம் பழனிச்சாமி - 22.01.2018 

பிறப்பை வைத்துத்தான் ஒருவரது ஜாதி நிர்ணயிக்கப்படுகிறது

திருமணத்தால் ஒருவரது ஜாதியை மாற்ற முடியாது!

ஒருவரது பிறப்பை வைத்துத்தான் அவரது வகுப்பு (ஜாதி) நிர்ணயிக்கப்படுகிறது, திருமணத்தால் அதனை மாற்ற முடியாது! என்று சுப்ரீம் கோர்ட் அதிரடியாக தீர்ப்பு ஒன்றை வழங்கியுள்ளது.

உத்தரப் பிரதேசத்தில் வசித்த அகர்வால் வகுப்பைச் சேர்ந்த ஒரு பெண்மணி தாழ்த்தப்பட்ட வகுப்பைச் சேர்ந்த ஒருவரை மணமுடித்துக் கொண்டார். அகர்வால் என்பது உயர் வகுப்பாகும். 

தாழ்த்தப்பட்டவரை மணந்ததால்.....

தாழ்த்தப்பட்ட வகுப்பைச் சேர்ந்தவரை மணமுடித்த காரணத்தினால், உத்தரப்பிரதேசத்திலுள்ள புலந்த்சாஹர் மாவட்ட மாஜிஸ்திரேட்டிடம் இருந்து 1991ம் ஆண்டில், தாழ்த்தப்பட்டவர் என்ற சான்றிதழைப் பெற்றார். அந்தச் சான்றிதழை சமர்ப்பித்து,  பஞ்சாப் மாநிலத்திலுள்ள பதன்கோட் என்ற நகரிலுள்ள கேந்த்ரிய வித்யசாலா ஒன்றில் 1993ம் ஆண்டில் பட்டதாரி ஆசிரியராக பணி நியமனம் பெற்றார். 20 வருடங்களுக்கு மேலாக அங்கு பணிபுரிந்து அப்பள்ளியின் வைஸ் பிரின்ஸிபால் ஆகவும் நியமிக்கப்பட்டார். 

ரத்து செய்த அதிகாரிகள்

உயர் வகுப்பைச் சேர்ந்த பெண்மணி ஒருவர் தாழ்த்தப்பட்டவர் என்று சான்றிதழ் அளித்து வேலை பார்க்கிறார் என்ற புகார் எழுந்தது. கல்வித்துறை அதிகாரிகள் ஆய்வு செய்து, 2015ம் ஆண்டில் அவரது வேலையை ரத்து செய்தனர்.

நீதிமன்றத்தை நாடிய பெண்மணி

அந்தப் பெண்மணி அலகாபாத் உயர்நீதிமன்றத்தில் தன்னை பணி நீக்கம் செய்தது செல்லாது என்று வழக்குத் தொடுத்தார். அவரது வேண்டுகோளை அலகாபாத் உயர் நீதிமன்றம் நிராகரித்தது. அதனால், அந்தப் பெண்மணி உச்ச நீதிமன்றத்தை நாடினார்.

அமர்வு அளித்த அதிரடி தீர்ப்பு

அருண் மிஸ்ரா மற்றும் எம்.எம்.சந்தான கௌடர் ஆகிய நீதிபதிகள் கொண்ட அமர்வு இந்த வழக்கை விசாரித்து, ஒருவரது பிறப்பை வைத்துத்தான் அவரது வகுப்பு (ஜாதி) நிர்ணயிக்கப்படுகிறது, திருமணத்தால் அதனை மாற்ற முடியாது! என்று 18.01.2018 அன்று   அதிரடியாக தீர்ப்பு ஒன்றை வழங்கியது.

************************************ அன்புடன் செல்வம் பழனிச்சாமி - 20.01.2018 

இரு சக்கர வாகனம் - பெண்களுக்கு

அம்மா இருசக்கர வாகன திட்டத்தின் கீழ் வாகனம் பெற விண்ணப்பிக்க பெண்களுக்கு தகுதி என்ன இருக்க வேண்டும் என்பது குறித்து அரசு வெளியிட்டுள்ள குறிப்பு வருமாறு:

பயனாளிகளுக்குள்ள தகுதி என்ன?

கியர் இல்லாத அல்லது தானியங்கி கியருடன் கூடிய 125.சிசி எந்திரத் திறன் கொண்ட புதிய இரு சக்கர வாகனங்களுக்கு வாகன விலையில் ரூ.25000/- அல்லது அந்த வாகனத்தின் 50% விலை இதில் எது குறைவாக உள்ளதோ அந்தத் தொகை பயனாளிக்கு அரசினால் வழங்கப்படும்..

வாங்கக்கூடிய இரு சக்கர வாகனம் 01.01.2018க்குப் பின்னர் தயாரிக்கப்பட்டதாக இருக்க வேண்டும்..

பயனாளிகளுக்குண்டான பணியாற்றும் தகுதி:

1.நிறுவனப் பணியில் உள்ள மற்றும் முறைசாரா பணியிலுள்ள பெண்கள்.

2. கடைகள் மற்றும் இதர நிறுவனங்களில் பணி புரியும் பெண்கள்.

3.அரசு சார்பு நிறுவனம், தனியார் நிறுவனம், சமுதாய அமைப்புகள், ஊராட்சி அளவிலான கூட்டமைப்பு, கிராம வறுமை ஒழிப்பு சங்கம் அலுவலகத்தில் பணிபுரியும் பெண்கள்.

4.பெண்; வங்கி ஒருங்கிணைப்பாளர் மற்றும் பெண் வங்கி வழி நடத்துநர்கள் மற்றும் அங்கீகாரம் பெற்ற சமூக சுகாதார (பெண்); ஆர்வலர்கள்..

வயது வரம்பு, வருமான வரம்பு மற்றும் இதர தகுதிகள்:

தமிழ்நாட்டை சார்ந்த 18 முதல் 40 வயது வரையுள்ள, தமிழ்நாட்டில் வசிக்கும்   ஆண்டு வருமானம் ரூ.2,50,000/- க்கு மிகாமல் உள்ள பெண்கள் மட்டுமே இத்திட்டத்திற்கு விண்ணப்பிக்கலாம். அவர்கள் கண்டிப்பாக இரு சக்கர வாகன ஓட்டுநர் உரிமம் பெற்றிருக்க வேண்டும்.

அங்கீகரிக்கப்பட்ட மற்றும் அங்கீகரிக்கப்படாத தொழிற்பிரிவுகளில் பணியாளராக பதிவு செய்துள்ளவர்கள், சுயதொழில் செய்பவர்கள், சொந்தமாக சிறுவணிகம் செய்பவர்கள், கடைகள் மற்றும் தனியார் நிறுவனங்களில் வேலை செய்பவர்கள், அரசு உதவி பெறும் நிறுவனங்களில் மற்றும் தனியார் நிறுவனங்களில் பணிபுரியும் பெண்கள் இதற்கு விண்ணப்பிக்க தகுதியானவர்கள் ஆவார்கள்.

கிராம வறுமை ஒழிப்பு சங்கம், மாவட்ட கற்றல் மையம் ஆகியவற்றில் தொகுப்பூதியம், தினக்கூலி, ஒப்பந்த ஊதியம் அடிப்படையில் பணி புரியும் மகளிர். வங்கி ஒருங்கிணைப்பாளர், சமுதாய வங்கி ஒருங்கிணைப்பாளர் மற்றும் ஆஷா பணியாளர்களும் விண்ணப்பிக்க தகுதியானவர்கள்.

முன்னுரிமை பெறத் தகுதியுள்ள பெண்கள்

ஆதரவற்ற பெண்கள், இளம் விதவைகள், மாற்றுத்திறனாளி மகளிர், 35 வயதிற்கு மேற்பட்ட திருமணம் ஆகாத மகளிர், தாழ்த்தப்பட்ட, பழங்குடியின மகளிர், திருநங்கைகளுக்கு முன்னுரிமை.

மனுக்கள் பெறும் தேதி  22.01.2018 முதல்  05.02 2018 வரை

தமிழகத்திலுள்ள ஊராட்சி ஒன்றியங்கள், பேரூராட்சிகள் மற்றும் நகராட்சி அலுவலகங்களிலும், மாநகராட்சிகளின் மண்டல அலுவலகங்களிலும் விண்ணப்பங்கள் வழங்கப்படும்.
இதற்கான விண்ணப்பங்களை ஆன்லைனில்  http://www.tamilnadumahalir.org/tnatws.html  என்ற இணையதளத்தில் இருந்தும் பதிவிறக்கம் செய்து கொள்ளலாம்.
விண்ணப்பங்களை அருகில் உள்ள மாநகராட்சி அலுவலகங்களில் 22.01.2018 திங்கள்கிழமை முதல் 05.02.2018 திங்கள் கிழமை வரை நேரிலோ அல்லது பதிவுத்தபால் மற்றும் விரைவுத்தபால் மூலம் சமர்ப்பிக்கலாம்.
பயனாளிகளுக்கு கடன் வசதி

பயனாளிகள் தங்களுக்கு விருப்பமுள்ள 125சி.சி திறன் கொண்ட இரு சக்கர வாகனத்தினை சொந்த நிதியிலிருந்து அல்லது இந்திய ரிசர்வ் வங்கியின் கட்டுப்பாட்டிலுள்ள வங்கிகள் அல்லது நிதி நிறுவனங்கள் மூலம் கடன் வசதி பெற்றும் இத்திட்டத்தின் மூலம் பயன் பெறலாம்..

விண்ணப்பத்துடன் சமர்ப்பிக்க வேண்டிய ஆவண நகல்கள்

💬  பிறந்த தேதிக்கான சான்றிதழ் 

💬  இருப்பிடச் சான்றிதழ், 

💬 வாக்காளர் அடையாள அட்டை, 

💬  உரிய அலுவலரால் வழங்கப்பட்ட இருசக்கர வாகன ஓட்டுநர் உரிமம் - நகல்.

💬 வேலை வழங்கும் அலுவலரால் அல்லது நிறுவனத்தால் வழங்கப்படும் வருமான சான்றிதழ் அல்லது சுய வருமானச் சான்றிதழ்.

💬  நிறுவனத்தலைவர் அல்லது சங்கங்கள் மூலம் ஊதியம் பெறுபவர்களின் ஊதியச் சான்றிதழ்.

💬 ஆதார் அடையாள அட்டை.

💬 எட்டாம் வகுப்பு மற்றும் அதற்கு மேற்பட்ட கல்வி தகுதியுள்ளவர்களின் சான்றிதழ்கள்.

💬  பாஸ்போர்ட் சைஸ் போட்டோ

💬 சிறப்புத் தகுதி பெற விரும்புவோர் அதற்குரிய சான்றிதழ்.

💬 சாதிச் சான்றிதழ் (தாழ்த்தப்பட்ட மற்றும் பழங்குடியினர்க்கு மட்டும் )

💬  மாற்றுதிறனாளி என்றால் உரிய அலுவலரால் வழங்கப்பட்ட  அடையாள அட்டை

💬 வாங்கப்போகின்றஇருசக்கர வாகனத்தின் ஒப்பந்த விலைப்புள்ளி. 
💬 5 ஆண்டுகளுக்கு இந்த வாகனங்களை யாருக்கும் விற்கவோ, வோறொருவருக்கு மாற்றவோ முடியாது. 
குறிப்பு : இத்திட்டத்தில், பணிபுரியும் பெண்கள் பயன்பெற, பழகுநர் உரிமம் (LLR) வைத்திருந்தாலே போதும் என்று விதிமுறையைத் திருத்தி தமிழ்நாடு மகளிர் மேம்பாட்டுக் கழகம் உத்தரவிட்டுள்ளது.

************************************அன்புடன் செல்வம் பழனிச்சாமி - 20.01.2018